ޓްރާންސްޕޯޓް އޮތޯރިޓީގައި މީދާ ކޮށިތަކެއް!

ޓްރާންސްޕޯޓް އޮތޯރިޓީ ހިންގަމުން އަންނަ އޮފީހުގެ ހާލަތު ހުރީ ވަރަށް ދަށްކޮށް ކަމަށާއި އެތަނުގެ ތެރޭގައި 30 ވަރަކަށް މީދާ ކޮށި ބަހައްޓާފައި އެބަހުރި ކަމަށް ޓްރާންސިޝަން ކޮމެޓީން ބުނެފިއެވެ.

އެކޮމެޓީގެ ސަބް ކޮމެޓީތަކުން އެއޮތޯރިޓީއަށް ޒިޔާރަތް ކުރުމަށް ފަހު ނޫސްވެރިންނަށް މައުލޫމާތު ދެއްވަމުން އަހުމަދު އާދިލް ވިދާޅުވީ އިކޮނޮމިކް މިނިސްޓްރީގެ ދަށުން ހިންގާ ޓްރާންސްޕޯޓް އޮތޯރިޓީއަށް ވަރަށް ބޮޑަށް އިހުމާލު ވެފައިވާ ކަމަށާއި އެތަނުގެ ހާލަތު އޮތީ ވަރަށް ދަށް ފެންވަރުގައި ކަމަށެވެ.

އިދާރީ ކަންކަމަށް ވެސް ހުރަސް އެޅޭ މިންވަރަށް އެތަނުގެ ހާލަތު ގޯސްވެފައިވާކަން ފާހަގަ ކުރައްވަމުން އާދިލް ވިދާޅުވީ އެތަނުގެ ތެރޭގައި މީދާ ދުވެ ހަދާ ކަމަށާއި މީދާ ހިފުމަށް 30 ވަރަކަށް ކޮށި އެތަނުގައި ބަހައްޓާފައި އެބަހުރި ކަމަށެވެ. އަދި އޮފީހުގެ މޭޒުތަކުގެ ވަތްގަނޑުތަކުގައި މީދާ ވިހާފައި ހުރިކަމުގެ ފޮޓޯ ވެސް މުވައްޒަފުން ދައްކާފައިވާ ކަމަށް އާދިލް ވިދާޅުވިއެވެ.

"އަޅުގަނޑުމެން އެ އިމާރާތައް ވަދެ ބަލާލީމާ ހިތަށް އެރި ބައެއް ފަހަރު ސަރުކާރުގެ އިދާރާއެއްވެސްބާވައޭ. ތިރީހަކަށް މީދާކޮށި އެތާ އެތެރޭގައި އެބަހުރި ބަހައްޓާފައި. ކޮންމެ ސެކްޝަނެއްގައި މީދާ ކޮށިތަކެއް. މޭޒުމަތީގައި، މޭޒުދަށުގައި އަރިމަތީގައި ބަހައްޓާފައި އެބަހުރި. ބައެއް ވަތްގަނޑުތައް ދެއްކި ބައެއް ފޮޓޯތައް ދެއްކި ވަތްގަނޑުތަކުގައި މީދާ ވިހާފައި. ކަރަންޓުގެ މައްސަލަ އިންތިހާއަށް ބޮޑުވެފައި އޮތީ ދޭތެރެއަކުން ކަރަންޓް ކެނޑޭ. ސީލިންގ ފޯވެފައި އޮންނަނީ. އެތަނަކީ ސަލާމަތާ ރައްކާތެރިކަމަށް ބަލާއިރުވެސް މި ވަގުތުން ވަގުތަށް ވެސް ހައްލުކޮށްދޭން ޖެހޭ ތަނެއް،" އާދިލް ވިދާޅުވިއެވެ.