މާލެއަކީ ދިރިއުޅެން ދަތި ތަނަކަށްވުމުގެ ވިސްނުން ބަދަލު ކުރާނަން: ޝަމާއު
ބޯހިޔާވަހިކަމުގެ މައްސަލަތަކަށް ހައްލު ހޯދުމުގެ މަސައްކަތް ކުރައްވާނެ ކަމަށް ވިދާޅުވި
ޝަމާއު ޝަރީފް
މާލެއަކީ ދިރިއުޅެން ދަތި ތަނަކަށްވުމުގެ ވިސްނުން ބަދަލު ކުރައްވާނެކަމަށް މާލެ ސިޓީގެ ޑެޕިއުޓީ މޭޔަރ ޝަމާއު ޝަރީފު ވިދާޅުވެއްޖެއެވެ.
މާލޭގެ ތަސައްވަރާއިބެހޭ ގޮތުން ވާހަކަ ދައްކަވަމުން ރާއްޖެޓީވީގައި ޝަމާއު ވިދާޅުވީ މާލޭގައި ވަރަށް ގިނަ މައްސަލަތައް އެބަހުރި ކަމަށާއި އެންމެ ފުރަތަމަ ބޮޑެތި މައްސަލަތަކަށް ހައްލު ލިބޭތޯ މާލޭ ސިޓީ ކައުންސިލުން މަސައްކަތް ކުރައްވާނެކަމަށެވެ. އެގޮތުން މާލޭގައި އެންމެ ބޮޑު ދަތިކަން ކުރިމަތިވާ ބޯހިޔާވަހިކަމުގެ މައްސަލަތަކަށް ހައްލު ހޯދުމުގެ މަސައްކަތް އާ ސަރުކާރުން ކުރާނެ ކަމަށް ޝަމާއު ވިދާޅުވިއެވެ.
"ހުޅުމާލޭގައި އެއަންނަނީ ވަރަށް ބޮޑަށް ޕްލޭން ކުރެވިގެން ތަރައްގީ ވެގެން. މާލެއަށް އަޅުގަނޑުމެން ބޭނުންވަނީ ރީ ޑިވެލޮޕްމެންޓް ޕްލޭނެއް. އެ ރީ ޑިވެލޮޕްމެންޓް ޕްލޭނަކީ ހަމަ މިސާލަކަށް އެމްޑީޕީގެ ވެރިކަމުގައި ވަރަށް ބޮޑަށް ސިޓީ ކައުންސިލްގެ ބައިވެރިވުމާއި އެއްކޮށް އޭރުގައި ގެނެވުނު ވެށިފަހި މާލެ ޕްރޮގްރާމް ފަދަ ޕްރޮގްރާމެއް. އޭގެން ގެންނަ ބަދަލަކީ މާލޭގައި ހުރި މައްސަލަތައް ހައްލު ކުރުމަށްޓަކައި އިތުރު ކަންތައްތަކެއް ރާވައިގެން ކުރިއަށް ގެންދިއުން،" ޝަމާއު ވިދާޅުވިއެވެ.
މުހައްމަދު އައިމަން
މާލެ ސިޓީގެ ކުރީގެ ކައުންސިލަރު މުހައްމަދު އައިމަން ވިދާޅުވީ ކުރީގެ ރައީސް މުހައްމަދު ނަޝީދުގެ ސަރުކާރުގައި މާލެ ސްމާޓް ސިޓީއަކަށް ހެދުމަށް ޔޫރަޕިއަން ޔޫނިއަން އިން 30 މިލިއަން ޔޫރޯގެ ފަންޑެއް ލިބުނު ކަމަށާއި އެހެން ނަމަވެސް އެ މަސައްކަތް ހުއްޓުނީ އޭރުގެ ސަރުކާރު ނިމި ކައުންސިލްތަކުގެ ބާރުތައް ނެގުމުން ކަމަށެވެ. މާލެ ސްމާޓް ސިޓީއަކަށް ހެދުމަށް އޭރު ކުރެވުނު ޕްލޭނާއި އެއްގޮތަށް ކަންތައްތައް ދިޔަނަމަ މާލެއަކީ ރައްކާތެރި އަމާން ތަނަކަށް ވެގެންދާނެކަމަށް އޭނާ ވިދާޅުވިއެވެ.
"އެ ބޭފުޅުން ހުށައެޅީ މާލޭގައި ހުރި ހުރިހާ ލައިޓެއް، ލެޑް ލައިޓް ސިސްޓަމަށް ބަދަލުކުރަން. ބަދަލުކޮށްލާފައި ސަރުކާރުގެ ހުރިހާ އިދާރާތަކަކުން މިދެންނެވީ ފޭސް ރިކޮގްނިޝަން ޓްރާންސްފަރ ކުރުމަށްޓަކައި ރަނގަޅު މަގެއް ހޯދަދީފައި ރައްޔިތުންނަށް ވެސް އަގުހެޔޮ ކަމާއެކީގައި އިންޓަނެޓް ސަރވިސް ޕްރޮވައިޑް ކޮށްދިނުން،" އައިމަން ވިދާޅުވިއެވެ.
