އިންތިހާބީ ރައީސް އިބްރާހީމް މުހައްމަދު ސޯލިހު ދިރިއުޅުއްވާނީ، ދައުލަތުން ރިޔާސީ ގެކޮޅުގެ ގޮތުގައި ކަނޑައަޅުއްވާފައިވާ މުލިއާ ގޭގައި ކަމަށާއި އިންތިހާބީ ނާއިބު ރައީސް ފައިސަލް ނަސީމް ދިރިއުޅުއްވާނީ ރިޔާސީ ގެކޮޅުގެ ގޮތުގައި ކަނޑައަޅުއްވާފައިވާ ހިލާލީ ގޭގައި ކަމަށް ރާއްޖެއެމްއެވީ އަށް އެނގިއްޖެއެވެ.

މުލިއާގެ އާއި ހިލާލީގެ މަރާމާތުކުރުމުގެ މަސައްކަތްތަކެއް ދަނީ ކުރަމުން ދެއެވެ. 

ރަސްމީ އެއްވެސް ފަރާތަކުން އެކަން މިހާތަނަށް ކަށަވަރު ކޮށްދެއްވާފައި ނުވިނަމަވެސް، އެނގިފައިވާ ގޮތުގައި މުލިއާގޭގައި ދިރިއުޅުއްވުމަށް ހަމަޖެހިފައި ވަނީ އިންތިހާބީ ރައީސް އިބްރާހީމް މުހައްމަދު ސޯލިހުއެވެ. އަދި ހިލާލީގޭގައި ދިރިއުޅުއްވުމަށް ހަމަޖެހިފައިވަނީ އިންތިހާބީ ނާއިބު ރައީސް ފައިސަލް ނަސީމްއެވެ. 

ރިވައިޒް ކުރަމުންދާ މިއަހަރުގެ ބަޖެޓުން ދައްކާ ގޮތުން ރައީސް އަބްދުﷲ ޔާމީން ދިރިއުޅުއްވާ ގެކޮޅުގެ ހަރަދަށް މިއަހަރު 37.8 މިލިއަން ރުފިޔާ ހަރަދުވާނެއެވެ. ނަމަވެސް އަންނަ އަހަރު ރައީސް ސޯލިހު ދިރިއުޅުއްވާނެ ދައުލަތުގެ ގެކޮޅުގެ ހަރަދު 31.5 މިލިއަން ރުފިޔާ ވަނީ ކުޑަކޮށްފައެވެ.

ރައީސުލްޖުމްހޫރިއްޔާގެ ނާއިބުގެ ރަސްމީ ގެކޮޅަށް އަންނަ އަހަރު ހަރަދު ކުރުމަށް ބަޖެޓްކޮށްފައި ވަނީ 2.5 މިލިއަން ރުފިޔާއެވެ.

ހަމައެއާ އެކު، ރައީސް ޔާމީން ދިރިއުޅުއްވުމަށްޓަކައި، ރަސްމީ ގެކޮޅުގެ ގޮތުގައި މުލިއާގެ އާއި ހިލާލީގެ ވަނީ ކަނޑައަޅާފައެވެ. އަދި އާ ރަށުގައި ޗުއްޓީ ހޭދަ ކުރެއްވުމަށްޓަކައި ވަނީ ތިން ބުރީގެ ގަނޑުވަރެއް އިމާރާތްކޮށްފައެވެ. އަދި ވެރިކަމުގެ ކުރީކޮޅު އަމިއްލަ ގެކޮޅު ދޫވެހީގައި ދިރިއުޅުއްވި އިރު އެގެ މަރާމާތުކުރުމަށް ވެސް ބޮޑު ހޭދައެއް ދައުލަތުން ކޮށްފައި ވެއެވެ.