ޚަޝޯގީ މަރާލެވިފައި ވާނަމަ ވަރުގަދަ އަދަބެއް ދޭނެކަމަށް ޓްރަމްޕް ވައުދުވެ ވަޑައިގެންފި
15 އޮކްޓޯބަރު 2018 | ހޯމަ 14:58ޚަޝޯގީ މަރާލާފައިވާކަަމަށް ކުރާ ތުހުމަތު ސައުދީއިން ދޮގުކުރޭ
ޚަޝޯގީ އެންމެ ފަހުން ފެނިފައި ވަނީ އޮކްޓޯބަރ މަހުގެ 2 ވަނަ ދުވަހު
ތުހުމަތު ކުރެވޭ ގޮތަށް ސައުދީގެ ނޫސްވެރިޔާ ޖަމާލް ޚަޝޯގީ އިސްތަންބޫލްގައި ހުންނަ ސައުދީ ކޮންސިއުލޭޓްގައި މަރާލާފައި ވާނަމަ "ހަރުކަށި އަދަބު" އޮންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ސީބީއެސްގެ 60 މިނިޓަށް ދެއްވި އިންޓަވިއު އެއްގައި ޓްރަމްޕް ވިދާޅުވީ އެ މައްސަލައަށް ވަރަށް ގިނަ ބައެއްގެ ސަމާލުކަން ލިބިފައިވާ ކަމަށާއި އޭގެ ސަބަބަކީ އޭނާއަކީ ރިޕޯޓަރަކަށްވުން ކަމަށް ވެދާނެކަމަށެވެ.
އަމިއްލަފުޅު ގައުމުގެ ނޫސްވެރިންނަށް ނުރުހުން ފާޅުކުރައްވާ އުޅުއްވާ ޓްރަމްޕް ވިދާޅުވީ "އަޅުގަނޑުމެން މީގެ އެންމެ ފުނަށް މި ދަނީ އަދި ހަރުކަށި އަދަބެއް އޮންނާނެ" ކަމަށެވެ.
ވައިޓް ހައުސްގައި ބުރާސްފަތި ދުވަހު ނަގާފައިވާ މި އިންޓަވިއު ސީބީއެސް އިން އާދީއްތަ ދުވަހު ދައްކާނެއެެވެ.
ސައުދީގެ ވަލީއަހުދު މުހައްމަދު ބިން ސަލްމާން އާއި ގާތްގުޅުމެއް އޮންނަ ރައީސް ޓްރަމްޕްގެ ދަނބި ދަރިކަލުން ޖެރެޑް ކުޝްނަރ ވަނީ ޚަޝޯގީ ގެއްލުމާ ބެހޭ ގޮތުން ޝާހީ އާއިލާއާ ވާހަކަ ދައްކަވާފައެވެ.
ޓްރަމްޕް ވިދާޅުވީ ސައުދީން އެ ތުހުމަތުތައް ދޮގުކުރާކަމަށެވެ.
ސައުދީ އަށް ދަތިކުރުމުގެ ފިޔަވަޅު އަޅުއްވާނެތޯ ސުވާލު ދެންނެވުމުން ޓްރަމްޕް ވިދާޅުވީ ސައުދީ އަށް ހަތިޔާރު ވިއްކުން ހުއްޓާލުމަށް ދެކޮޅުކަމަށެވެ.
"އަޅުގަނޑު ބޭނުމެއް ނުވޭ އެއްވެސް އޯޑަރެއް ގެއްލޭކަށް" ސައުދީ ސަރުކާރާ އެކު މިދިޔަ އަހަރުވީ އެތައް ބިލިއަން ޑޮލަރެއްގެ ހަތިޔާރުގެ އެއްބަސްވުމަށް އިޝާރާތްކުރައްވާ ޓްރަމްޕް ވިދާޅުވިއެވެ.
ގެއްލިގެން ހޯދަމުންދާ ނޫސްވެރިޔާ، ޖަމާލް ޚަޝޯގީ އިސްތަންބޫލްގައި ހުންނަ ސައުދީގެ ކޮންސިއުލޭޓް އޮފީހުގައި މަރާލާފައިވާ ކަމުގެ ވީޑިއޯ އާއި އޯޑިއޯ ހެކި ތުރުކީގެ އޮފިޝަލުން އަތުގައި އެބަހުރި ކަމަށް އޮފިޝަލަކު ބީބީސީ ގައި ވަނީ ބުނެފައެވެ.
ސައުދީ ސަރުކާރަށް ފާޑުކިޔާ ޚަޝޯގީ އޮކްޓޯބަރު މަހުގެ 2 ވަނަ ދުވަހު ކޮންސިއުލޭޓް އިމާރާތަށް ވަން ފަހުން ފެނިފައެއް ނުވެއެވެ.
ތަހުގީގީ ޓީމާއި ގާތް ފަރާތަކުން ބުނެފައި ވަނީ ތުރުކީގެ އިންޓެލިޖެންސްގެ އަތުގައި"ކިތާބީ ހެކި" އެބަ ހުރި ކަމަށެވެ.
ސައުދީ އަރަބިއްޔާގެ އިންޓީރިއަރ މިނިސްޓަރ ވަނީ އެ ތުހުމަތުތައް ދޮގުކުރައްވާފައެވެ.
ސައުދީގެ ރަސްމީ ނޫސް އޭޖެންސީން ބުނެފައިވާ ގޮތުގައި ޕްރިންސް އަބްދުލް އަޒީޒް ބިން ސައުދު ބިން ނާއިފް ބިން އަބްދުލް އަޒީޒް ވަނީ" މަރާލަން އަމުރުކުރި ކަމަށް ބުނާ ވާހަކަ އަކީ ދޮގެއް އަދި އަސާސެއް ނެތް ތުހުމަތުތަކެއް" ކަމަށް ވިދާޅުވެފައެވެ.
