ރައީސް ޔާމީނާއެކު ސިޔާސީ މަސައްކަތްކުރެއްވި ބޭފުޅުންނަށް މި ސަރުކާރުން ފުރުސަތު ދީގެން ނުވާނެ: ރައީސް ނަޝީދު
18 ނޮވެމްބަރު 2018 | އާދީއްތަ 16:32ރައީސް ސޯލިހްގެ ވެރިކަން ދިފާއުކުރެއްވުމަށް ކުރައްވަންޖެހޭ ހުރިހާކަމެއް ކުރައްވާނެ ކަމަށްވެސް ވިދާޅުވި
އައްޑޫ ސިޓީގައި ބޭއްވި ޖަލްސާއެއްގައި ރައީސް ނަޝީދު ވާހަކަފުޅުދައްކަވަނީ | އަންޖު
ރައީސް އަބްދުﷲ ޔާމީނާއެކު ސިޔާސީ މަސައްކަތް ކުރެއްވި ފަރާތްތަކަށް ހޮނިހިރު ދުވަހު ރައީސްކަމުގެ މަގާމާ ހަވާލުވެ ވަޑައިގެންނެވި އިބްރާހިމް މުހައްމަދު ސޯލިހްގެ ސަރުކާރުން ފުރުސަތު ނު ދެއްވާނެކަމަށް އުއްމީދު ކުރައްވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އިބްރާހިމް މުހައްމަދު ސޯލިހް ހުވާކުރެއްވުމުގެ ރަސްމިއްޔާތާ ގުޅޭ ގޮތުން ރައީސް ނަޝީދު ދެއްވި އިންޓަވިއުގައި ވިދާޅުވެފައި ވަނީ ކުލަ ބަދަލުކޮށްގެން އިއްތިހާދުގެ ޕާޓީއަކާއި ގުޅިވަޑައިގެން މަޤާމު ރައްކާތެރި ކުރައްވަން ނޫޅުއްވުމަށް ރައީސް ޔާމީނާއެކު މަސައްކަތްކުރެއްވި ސިޔާސީ ފަރާތްތަކަށް އިލްތިމާސް ކުރައްވާކަމަށެވެ. އެފަދަ ފަރާތްތަކަށް މި ސަރުކާރުން ފުރުސަތު ނު ދޭނެ ކަމަށް އުއްމީދު ކުރައްވާކަން ފާހަގަކުރައްވައި، ރައީސް ނަޝީދު ވިދާޅުވީ ރައީސް މައުމޫން އަބްދުލްޤައްޔޫމް ވެސް އަދި ޤާސިމް އިބްރާހިމް ވެސް އެފަދަ ސިޔާސީ ބޭފުޅުންނަށް ފުރުސަތު ނު ދެއްވުމަށް އެދިވަޑައި ގަންނަވާ ކަމަށެވެ.
އެމަނިކުފާނު ވިދާޅުވި ރައީސް ޔާމީނާ އެކު މަސައްކަތްކުރެއްވި ބޭފުޅުންނަށް ރައްޔިތުން ނޫނެކޭ ބުނެފައިވާ ކަން ދަންނަންޖެހޭ ކަމަށާއި، ރައްޔިތުން ފުރުސަތު ނު ދޭނަމަ އެ ބޭފުޅުންނަށް ފުރުސަތު ދީގެން ނުވާނެ ކަމަށެވެ.
"ކުލަ ބަދަލު ނު ކުރައްވާށޭ، ތި ތިއްބެވި ތަނެއްގައި ތިއްބަވާށޭ. ތި ބޭފުޅުންގެ ފުރުސަތު، ތި ބޭފުޅުން ރައްޔިތުންނާއި ވަކާލަތު ކުރައްވައިގެން ހޯދަވާށޭ. އަޅުގަނޑު ނު ދެކެން ޖުމްހޫރީ ޕާޓީއަކުން ވެސް އަދި އަދާލަތު ޕާޓީއަކުން ވެސް އަދި ރައީސް މައުމޫން ވެސް، ރައީސް ޔާމީންގެ ސިޔާސީ މަޤާމުތަކުގައި ތިއްބެވި ބޭފުޅުން މިއަދުގެ ސަރުކާރުގެ ސިޔާސީ މަޤާމުތަކަށް ގެންނަވާނެ ކަމަކަށް. ރައީސް މައުމޫނަށް ވެސް، ޤާސިމް އިބްރާހިމަށް ވެސް، އަދި ޝެއިހް އިމްރާނަށް ވެސް އެނގިވަޑައި ގަންނަވާނެ އެ ބޭބޭފުޅުންނަކީ ރައްޔިތުން ބަލައިގަންނާނެ ބޭބޭފުޅުންނެއް ނޫންކަން" ވަކި ސިޔާސީ ބޭފުޅެއްގެ ނަން ވިދާޅުނުވެ ވާހަކަ ދައްކަވަމުން ރައީސް ނަޝީދު ވިދާޅުވި އެވެ.
