އިންތިޚާބީ ރައީސް އިބްރާހިމް މުހައްމަދު ސޯލިހު ހުވާ ކުރެއްވުމުގެ ރަސްމިއްޔާތަށް ރައީސް ޔާމީން ވަޑައިގެންނެވުމާ މެދު އަދި ގޮތެއް ނުނިންމަވާ ކަމަށް އެމަނިކުފާނުގެ ތަރުޖަމާނު އިބްރާހިމް މުއާޒު އަލީ ވިދާޅުވެއްޖެއެވެ.

އިބްރާހިމް މުހައްމަދު ސޯލިހު ހުވާ ކުރައްވާ ރަސްމިއްޔާތަށް ރައީސް ޔާމީން ވަޑައިގަންނަވާނެތޯ ރާއްޖެއެމްވީއިން ކުުރި ސުވާލަކަށް ޖަވާބު ދެއްވަމުން މުއާޒު ވިދާޅުވީ އަދި އެކަމާމެދު ޖަވާބު ދެއްވަން މާ އަވަސް ކަމަށެވެ. 

"އަދި ވަކި ގޮތެއް ނުނިންމަވާ. ތިކަމާމެދު ޖަވާބު ދޭން އަދި މާއަވަސް." މުއާޒު ވިދާޅުވިއެވެ. 

މި މަހުގެ 17 ވަނަ ދުވަހު ގައުމީ ފުޓްބޯޅަދަނޑުގައި ބޭއްވުމަށް ނިންމާފައިވާ ހުވާކުރުމުގެ ރަސްމިއްޔާތުގައި  11،500 މީހުންނަށް ދައުވަތު ދޭން ވަނީ ނިންމާފައެވެ. ހުވާ ކުރުމުގެ ރަސްމިއްޔާތު ފަށާނީ މި މަހުގެ 17 ވަނަ ދުވަހުގެ ހަވީރު 5:00 ގައެވެ.

ސޯލިހު ރައީސުލްޖުމްހޫރިއްޔާކަމުގެ ހުވާކުރައްވާ ރަސްމިއްޔާތުގައި ރައީސް ޔާމީން ބައިވެރިވެވަޑައިގެންނެވުމަކީ އިދިކޮޅު އެންމެ ބޮޑު ޕާޓީން ވަރަށް ބޮޑަށް އެދޭ ކަމެއް ކަމަށް އެމްޑީޕީން ވަނީ ބުނެފައެވެ.

މިދިޔަ ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިހާބުގައި ރައީސް ޔާމީންގެ މައްޗަށް އިބްރާހިމް މުހައްމަދު ސޯލިހު ކާމިޔާބު ހޯއްދެވީ 17 ޕަސެންޓް ވޯޓުގެ ތަފާތުންނެވެ. އިބްރާހިމް މުހައްމަދު ސޯލިހަށް ލިބިވަޑައިގެންނެވީ 134،705 ވޯޓެވެ. ރައީސް ޔާމީނަށް ލިބިވަޑައިގެންނެވީ 96،052 ވޯޓެވެ.

އިންތިހާބުގެ ނަތީޖާ ގަބޫލުނުކުރައްވައި، ނަތީޖާ ބާތިލުކުރުމަށް ސުޕްރީމް ކޯޓަށް ރައީސް ޔާމީން ވަޑައިގެންނެވުމުން  ހުކުމްކޮށްފައި ވަނީ އިންތިހާބު ބާތިލު ކުރެވެން ނެތް ކަމަށެވެ.