ވިޔަފާރިވެރިން އިސް ނަގައިގެން އިންތިހާބީ ރައީސަށް މަރުހަބާ ދަންނަވައިފި
މި ހަރަކާތް ބާއްވާފައިވަނީ ވިޔަފާރިވެރިން އިސްނަގައިގެން
ހަފްލާގެ ތެރެއިން - ރައީސް ނަޝީދާއި އިންތިހާބީ ރައީސް ސޯލިހް
އިންތިހާބީ ރައީސް އިބްރާހިމް މުހައްމަދު ސޯލިހަށް މަރުހަބާ ދެންނެވުމަށް، ވިޔަފާރިވެރިން އިސް ނަގައިގެން ހާއްސަ ހަފްލާއެއް ބާއްވައިފިއެވެ.
ބުދަ ދުވަހުގެ ރޭ އެ ހަފްލާ ބާއްވާފައި ވަނީ އެސްޓީއޯ ޓްރޭޑް ސެންޓަރު ކުރިމަތީގައެވެ.
މި ހަރަކާތުގައި އިންތިޚާބީ ރައީސް އިބްރާހީމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދާއި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ބައިވެރިވެވަޑައިގެންނެވިއެވެ. އެ ބޭފުޅުންގެ ޝަރަފުގައި ބޭއްވި ފަރިއްކޮޅަށް ފަހު އެ އިވެންޓްގައި ބައިވެރިވި އާންމުންނާއެކު ރައީސް ސޯލިހާއި ނަޝީދު ވަނީ ފޮޓޯ ނަންގަވާފައެވެ.
ބޮޑު ތަފާތަކުން ރައީސް އަބްދުﷲ ޔާމީން ބަލިކުރައްވައި، ރިޔަސީ އިންތިހާބު އިބްރާހިމް މުހައްމަދު ސޯލިހު ކާމިޔާބު ކުރެއްވުމާ ގުޅިގެން، ރާއްޖޭގެ އެކި ދާއިރާތަކުންނާއި ރަށްތަކުން ވެސް އެމަނިކުފާނަށް މަރުހަބާ ދެންނެވުމުގެ ގޮތުން ދަނީ ތަފާތު ހަފްލާތައް ބާއްވަމުންނެވެ. އަދި އިންތިހާބީ ރައީސާއި ނައިބު ރައީސަށް އެކި އޮފީސްތަކުންނާއި ޖަމާއަތްތަކުން ގެންދަނީ މަރުޙަބާ ކިޔަމުންނެވެ.
މި އިންތިޚާބު އިބްރާހީމް މުހައްމަދު ސޯލިހާއި ފައިސަލް ނަސީމް ކާމިޔާބު ކުރެއްވީ 134،705 ވޯޓުންނެވެ. ވޯޓުލީ މީހުންގެ 58.4 ޕަސެންޓް މީހުން އިބޫ އަށް ތާއީދުކޮށްފައި ވެއެވެ. އިންތިޚާބުގައި ނާކާމިޔާބުވެ ވަޑައިގެންނެވި ރައީސް ޔާމީނަށް ލިބިވަޑައިގެންނެވީ 96052 ވޯޓެވެ. އެއީ 41.6 ޕަސެންޓެވެ.
