ލަންކާގެ މަޖިލިސް އުވާލި މައްސަލަ ކޯޓަށް، އެމެރިކާ އާއި އީޔޫއިންވެސް ނިންމުން ޤަބޫލެއް ނުކުރި
11 ނޮވެމްބަރު 2018 | އާދީއްތަ 12:02ސުޕްރީމް ކޯޓަށް މައްސަލަ ލާނީ ހޯމަ ދުވަހު
ސްރީލަންކާގެ ސިޔާސީ މަސްރަހު ވަނީ ހޫނުވެފައި
ސްރީލަންކާގެ ޤާނޫނު ހަދާ މަޖިލިސް އުވާލުމަށް އެ ޤައުމުގެ ރައީސް މައިތިރިޕާލާ ސިރިސޭނާ ނިންމެވި ނިންމެވުމާއި ދެކޮޅަށް އެ ޤައުމުގެ ސުޕްރީމް ކޯޓަށް މައްސަލައެއް ހުށަހަޅަން ނިންމައިފިއެވެ.
ލަންކާގެ ބޮޑުވަޒީރު ކަމުގައި ހުންނެވި ރަނިލް ވިކްރަމަސިންގ އާއި ޚިޔާލު ތަފާތުވެ، އެމަނިކުފާނު މަޤާމުން ދުރުކުރުމަށް ސިރިސޭނާ ފައްޓަވާފައިވާ މަސައްކަތުގެ ތެރެއިން ހުކުރު ދުވަހު ސިރިސޭނާ ނިންމެވި ނިންމެވުމާއި ދެކޮޅަށް ސުޕްރީމް ކޯޓަށް ދިއުމަށް ނިންމާފައި ވަނީ ރަނިލްގެ ފަރާތުންނެވެ. ރަނިލްގެ ކެބިނެޓުގައި ފައިނޭންސް މިނިސްޓަރުގެ މަޤާމު އަދާކުރައްވާ މަންގަލަ ސަމަރަވީރަ މީޑިއާގައި ވިދާޅުވީ، ރައީސް ސިރިސޭނާގެ ނިންމެވުމަކީ "ޤާނޫނު އަސާސީގެ ދަތްޕިލައިގައި ކޮޅުފައިން ޖެހުން" ކަމަށެވެ.
ސަމަރަވީރަ އިތުރަށް ވިދާޅުވީ، ޤާނޫނު ހަދާ މަޖިލިސް އުވާލަން ނިންމި ނިންމުމާއި ދެކޮޅަށް ކޯޓަށް ދިއުމަށް ނިންމާފައިވާ ކަމަށާއި، މި ނިންމުމާއި ދެކޮޅަށް، ކޯޓާއި، ޤާނޫނު ހަދާ މަޖިލީހާއި އަދި އިންތިޚާބަކަށް ދާން ޖެހިއްޖެ ނަމަ އެ އިންތިޚާބެއްގައި ވެސް މަސައްކަތް ކުރައްވާނެ ކަމަށެވެ.
ލަންކާގެ ސުޕްރީމް ކޯޓަށް މި މައްސަލަ ހުށަހަޅައި، މައްސަލަ ފެށުމަށް ހަމަޖެހިފައިވަނީ ހޯމަ ދުވަހުއެވެ.
ޤާނޫނު ހަދާ މަޖިލިސް އުވާލެއްވުމަށް ނިންމެވިކަން ހާމަކުރެއްވުމުގެ ކުރިން ރައީސް ސިރިސޭނާ ވަނީ އިންތިޚާބަކަށް ދާއިރު އެމަނިކުފާނަށް ކަންކަން ފަހި ވާނެ ގޮތަށް ބައެއް ކަންކަން ކުރައްވާފައެވެ. އެގޮތުން ލަންކާގެ ފުލުހުން ސީދާ އެމަނިކުފާނުގެ ބެއްލެވުމުގެ ދަށަށް ގެންދަވާފައިވާއިރު، ދައުލަތުގެ މައި ޗާޕުޚާނާ އާއި ނޫސްތައް ވެސް ވަނީ ސީދާ އެމަނިކުފާނުގެ ބެއްލެވުމުގެ ދަށަށް ގެންދަވާފައެވެ. އަދި ހަމަ މިއާއި އެކު އައު ވަޒީރުންތަކެއް އައްޔަނު ކުރައްވައި، އެ ފަރާތްތަކަށް ދައުލަތުގެ ވަސީލަތްތައް ބޭނުން ކުރެއްވޭނެ އިންތިޒާމް ވެސް ވަނީ ހަމަޖައްސަވައި ދެއްވާފައެވެ.
ސުޕްރީމް ކޯޓަށް ހުށަހަޅާ މައްސަލަ ރައީސް ސިރިސޭނާގެ ނިންމެވުމާއި އެއްކޮޅަށް ނިމިއްޖެނަމަ، ލަންކާގެ ޚާއްސަ އާންމު އިންތިޚާބު އޮންނާނީ އަންނަ ޖަނަވަރީ މަހުގެ 5 ވަނަ ދުވަހުއެވެ.