ނަޝީދު ވިދާޅުވީ ސޯލިހު ހުވާ ކުރެއްވުމަކީ ހަޔާތުގައި ލިބިވަޑައިގަންނަވާ އެންމެ އުފާވެރި އެއް ދުވަސް ކަމަށާއި އެމަނިކުފާނާ އެކު އެކީގައި މަސައްކަތް ކުރައްވާތާ 30 އަހަރަށް ވުރެ ގިނަ ދުވަސްވެފައިވާ ކަމަށެވެ. އިބްރާހީމް މުހައްމަދު ސޯލިހުގެ ސަރުކާރު ދަމަހައްޓަން ޤާނޫނީ ގޮތުން ކުރެވެން ހުރި ހުރިހާ ކަމެއް ކުރައްވާނެ ކަމަށް ނަޝީދު ވިދާޅުވިއެވެ.
"އަޅުގަނޑު ރައީސް އިބްރާހީމް މުހައްމަދު ސޯލިހަށް ކުރާ ގަދަރާއި އަދި އެ ބޭފުޅާގެ ރައީސް ކަމާއި އަދި އެބޭފުޅާގެ ސަރުކާރު ދަމަހައްޓަން އަޅުގަނޑު ޤާނޫނީ ގޮތުން ނު ކުރާނެ އެއްވެސް ކަމެއް ނޯންނާނެ. އެއީ އަޅުގަނޑު އެކަން ކުރާނެ ގޮތް. އަދި ސިޔާސީ އެއްވެސް މަޝްވަރާ އަކީ އަޅުގަނޑު އެކަނި ހިންގާނެ މަޝްވަރާ އެއް ނޫން. އަޅުގަނޑު ދެކޭ ގޮތުގައި ރައީސް އިބްރާހީމް މުހައްމަދު ސޯލިހަށް ރައީސް ކަމުގެ މުއްދަތެއް ލިބިވަޑައިގަންނަވަން ޖެހޭނެ، އެއީކީ އަޅުގަނޑު އިންކާރު ކުރާނެ ކަމެއް ނޫން އަދި އެއްވެސް ދިވެއްސެއް އެކަމާއި އިންކާރެއް ނުކުރައްވާނެ. އަޅުގަނޑު ދެކޭ ގޮތުގައި ސޯލިހަށް ރިޔާސީ ދައުރެއް ލިބިވަޑައިގަންނަވަން ޖެހޭނެ އެހެން ނަމަވެސް އަޅުގަނޑު ޤަބޫލުކުރަނީ ދިވެހި ރާއްޖޭގައި ސިޔާސީ ހަމަޖެހުން ލިބިގެން ދާނީ ބަރުލަމާނީ ނިޒާމެއްގެ ތެރެއިން،" ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ ސޯލިހުގެ ސަރުކާރު ވެގެންދާނީ ރައްޔިތުންގެ އަޑު އަހާ، ރައްޔިތުންނާއި ގާތުން ރައްޔިތުންގެ ބޭނުންތަކަށް ހިންގޭ ސަރުކާރަކަށް ވެގެންދާނެ ކަމަށެވެ. އަދި މި ސަރުކާރަކީ އެއްވެސް ހާލެއްގައި ވަކި ބައެއްގެ ސަރުކާރެއް ނޫންކަން ކަމަށާއި މި ސަރުކާރަކީ ރައްޔިތުންގެ ވެރިކަމަށް ހިންގާ ސަރުކާރެއް ކަމަށް ވެސް އެމަނިކުފާނު ވިދާޅުވިއެވެ.
