މަޤާމާއި ހަވާލުވީ ވަޒީރުކަމުގެ ޓައި އަޅައިގެން ހުންނާކަށް ނޫން: މަހުލޫފު
18 ނޮވެމްބަރު 2018 | އާދީއްތަ 07:44ރައީސް އިބްރާހިމް މުހައްމަދު ސޯލިހުގެ އިރުޝާދުފުޅާއެކު ނަތީޖާ ނެރެދެއްވާނެ ކަމަށް ވިދާޅުވި
މަހުލޫފު ވަޒީރުަމުގެ މަޤާމާއި ހަވާލުވެލައްވަނީ
ރައީސް އިބްރާހިމް މުހައްމަދު ސޯލިހުގެ ކެބިނެޓުގައި ހިމެނޭ ވަޒީރުން އިއްޔެ ހުވާކުރައްވާފައިވާއިރު، މަޤާމާއި ހަވާލުވެވަޑައިގެންނެވީ ހަމައެކަނި ވަޒީރުކަމުގެ ޓައި އަޅައިގެން ހުންނަވަން ނޫން ކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަހުމަދު މަހުލޫފު ވިދާޅުވެއްޖެއެވެ.
މަހުލޫފު މިއަދު ކުރެއްވި ޓްވީޓެއްގައި ވިދާޅުވީ ޒުވާނުންނާއި ކުޅިވަރުގެ ދާއިރާއިން ބޮޑު ބަދަލެއް ގެނައުމަށް ބޭނުންފުޅުވާ ކަމަށާއި، ރައީސް އިބްރާހިމް މުހައްމަދު ސޯލިހުގެ އިރުޝާދުފުޅާއެކު ނަތީޖާ ނެރެދެއްވާނެ ކަމަށެވެ. އަދި އެކި ކަންކަމުގައި ރައްޔިތުންގެ ހިޔާލާއި ފާޑުކިޔުން އުފަލާއެކު ބަލައިގަންނާނެ ކަމަށްވެސް މި ޓްވީޓުގައި މަހުލޫފު ވިދާޅުވިއެވެ.
މަހުލޫފު މިހެން ވިދާޅުވެފައިވާއިރު އެމަނިކުފާނަކީ ކުރިން އެކި ކުޅިވަރު ކުޅުއްވާފައިވާ، އަދި ޤައުމީ ފުޓުބޯޅަ ޓީމުގެ މެނޭޖަރުގެ މަޤާމުވެސް އަދާކުރައްވާފައިވާ ބޭފުޅެކެވެ.
މަހުލޫފުގެ އިތުރުން ރައީސްގެ ކެބިނެޓަށް ނިސްބަތްވާ 18 ވަޒީރުން އިއްޔެ ވަޒީރުކަމުގެ ހުވާ ކުރައްވާފައިވާއިރު، މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓްރަކްޗަރ މުހައްމަދު އަސްލަމްވެސް ވަނީ ހަވާލުވެފައިވާ ޒިންމާ ފުރިހަމައަށް އަދާކުރެއްވުމަށް ތައްޔާރައް ހުންނެވި ކަމުގައި ވިދާޅުވެ ޓްވީޓެއް ކުރައްވާފައެވެ.
