އެމެރިކާގެ މިޑްޓަރމް އިންތިޚާބުގެ ވޯޓުލުން ފަށައިފި

އެމެރިކާގެ މިޑްޓަރމް އިންތިޚާބުގެ ވޯޓުލުން އަންގާރަ ދުވަހު ފަށައިފިއެވެ.

ރައީސް ޑޮނަލްޑް ޓްރަމްޕްގެ ފުރަތަމަ ދައުރުގެ ބާކީ އޮތް ދެ އަހަރާ މެދު ރައްޔިތުންގެ ވިސްނުން ހުރި ގޮތް މި އިންތިޚާބުގައި އެނގިގެންދާނެއެވެ.

އަންގާރަ ދުވަހު އިންތިޚާބުގެ ވޯޓުލުން ފަށާފައިވާ އިރު އަރލީ ވޯޓިންގގައި 31 މިލިއަނަށް ވުރެ ގިނަ މީހުން ވަނީ ވޯޓްލާފައެވެ.

މިޑްޓަރމް އިންތިޚާބުގައި ހައުސް އޮފް ރެޕްރެޒެންޓޭޓިވްސްގެ 435 ގޮނޑިއާ ސެނޭޓްގެ 35 ގޮނޑި އަދި އެމެރިކާގެ 36 ސްޓޭޓާއި އެމެރިކާގެ ތިން ޓެރިޓަރީ އަށް 39 ގަވަރުނަރުން އިންތިޚާބުކުރާނެއެވެ.

އެމެރިކާގެ ގާނޫނު ހަދާ މަޖިލީހުގެ ދެ ގެ ކަމަށްވާ ސެނޭޓް އަދި ހައުސް އޮފް ރެޕްރެޒެންޓޭޓިވްސް ގައި ވެސް މި ވަގުތު އަޣުލަބިއްޔަތު އޮތީ ރައީސް ޓްރަމްޕްގެ ރިޕަބްލިކަން ޕާޓީއަށެވެ.

ޚިޔާލު ހޯދުމުގެ އެންމެ ފަހުގެ ވޯޓުތަކުން ދައްކާ ގޮތުގައި ހައުސް އޮފް ރެޕްރެޒެންޓޭޓިވްސް ނުވަތަ ތިރިގޭގައި ޑިމޮކްރޭޓުންނަން ގިނަ ގޮނޑިތަކެއް ލިބުމުގެ ފުރުސަތު ބޮޑެެވެ. ނަމަވެސް ސެނޭޓްގެ ކޮންޓްރޯލް ލިބޭނެ ކަމަށް ރިޕަބްލިކަން އިން ލަފާކުރެއެވެ.

އެމެރިކާގެ އެކި ސްޓޭޓްތަކުގައި ގަޑީގެ ތަފާތު ހުރި އިރު އެންމެ ފުރަތަމަ ވޯޓްލުން ފެށިފައި ވަނީ ވަރމޮންޓްގައި ހެނދުނު 5 ޖެހިއިރުއެވެ.

ކެލިފޯނިއާގައި ވޯޓްލުން ފެށިފައި ވަނީ ރާއްޖެ ގަޑިން މިރޭ އަށެއް ޖެހިއިރު، ކެލިފޯނިއާގެ ގަޑިން ހެނދުނު 7 ޖެހިއިރުއެވެ.

ވޯޓްލަ ގިނަ މަރުކަޒުތަކުގައި 12 ގަޑިއިރަށް ވޯޓްލުން ކުރިޔަށް ގެންދާނެއެެވެ.