ޝަރުއީ ދާއިރާގެ ކޯޓުތަކުގެ ހުރުމަތް ކެނޑޭ ފަދަ ކޮންޓެެންޓެއް ރާއްޖެޓީވީގެ "ފަށާއިރު" ޕްރޮގްރާމްގައި ގެނެސްދީފައިވާ ކަމަށް ބުނެ، ހުށަހަަޅާފައިވާ ޝަކުވާ ބެލުމަށް ފަހު، އެފަދަ ކޮންޓެއްޓެއް ގެނެސްދީފައި ނުވާ ކަމަށް މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ނިންމައިފިއެވެ.
ބްރޯޑްކޮމް އަށް ހުށަހަޅާފައިވާ ޝަކުވާއަކާ ގުޅިގެން އެމައްސަލަ ބެލުމަށް ފަހު، އެކޮމިޝަނުން ނިންމާފައިވާ ނިންމުމުގައި ވަނީ މި އަހަރުގެ އޮކްޓޯބަރު މަހުގެ 31 ވަނަ ދުވަހުގެ ހެނދުނު ރާއްޖެޓީވީގެ މޯނިންގ ޝޯވ "ފަށާއިރު" ޕްރޮގްރާމްގައި އެ ޕްރޮގްރާމް ހުށަހަޅައިދިން ފަރާތްތަކުން، ރާއްޖޭގެ ޝަރުއީ ކޯޓުތަކާއި ފަނޑިޔާރުންގެ، ވަކިން ހާއްސަކޮށް ސުޕްރީމް ކޯޓާއި އެކޯޓުގެ ފަނޑިޔާރުންގެ ހުރުމަތް ކެނޑޭ އަދި މުޅި ޝަރުއީ ދާއިރާގެ ކަންކަމާއި ގަދަރަށް އުނިކަން ލިބޭ ފަދަ ކޮންޓެންޓް ގެނެސްދީފައިވާ ކަމަށް ފާހަގަކުރެވިގެން ހުށަހަޅާފައިވާ ޝަކުވާއެއް ކަމަށެވެ.
އެކޮމިޝަނުން އެ މައްސަލަ ބެލުމަށް ފަހު ނިންމާފައި ވަނީ، "ފަށާއިރު" ޕްރޮގްރާމްގައި ގެނެސްދިން ކޮންޓެންޓްގައި ވާހަކަ ދައްކާފައި ވަނީ ޖުމްލަ ގޮތެއްގައި ދެ ކަމެއްގެ މައްޗަށް ކަމަށެވެ. އެގޮތުން، ސަދޫމުގެ ޝަރީއަތްކުރުމުގެ ނިޒާމުން ފާހަގަކުރެވިފައިވާ މައްސަލަތަކަކާ ބެހޭ ގޮތުން ދެއްކި ވާހަކަތަކެއް ކަމަށެވެ. ދެވަނަ ކަމަކަށް ރާއްޖޭގެ ޝަރުއީ ނިިޒާމާ ބެހޭ ގޮތުން ދެއްކި ވާހަކަތަކެއް ކަމަށާއި، އެ ކޮންޓެންޓްގައި ރާއްޖޭގެ ޝަރުއީ ނިޒާމާ ބެހޭ ގޮތުން ދެއްކި ވާހަކަތަކުގައި ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްއާ ހިލާފު ވާހަކަތަކެއް ނުހިމެނޭކަން ފާހަގަ ކުރެވިފައިވާ ކަމަށެވެ.
އެހެންކަމުން އެ މައްސަލައާ ގުޅޭ ކޮންޓެންޓްގައި ވާހަކަ ދެއްކި ޕްރެޒެންޓަރުން ވާހަކަ ދައްކާފައި ވަނީ ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސްއާ ހިލާފުވާ މިންވަރަށް ކަމަށް ބެލެން ނެތްކަމަށް ކަނޑައަޅައި، އެކޮމިޝަނުގެ ޖަލްސާގައި ބައިވެރިވި މެމްބަރުންގެ އަޣްލަބިއްޔަތުން މައްސަލަ ނިންމީ ކަމަށް ބްރޯޑްކޮމް އިން ނިންމާފައިވާ ނިންމުމުގައި ވެއެވެ.
ރާއްޖެޓީވީގެ މޯނިންގ ޝޯވ "ފަށާއިރު" އެ ޕްރޮގްރާމްގައި ރާއްޖޭގެ ޝަރުއީ ނިޒާމުގެ ހުރުމަތް ކެނޑޭ ފަދަ ވާހަކަތަކެއް ދައްކާފައިވާ ކަމަށް ކުރެވޭ އެ ތުހުމަތާއި ގުޅިގެން ޝަރުޢީ އެއްވެސް ކޯޓެއްގެ ޝަރީޢަތުގެ އަޑުއެހުންތަކާއި، ޝަރުޢީ ދާއިރާގެ ޙަރަކާތްތައް ކަވަރ ކުރުމުގެ ފުރުޞަތު ރާއްޖެޓީވީ އަށް ނުދިނުމަށް ސުޕްރީމް ކޯޓުން ނިންމާފައި ވެއެވެ. އަދި އެ މައްސަލަ ބަލަމުންދާ ކަމަށް ބުނެފައި ވެއެވެ.
