މަސް މާރުކޭޓުގައި  ލިބެން ހުރި މަހުގެ ބާވަތްތައް މަދުވެ، މަހުގެ އަގުތައް އިންތިހާއަށް އަރައިފި އެވެ.

މަސްމާރުކޭޓުގައި ތަކެތި ވިއްކާ ފަރާތްތަކުން ބުނީ، މަހުގެ ބާވަތްތައް ލިބުމަށް އުނދަގޫވެފައިވާ ކަމަށާއި ރަމަޟާން މަހުގެ ކުރިއަށް އޮތް ތަނުގައި މަހުގެ އަގުތައް މައްޗަށް އަރައިގެންދާނެ ކަމަށެވެ.

މަހުގެ އަގު ބޮޑުވެގެން ދިޔައީ ވިއްސާރަ ވުމުގެ ސަބަބުން މަސްވެރިކަން ދަށަށް ދިއުމާ ގުޅިގެންނެވެ. އެހެންވެ، ކަޅުބިލަމަހެއްގެ އަގު ހުރީ 250ރ. އާއި 300ރ. އާ ދެމެދުގެ އަގުތަކެއްގަ އެވެ.

ރާގޮނޑީގެ އަގު އުޅެނީ 20ރ އާއި 40ރ. އާއި ދެމެދުގެ އަގުތަކެއްގަ އެވެ. ފަރުމަސް ލިބުމުގައިވެސް ބޮޑެތި ދަތިތައް ކުރިމަތިވެފައިވާ ކަމަށް މަސް ވިއްކާ ފަރާތްތަކުން ބުނެ އެވެ. މަސް މާރުކޭޓުގައި ފަރުމަސް ހުރީ ވަރަށް މަދުންނެވެ. އަގުތަކަށް ބަލާ އިރު ކިރުޅިޔަ މަހެއްގެ އަގު އުޅެނީ، 250ރ. އާއި 350ރ. އާ ދެމެދުގެ އަގުތަކެއްގަ އެވެ.

ވަޅޯމަސް ބާޒާރުގައި ތަކެތީގެ އަގުތައް ހުރިގޮތަށް ބަލާ އިރު ވެކިއުމް މަސް އުޅެނީ 175ރ. އާއި 180ރ. އާ ދެމެދުގެ އަގުތަކެއްގަ އެވެ. ހިކި މަސް ކިލޯއެއް އުޅެނީ  80ރ. އާއި 100ރ. އާ ދެމެދުގެ އަގުތަކެއްގަ އެވެ.

މުގުރިމަސް އުޅެނީ 80ރ. އާއި 100ރ. އާ ދެމެދުގެ އަގުތަކެއްގަ އެވެ. ރިހާކުރު ބޮޑުފުޅިއެއް އުޅެނީ 280ރ. އާއި 300ރ. އާ ދެމެދުގެ އަގުތަކެއްގަ އެވެ.

ވަޅޯމަސް އުޅެނީ 110ރ. އިން 200ރ. އާ ދެމެދުގެ އަގުތަކެއްގަ އެވެ.