އިންތިޚާބީ ރައީސް ސޯލިހު އުމްރާގެ އަޅުކަން އަދާ ކުރައްވައިފި
10 ނޮވެމްބަރު 2018 | ހޮނިހިރު 06:04ރައީސް ސޯލިހުގެ މި އުމްރާ ދަތުރުފުޅުގައި ސައުދީ އަރަބިއްޔާގެ އިސްފަރާތްތަކުން ވަނީ އެމަނިކުފާނާއި ބައްދަލުކުރައްވައި މަރުހަބާ ދަންނަވާފައި
އިންތިޚާބީ ރައީސް އިބްރާހިމް މުހައްމަދު ސޯލިހު އުމްރާގެ މަތިވެރި އަޅުކަން އަދާ ކުރައްވައިފިއެވެ.
އިންތިޚާބީ ރައީސް ސޯލިހު ޢުމްރާގެ އަޅުކަމަށް ސަޢޫދީ އަށް ކުރައްވާ މި ދަތުރުފުޅުގައި ސައުދީ އަރަބިއްޔާގެ އިސް ފަރާތްތަކާއި، އޮފިޝަލުން ވަނީ އެމަނިކުފާނާއި ބައްދަލުކުރައްވައި މަރުހަބާ ދަންނަވާފައެވެ.
މި ދަތުރުފުޅުގައި ރައީސް ސޯލިޙްގެ އަނބިކަނބަލުންނާއި ރައްޔިތުންގެ މަޖިލީހުގެ ރައީސް ގާސިމް އިބްރާހީމާއި އަދާލަތު ޕާޓީގެ ނާއިބު ރައީސް އަލީ ޒާހިރާއި، ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑެ) އާއި އެމްޑީޕީގެ ޗެއަރޕާސަންގެ ކުރީގެ ނާއިބު އަލީ ޝިޔާމާއި އަލިފުށީ ދާއިރާގެ މެންބަރު މުހައްމަދު ރަޝީދާއި، ރައީސް ނަޝީދުގެ ކޮއްކޯފުޅު ނާޒިމް ސައްތާރު ވަނީ ބައިވެރިވެވަޑައިގެންފައެވެ.
ރައީސް ސޯލިޙް ވަނީ މިދަތުރުފުޅުގައި މައްކާގައި ކިޔަވަން ތިބޭ ދިވެހި ދަރިވަރުންނާއި ބައްދަލުކުރައްވާފައެވެ.
ރައީސް ސޯލިހު އުމްރާއަށް ފުރާވަޑައިގެންނެވީ މިމަހުގެ 7 ވަނަ ދުވަހެވެ. އަދި އުމްރާގެ މި ދަތުރުފުޅަށްފަހު އެނބުރި ރާއްޖެ ވަޑައިގަންނަވާނީ ހުކުރު ދުވަހުއެވެ.
