ކުރީގެ ރައީސް މުހައްމަދު ނަޝީދުގެ މައްޗަށް ކްރިމިނަލް ކޯޓުން ކޮށްފައިވާ 13 އަހަރު ދުވަހުގެ ޖަލު ހުކުމް މުރާޖައާ ކޮށް، އެމަނިކުފާނު މިނިވަން ކުރުމަށް ހުށަހަޅާފައިވާ ގަރާރު، ރައްޔިތުންގެ މަޖިލީހުން ފާސްކޮށްފި އެވެ.

ހޯމަ ދުވަހުގެ ޖަލްސާގައި އެ ގަރާރު ފާސްކޮށްފައި ވަނީ 57 މެމްބަރުންގެ އަޣްލަބިއްޔަތުންނެވެ. ނުފެންނަ ކަމަށް ނުވަ މެމްބަރަކު ވޯޓު ދެއްވިއެވެ.  

ރައީސް ނަޝީދުގެ މައްޗަށް ހިންގާފައިވާ ޝަރީއަތާއި ކޮށްފައިވާ ހުކުމް ޕްރޮސެކިއުޓާރ ޖެނެރަލަށާއި ސުޕްރީމް ކޯޓަށް އިލްތިމާސްކޮށް، ހުށަހަޅާފައިވާ އެގަރާރު މިނިވަން މުއައްސަސާތަކާ ބެހޭ ކޮމެޓީން އިސްލާހުކޮށްފައި ވާއިރު، އިތުރު ކޮށްފައި ވަނީ ރައީސް ނަޝީދާއި ރައީސް ނަޝީދާ އެއްފަދަ އިން ހުކުމް ކޮށްފައިވާ އެންމެހައި ފަރާތްތަކުގެ މައްސަލަތައް މުރާޖައާކޮށް، މިނިވަންކޮށް، އިންސާފު ގާއިމުކޮށްދިނުމަށް ޕްރޮސެކިއުޓާރ ޖެނެރަލަށާއި ސުޕްރީމް ކޯޓުގައި އިލްތިމާސް ކުރުމަށެވެ. 

އެގަރާރު ރައްޔިތުންގެ މަޖިލީހުން ފާސްކުރީ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީން ދިރާސާކޮށް ނިންމި ގޮތަށެވެ. 

ރައްޔިތުންގެ މަޖިލީހަށް އެ ގަރާރު ހުށަހެޅިފައި ވަނިކޮށް، ރައީސް ނަޝީދާއި ސިޔާސީ ބޭފުޅުންގެ މައްޗަށް ކޮށްފައިވާ ހުކުމްތައް، ތަންފީޒު ކުރުން ފަސްކުރުމުގެ އަމުރުތަކެއް ސުޕްރީމް ކޯޓުން ވަނީ ނެރެފައެވެ. އަދި ސުޕްރީމް ކޯޓުގައި އިލްތިމާސްކޮށްފައިވާ އެމައްސަލަތަކަށް ވަކިގޮތެއް، އެ ކޯޓުން ނިންމަންދެން ރައީސް ނަޝީދާއި ސިޔާސީ ބޭފުޅުން ވަނީ މިނިވަން ކޮށްފައެވެ.  

ގުޅިފައިވާ ޕާޓީތަކުގެ މަޖިލިސް މެމްބަރުންނާއި ޕީޕީއެމްގެ މަޖިލިސް މެމްބަރުންތަކެއް ސޮއިކޮށް މަޖިލީހަށް ހުށަހެޅި އެ ގަރާރު ބަލައިގެންފައި ވަނީ 48 މެމްބަރުންގެ އަޣުލަބިއްޔަތުންނެވެ. އެ ގަރާރާ ދެކޮޅަށް ވޯޓު ދެއްވީ ފަސް މެމްބަރުންނެވެ. އަދި ހަތަރު މެމްބަރަކު ވަކިކޮޅަކަށް ވޯޓެއް ނުދެއްވައެވެ. 

އެ ގާރާރު ދިރާސާ ކުރެއްވުމަށް ފޮނުވި ކޮމެޓީއަކީ ސަރުކާރުގެ އަޣުލަބިއްޔަތު އޮތް ކޮމެޓީއެކެވެ. ފުނަދޫ ދާއިރާގެ މެމްބަރު އަލީ ސަލީމް މުގައްރިރުކަން ކުރައްވާ އެ ކޮމެޓީގައި ހިމެނެނީ އިދިކޮޅު ތިން މެމްބަރުންނެވެ. ދެން އެ ކޮމެޓީގައި ހިމެނޭ 8 މެމްބަރުންނަކީ ވެސް ޕީޕީއެމްގެ މެމްބަރުންނެވެ.

ރައީސް ނަޝީދު މިނިވަން ކުރުމަށް ޖުމްލަ 49 މެމްބަރަކު ސޮއި ކުރި ގަރާރުގައި ޕީޕީއެމްގެ 12 މެމްބަރަކު ސޮއި ކުރައްވާފައި ވެއެވެ.