ޓާޓާ ފްލެޓްތަކުގައި މީހުން ދިރިއުޅެން ފަށައިފި
3 ޖޫން 2017 | ހޮނިހިރު 15:36ފައިސާ ދެއްކި 25 ފަރާތަކަށް ވަނީ ފްލެޓްގެ ތަޅުދަނޑި ހަވާލު ކުރެވިފައި
ކުރީގެ އަރަބީއްޔާ ހުރި ބިމުގައި ޓާޓާ އިމާރާތް ކޮށްފައިވާ ފްލެޓްތައް
ގާކޮށްޓާއި އަރަބިއްޔާ ސްކޫލް ކުރިން ހުރި ބިމުގައި އިމާރާތްކުރި ފްލެޓް ލިބުނު ބައެއް މީހުން ފްލެޓަށް ދައްކަން ޖެހޭ ޑައުންޕޭމެންޓް ދެއްކުމުން ފްލެޓްތަކަށް ވަދެވޭ ގޮތްވެއްޖެއެވެ.
ފެލްޓް ލިބުނު ބައެއް ފަރާތްތައް މިހާރު އެ ފްލެޓްތަކުގައި ދިރިއުޅެމުންދާ ކަމަށް ވިދާޅުވެފައި ވަނީ ހައުސިން ޑިވޮލޮޕެމެންޓް ކޯޕްރޭޝަން ( އެޗްޑީސީ) ގެ މޭނޭޖިންގ ޑައިރެކްޓަރު މުހައްމަދު ސައިންއެވެ.
އޭނާ މިހެން ވިދާޅުވެފައި ވަނީ ރާއްޖޭގެ ބައެއް އޮންލައިން މީޑިއާތަކަށް މައުލޫމާތު ދެއްވަމުންނެވެ. ނަމަވެސް ފްލެޓްތަކާ ގުޅޭ ގޮތުން މައުލޫމާތު ސާފް ކުރުމަށް ރާއްޖެއެމްވީން ސައިމަން އަށް މެސެޖް ކޮށް ގުޅި ނަމަވެސް އެއިން އެއްވެސް ފޯންކޯލަކަށް އަދި މެސެޖަކަށް ސައިމަން ޖަވާބު ދެއްވާފައެއް ނުވެއެވެ.
އިންޑިއާގެ ޓާޓާ ކުންފުނިން އިމާރާތް ކޮށްފައިވާ ފްލެޓްތަކާ ގުޅޭ ގޮތުން ސައިމަން ވިދާޅުވެފައި ވަނީ ގާކޮށްޓާއި އަރަބިއްޔާ ހުރި ބިމުގައި ހަދާފައިވާ ޓާޓާ ފްލެޓްތައް ލިބުނު ފަރާތްތަކުގެ ތެރެއިން 25 ފަރާތެއް އެތަން ތަނަށް ދިރިއުޅުން ބަދަލުކޮށް މިހާރު ދިރިއުޅެމުން އަންނަ ކަމަށެވެ.
ސައިމަން ވިދާޅުވެފައިވާ ގޮތުގައި މިހާރު ކުރިއަށްދާ މަރުހަލާއަކީ އިސްލާމިކް ބޭންކުން ލޯނު ހަމަޖެހި ފައިސާ ދެއްކި ފަރާތްތަކަށް ފްލެޓްތައް ރަޖިސްޓްރީ ކުރުމުގެ މަރުހަލާއެވެ. އަދި ފްލެޓްތަކުގެ ރަޖިސްޓްރޭޝަން ކަންތައް ހައުސިން މިނިސްޓްރީން ނިމެމުންދާވަރަކުން އެ ފަރާތްތަކާ ތަޅުދަނޑި ހަވާލުކުރަމުން އަންނަ ކަމަށް ސައިމަން ވިދާޅުވި އެވެ.
ފްލެޓަށް ދައްކަން ޖެހޭ ފައިސާ ދެއްކުމަށް ލޯން ހޯދުމަށް ދަތިތަކާ ކުރިމަތިލާން ޖެހިފައިވާ ފަރާތްތަކަށް ހަމަޖައްސާދީފައިވާ ލުއި ގޮތްތަކާ ބެހޭ ގޮތުން ސައިމަން ވިދާޅުވެފައި ވަނީ ފްލެޓްތަކުގައި ދިރިއުޅުމަށްޓަކައި މާލޭގައި އޮންނަ ބިން ދޫކޮށްލާ ފަރާތްތަކުގެ ބިން އެޗްޑީސީން ގަނެ، ފްލެޓަށް ދައްކަން ޖެހޭ ޖުމްލަ އަގު ކުޑަކުރުމުގެ ފުރުސަތު ހުޅުވާލައިފައިވާ ކަމަށެވެ. އަދި އެގޮތަށް އެކަން ކުރަން ބޭނުންވާ ފަރާތްތަކަކީ ކޮބައިކަން ސާފު ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ސައިމަން ވިދާޅުވީ އެޗްޑީސީން ފްލެޓްތަކާ ހަވާލުވުމަށް ފަހު، ފްލެޓްތަކުގެ ޖުމްލަ އަގު ދެ މިލިއަން ރުފިޔާއަށް ކޮންޓްރޯލްކޮށް ބޭންކް ލޯނެއްގެ ދަށުން ފްލެޓް ނަގާ ފަރާތްތަކުން މަހުން މަހަށް ފައިސާ ދައްކަން ޖެހޭވަރު ކުޑަކޮށްފައިވާ ކަމަށެވެ.
އިސްލާމިކް ބޭންކުން ލޯނެއް ނަގައިގެން ފްލެޓް ގަންނަ ނަމަ، މަހަކު ދައްކަން ޖެހޭނީ 14،000ރ. އާއި 16،000ރ.އާ ދެމެދުގެ އަދަދެއް ކަމަށް ސައިމަން ވިދާޅުވި އެވެ.
ގާކޮށްޓާއި، ކުރީގެ އަރަބިއްޔާ ސްކޫލް ހުރި ބިމުގައި ހަދާފައިވާ ފްލެޓްތަކުގެ މަސައްކަތް އެއްކޮށް ނިންމައި، އެތަނުގައި ހުރި ރީޓެއިލް ފިހާރަތައް ފިޔަވާ، އެހެން ހުރިހާ ފްލެޓްތަކެއް އިންޑިޔާގެ ޓާޓާ ކުންފުނިން ދިވެހި ސަރުކާރާއި ޙަވާލުކޮށްފައި ވަނީ މިދިޔަ އަހަރުގެ އޭޕްރީލް މަހުގެ ތެރޭގައެވެ. އަރަބިއްޔާ ހުރި އިމާރާތުގައި 90 އެޕާޓްމަންޓް އަދި ގާކޮށި ހުރި އިމާރާތުގައި 198 އެޕާޓްމަންޓް ހިމެނެއެވެ. މިއިން ކޮންމެ އެޕާޓްމަންޓެއް ވެސް ހަދާފައިވަނީ ތިން ކޮޓަރި އާއި، ދެ ފާޚަނާ އާއި އަދި އެޓޭޗްކުރެވިފައިވާ ބަދިގެއެއް ހިމެނޭ ގޮތަށެވެ.
