ތުރުކީގެ އިސްތަންބޫލްގައި ހުންނަ ސައުދީ އަރަބިއްޔާގެ ކޮންސިއުލޭޓްގައި މަރާލި ނޫސްވެރިޔާ ޖަމާލް ޚަޝޯގީގެ އެންމެ ފަހު ބަހަކަށްވީ "އަހަރެން ނޭވާހާސްވަނީ... އަހަރެން ބޮލުން ތި ކޮތަޅު ނައްޓާ،" ކަމަށް ތުރުކީގެ ދުވަހު ނޫހެއްް ކަމަށްވާ ސަބާ ނޫހުގެ ހެޑް އޮފް އިންވެސްޓިގޭޝަން އަލްޖަޒީރާ ނޫހުގައި ބުނެފިއެވެ.

ވޮޝިންގޓަން ޕޯސްޓުގައި ލިޔަމުންދިޔަ ނޫސްވެރިޔާ ޚަޝޯގީ މަރާލާފައިވަނީ ޕްލާސްޓިކް ކޮތަޅެއް ބޮލުގައި އަޅުވައި ނޭވާ ހާސްކޮށްލައިގެންކަމަށް ނަޒީފް ކަރަމަން އަލްޖަޒީރާގައި ބުނެފައިވެއެވެ.

ކަރަމަން ބުނީ ރެކޯޑިންގއަށް ބަލާއިރު ޚަޝޯގީ މަރާލުމަށް ހަތް މިނެޓް ހޭދަކޮށްފައިވާކަމަށެވެ.

ތުރުކީގެ ރައީސް ރަޖަބް ތައްޔިބު އޮރްދޮޣާން ހޮނިހިރު ދުވަހު ވިދާޅުވީ ޚަޝޯގީގެ މަރުގެ މައްސަލައާ ގުޅޭ އޯޑިއޯ ރެކޯޑިންގ ސައުދީ އަރަބިއާ، އެމެރިކާ، ޖަރުމަނު، ފްރާންސް، އަދި އިނގިރޭސިވިލާތަށް ހަވާލުކޮށްފި ކަމަށެވެ.

ފުރަތަމަ ބޮޑު ހަނގުރާމަ ނިމުނުތާ 100 އަހަރު ފުރުން ފާހަގަކުރުމަށް ފްރާންސްގައި ބޭއްވި ހަފްލާތަކަށް ފުރާ ވަޑައިގެންނެވުމުގެ ކުރިން އޮރްދޮޣާން ވިދާޅުވީ އޮކްޓޯބަރު މަހުގެ ދެވަނަ ދުވަހު ޚަޝޯގީ މަރާލުމުގެ ކުރިން އެގައުމަށް ދަތުރުކުރި 15 މީހުންގެ ތެރޭގައި ޚަޝޯގީ މަރާލި މީހާ ވާކަން ސައުުދީއަށް އެނގޭކަމަށެވެ.

ކަރަަމަން ބުނިގޮތުގައި ޚަޝޯގީގެ ހަށިގަނޑުގެ ގުނަވަންތައް ބުރިބުރިކޮށްލުމުގެ ކުރިން ތަޅުންގަޑުގައި ޕްލާސްޓިކް ކޮތަޅުއަޅައި ކަވަރުކޮށްފައިވާކަމަށެވެ. 15 ވަރަކަށް މިނެޓަށް ދިގުދެމިގެންދިއަ އެ މަސައްކަތްކުރުމުގައި އިސްކޮށްހުރީ ސައުދީ ސައިންޓިފިކް ކައުންސިލް އޮފް ފޮރެންސިކްސްގެ ވެރިޔާ ސަލާހް އަލް ތުބައިޤީކަމަށް ކަރަމަން ބުންޏެވެ.

ބައެއް މަސްދަރުތަކާ ހަވާލާދީ ހޮނިހިރު ދުވަހު އަލްޖަޒިރާ އިން ބުނެފައިވާ ގޮތުގައި ޚަޝޯގީގެ ހަށިގަނޑު ހޯދުމުގެ މަސައްކަތް ތުރުކީގެ ފުލުހުން މިހާރު ވަނީ ހުއްޓާލާފައެވެ. ނަމަވެސް އުމުރުން 59 އަހަރުގެ ނޫސްވެރިޔާގެ މަރުގެ މައްސަލައިގައި ކުރަމުންދާ ޖިނާއީ ތަހުގީގު އަދިވެސް ކުރިޔަށް ގެންދާނެއެވެ.

އިސްތަންބޫލްގައި ހުންނަ ސައުދީ ކޮންސުލް ޖެނެރަލްގެ ގޭގައި ހުރި ވަޅެއްގެ  ތެރެއިން ހައިޑްރޯފްލޮރިކް އެސިޑާއި އިތުރު ކެމިކަލެއް ފެނިފައިވާކަމަށް ތުރުކީގެ އެޓަރނީ ޖެނެރަލްގެ އޮފީހުގެ މަސްދަރަކުން އަލްޖަޒީރާގައި ބުނެފައިވާކަމަށް އެ އޭޖެންސީންވަނީ ބުނެފައެެވެ.

ކަރަމަން ބުނީ ޚަޝޯގީ މަރާލުމަށް  ސައުދީން ތުރުކީއަށް އައި ގްރޫޕުން އެތެރެކުރި އާލާތްތަކުގެ ފޮޓޯ ސަބާ ނޫހުން ވަރަށް އަވަހަށް އާއްމުކުރާނެކަމަށެވެ.

މީގެ އިތުރުން ޚަޝޯގީގެ ހަޔާތުގެ އެންމެފަހު ވަގުތުކޮޅުގެ އޯޑިއޯވެސް އެ ނޫހުން ވަރަށް އަވަހަށް އާއްމުކުރާނެކަމަށެވެ.

ޚަޝޯގީ ދިރިހުއްޓައި އެންމެ ފަހުން ފެނިފައި ވަނީ ސައުދީ ކޮންސިއުލޭޓަށް ލިއުމެއް ބަލާ އޮކްޓޯބަރު މަހުގެ ދެ ވަނަ ދުވަހު ދަނިކޮށެވެ. އޭގެ ފަހުން އޭނާގެ ޚަބަރެއް ވެފައި ނުވާއިރު އޭނާ މަރާލާފައިވާ ކަމަށް ތުރުކީން ބުނަމުންދާތާ އެތައް ދުވަހެއްފަހުން ސައުދީ އިން އެކަމަށް އެއްބަސްވެފައި ވަނީ އޮކްޓޯބަރު މަހުގެ 20 ވަނަ ދުވަހުއެވެ.