ސްރީލަންކާގެ ސިޔާސީ މަސްރަހު ގޯސްވެގެން ގޮސްފައި މި ވަނީ ރައީސް ސިރިސޭނާ އާއި ބޮޑުވަޒީރު ރަނިލް އާއި ދެމެދު ސިޔާސީ ތަފާތުތައް އުފެދި، އެ މައްސަލަތައް ޒާތީ މައްސަލަތަކަކަށް ވެފައިވަނިކޮށް، ސިރިސޭނާގެ ޕާޓީއިން ރަނިލްގެ ޕާޓީ އާއި އެކު އޮތް ކޯލިޝަން އުވާލުމާއި ގުޅިގެންނެވެ. އަދި ހަމަ އެއާއި އެކު ރައީސް ސިރިސޭނާ ވަނީ އިދިކޮޅު ޕާޓީއެއްގެ ގޮތުގައި ޤާނޫނު ހަދާ މަޖިލީހުގައި އޮތް ކުރީގެ ރައީސް މަހިންދަ ރާޖަޕަކްސަގެ ޕާޓީ އާއި އެކު ކޯލިޝަން ހަދާފައި، ރާޖަޕަކްސައަށް ބޮޑުވަޒީރުގެ މަޤާމު ހަވާލުކުރައްވާފައެވެ. ނިމިގެންދިޔަ އޮކްޓޯބަރ މަހުގެ 26 ވަނަ ދުވަހުގެ ރޭ ކުއްލި ގޮތަކަށް ރާޖަޕަކްސަ ބޮޑުވަޒީރުކަމުގެ ހުވާ ކުރެއްވުމާއި ގުޅިގެން، އޭރު ބޮޑުވަޒީރު ކަމުގައި ހުންނެވި ރަނިލް ވަނީ އެކަން ޤަބޫލު ނުކުރައްވާނެ ކަމަށާއި، ރާޖަޕަކްސަ ބޮޑުވަޒީރުކަމުގެ ހުވާ ކުރެއްވި ނަމަވެސް ބޮޑުވަޒީރަކީ ރަނިލް ކަމަށާއި، ޤާނޫނު ހަދާ މަޖިލީހުގެ އަޣުލަބިއްޔަތު އޮތީ އެމަނިކުފާނަށް ކަމަށް ވިދާޅުވެފައެވެ.
ސްރީލަންކާގެ ސިޔާސީ މަސްރަހު ހޫނުވެގެން ގޮސްފައިވާ މި ދަނޑިވަޅުގައި ޤާނޫނު ހަދާ މަޖިލިސް އުވާލެއްވުމަށް ރައީސް ސިރިސޭނާ ނިންމެވުމުން، ލަންކާގައި ހުރި ޑިޕްލޮމެޓިކް އެކި މިޝަންތަކުން ވަނީ އެކަމަށް ފާޑު ކިޔާފައެވެ. ޚާއްސަކޮށް ވިލާތުގެ އިއްތިހާދާއި އެމެރިކާއިން ވަނީ މި ނިންމުމަށް ފާޑުކިޔާފައެވެ.
އެމެރިކާގެ ބިއުރޯ އޮފް ސައުތު އެންޑް ސެންޓްރަލް އޭޝިއަން އެފެއާޒުން ނެރުނު ބަޔާނެއްގައި ބުނެފައި ވަނީ ޤާނޫނު ހަދާ މަޖިލިސް އުވާލަން ނިންމި ނިންމުމަކީ އެމެރިކާ އިން ކަންބޮޑުވާ ނިންމުމެއް ކަމަށާއި، މި ނިންމުމުގެ ސަބަބުން ލަންކާގެ ސިޔާސީ މަސްރަހު އިތުރަށް ގޯސްވެގެން ގޮސްފައިވާ ކަމަށެވެ. ހަމަޖެހުން ލިބިގަތުމަށް ޑިމޮކްރަސީ އަށް އިހުތިރާމް ކުރަން ޖެހޭނެ ކަމަށް ވެސް އެމެރިކާ އިން ވަނީ ބުނެފައެވެ.
ވިލާތުގެ އިންތިހާދުގެ ފޮރިން އެފެއާޒްގެ ވެރިޔާ ފްރެޑްރިކާ މޮގަރީނީގެ ތަރުޖަމާނަކު މި މައްސަލައިގައި ވިދާޅުވީ، މި ނިންމުމަކީ ލަންކާގެ ޑިމޮކްރެޓިކް މުއައްސަސާތަކަށް އެ ޤައުމުގެ ރައްޔިތުންގެ އިތުބާރު ގެއްލި، ޤައުމުގެ ސިޔާސީ އަދި އިޤުތިޞާދީ ހާލަތު ހީނަރުވެގެންދާނެ ކަމެއް ކަމަށެވެ.
ލަންކާގެ ސިޔާސީ މަސްރަހު ހޫނުވެފައި ވަނިކޮށް ވިލާތުގެ އިއްތިހާދުން ނިމިގެންދިޔަ ހަފްތާގައި ނެރުނު ބަޔާނެއްގައި އެ އިއްތިހާދުން ވަނީ ޙައްޤުތައް ކަށަވަރުކޮށްދިނުމުގައި ސްރީލަންކާގެ ސަރުކާރު އިހުމާލުވާނަމަ އެ ޤައުމަށް މިހާރު ދީފައިވާ އިޤުތިޞާދީ ލުއިތައް އުވާލާނެ ކަމުގެ އިންޒާރު ދީފައެވެ. ވިލާތުގެ އިއްތިހާދުން ވަނީ ހަނގުރާމައަކުން އަރައިގަނެ، ޤައުމު އާރާސްތުކުރަމުންދާ މި ދަނޑިވަޅުގައި ކުރީގެ ރައީސް ރާޖަޕަކްސަގެ ސަރުކާރެއް އުފެދިގެން ދިއުމަކީ ނުރައްކާތެރި ކަމެއްގެ ގޮތުގައި ސިފަކޮށްފައެވެ.
ލަންކާގެ ސިޔާސީ މަސްރަހު ގޯސްވެފައިވާއިރު، ސިރިސޭނާ އާއި ރާޖަޕަކްސަގެ ކޯލިޝަނަށް، އަދި ރަނިލް އަށް ތާއީދުކުރާ ފަރާތްތަކުން ވެސް ދަނީ އެ ޤައުމުގައި ބޮޑު މުޒާހަރާތަކެއް ކުރަމުންނެވެ.
