ޚަޝޯގީ މަރާލާފައިވާކަމަށް މީޑިއާތަކުން ބުނެފި!

ގެއްލިގެން ހޯދަމުންދިޔަ ސައުދީ އަރަބިއްޔާގެ ނޫސްވެރިޔާ ޖަމާލް ޚަޝޯގީ މަރާލާފައިވާކަމަށް ކުރެވޭ ތުހުމަތުތަކަށް ބާރުދޭ ހެކިފެނިފައިވާކަމަށް ތުރުކީގެ އެޓަރނީ ޖެނެރަލް ވިދާޅުވެއްޖެއެވެ.

މީގެ އިތުރުން ސީއެންއެންއިން ދަނީ ޖަމާލް މަރުވީ ނުބައިކޮށް ގެންދިޔަ ތަހުގީގެއްގެ ނަތީޖާއެއްގެ ސަބަބުންކަމަށް ބުނެ ސައުދީއިން ރިޕޯޓެއް ތައްޔާރުކުރަމުންދާކަމުގެ ރިޕޯޓްކޮށްފަ އެވެ.

ޚަޝޯގީ މަރުވެއްޖެކަމަށް ސައުދީ އޮފިޝަލުން އެއްބަސްވާން ތައްޔާރުވެ، ތައްޔާރުކޮށްފައިވާ ރިޕޯޓް އަދި ފައިނަލްވެފައި ނުވާއިރު، ކޮންމެވަގުތަކުވެސް އެ ރިޕޯޓް ބަދަލުކޮށްފާނެކަމަށް ބެލެވެއެެވެ. މަސްދަރަކާއި ހަވާލަދީ ސީއެންއެންގައި ބުނެފައިވަނީ، އެ މައްސަލައިގެ ރިޕޯޓް ނިމިގެންދާއިރު، މައްސަލަ ރަނގަޅަށް ސާފު ނުވާކަމަށާއި، ދެފުށް ފެންނަގޮތަށް ނިމިފައިނުވާނެކަމަށް ބެލެވެއެވެ.

ނޫސްވެރިޔާ ޖަމާލް ޚަޝޫގީ ގެއްލުނީ ތުރުކީގެ ވެރިރަށް އިސްތަމްބޫލްގައި ހުންނަ ސައުދީ އަރަބިއްޔާގެ ކޮންސިއުލޭޓަށް ދިޔަ ފަހުން ކަމަށް ތުރުކީ ސަރުކާރުން ވަނީ ބުނެފަ އެވެ.

ޖަމާލް ޚަޝޫގީއަކީ، ސައުދީ ރަސްކަމާއި އަދި ހާއްސަކޮށް ސައުދީ އަރަބިއްޔާގެ މިހާރުގެ ނުފޫޒުގަދަ ވަލީއަހުދު މުހައްމަދު ބިން ސަލްމާންއާއި އޭނާގެ ސިޔާސަތުތަކާ ދެކޮޅު ލިއުންތައް ލިޔާ މީހެކެވެ. އެމެރިކާގައި އުޅުމަށްފަހު އޭނާ ތުރުކީއަށް ބަދަލުވިތާ އަދި އަހަރެއް ވެސް ނުވެއެވެ. ތުރުކީގެ ރައީސް ރަޖަބަ ތައްޔިބް އުރުދުޣާން ވިދާޅުވީ ސައުދީ ނޫސްވެރިޔާ ހޯދުމަށް ކުރަމުންދާ މަސައްކަތުން އެދެވޭ ނަތީޖާއެއް ފެންނާނެ ކަމަށް އުއްމީދުކުރައްވާ ކަމަށެވެ. އަދި އެމަސައްކަތް އަމިއްލަފުޅު ހައިސިއްޔަތުންވެސް ބައްލަވަމުން ގެންދަވާ ކަމަށްވެސް އުރުޣާން ވަނީ ވިދާޅުވެފަ އެވެ.