އައިޖީއެމްއެޗްގައި އެޑްމިޓްކޮށްގެން ފަރުވާ ހޯއްދަވަމުން ގެންދަވާ ކުރީގެ ނައިބް ރައީސް އަހުމަދު އަދީބުގެ ކިޑްނީގައި އުފެދިފައިވާ ހިލަކޮޅެއް ފެންނަ އެކްސްރޭއެއް އާންމުކޮށްފިއެވެ.
މިއެކްސްރޭ އާންމުކުރުމަށްފަހު އަދީބުގެ އަނބިކަނބަލުން މަރިޔަމް ނަޝްވާ ވިދާޅުވީ އެޑްމިޓްކޮށްގެން ފަރުވާދޭން ފެށީއްސުރެ އަދިވެސް އެހިލަކޮޅު ދައުރު ނުވާ ކަމަށެވެ. މިކަމުގެ ސަބަބުން އަދީބުގެ ވާތް ފަރާތުގެ ކިޑްނީ ވަނީ ދުޅަވެފައިވާ ކަމަށް އޭނާ ވިދާޅުވިއެވެ.
އަދީބުގެ ސިއްހީ ހާލަކޮޅާއި މެދު ކަރެކްޝަން ސަރވިސްގެ އިހުމާލު ވަރަށް ބޮޑަށް އޮތްކަމަށް ވިދާޅުވެ، އެމައްސަލަ ބަލައިދިނުމަށް އެދި ނަޝްވާ ވަނީ އެޗްއާރްސީއެމަށް ހުށަހަޅުއްވާފައެވެ. އަދި މިހާރު އަދީބުގެ ސިއްހީހާލުކޮޅާއި ބެހޭ ގޮތުން ޑޮކްޓަރުން ދެއްވި ލިޔުންތައް އެޗްއާރްސީއެމްއަށް ހުށަހަޅާފައިވާ ކަމަށް ނަޝްވާ ވިދާޅުވިއެވެ.
މީގެ އިތުރަށް ނަޝްވާ ވިދާޅުވީ ކިޑްނީގެ ހިލަ ދައުރުވުމާއި ގުޅިގެން ބަނޑުގައި ރިއްސަން ފެށިވަގުތާއި އަދި އެޑްމިޓް ކުރުމާއި ހަމައަށް ދޫނިދޫގައި ކަރެކްޝަނުން އަދީބާއި ދޭތެރޭގައި އަމަލުކުރިގޮތުގެ ބަޔާން އަދި އެޑްމިޓް ކުރެވުނު ވަގުތުން ފެށިގެން ބޭސްފަރުވާގެ ކަންކަމުގައި ކަރެކްޝަނުން އަމަލުކުރި ގޮތުގެ ބަޔާން ނަގާފައިވާ ކަމަށެވެ.
އެމްއެމްޕީއާރުސީގެ ކޮރަޕްޝަނާއި ރިޔާސީ ލޯންޗުކޮޅުގައި އެއްޗެއް ގޮއްވާލި ކަމަށް ބުނެ، އަދީބުގެ މައްޗަށް ދައުލަތުން ކުރި ތިން ދައުވާއެއް ސާބިތުވާ ކަމަށް ނިންމުމާ ގުޅިގެން އަދީބު ގެންދަވަނީ 33 އަހަރަށް ވުރެ ގިނަ ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ. މީގެ އިތުރުން ވެސް އެމްއެމްޕީއާރުސީގެ ހިޔާނާތުގެ ގިނަ މައްސަލަތަކެއްގައި އަދީބުގެ މައްޗަށް ދައުވާކޮށް، ޝަރީއަތްތައް ވެސް ދަނީ ހިންގަމުންނެވެ.
