ކުރީގެ ރައީސް މުހައްމަދު ނަޝީދު އައްޑޫ ސިޓީއަށް މިއަދު ވަޑައިގަންނަވާނެއެވެ.

ރައީސް ނަޝީދު ރާއްޖެ ވަޑައިގަތުމަށް ފަހު، ހޮނިހިރު ދުވަހު އެމަނިކުފާނު އައްޑޫ ސިޓީއަށް ވަޑައިގަތުމަށް ކުރިން އޮތީ ހަމަޖެހިފައެވެ. ނަމަވެސް އެ ދަތުރުފުޅު ފަސްކުރައްވާފައި ވަނީ އައްޑޫ ސިޓީއަށް ކުރަމުންދާ ވިއްސާރައާ ގުޅިގެންނެވެ. 

ރައީސް ނަޝީދުގެ ދަތުރުފުޅަކީ އުފާފާޅު ކުރުމުގެ ދަތުރުފުޅަކަށް ވާތީ، އެމަނިކުފާނަށް ހޫނު މަރުހަބާ އެއް ކިޔުމަށް އައްޑޫ ސިޓީން ދަނީ ތައްޔާރުވަމުންނެވެ.

އިނގިރޭސިވިލާތުން ހިމާޔަތް ހޯއްދަވައިގެން، ރާއްޖެ އިން ބޭރަށް އަރުވާލެވިގެން ހުންނެވި ރައީސް ނަޝީދު ރާއްޖެ އަށް ވަޑައިގެންނެވީ ދެ އަހަރާއި ނުވަ މަހާއި 14 ދުވަސް ފަހުންނެވެ. ގިނަ ދުވަސްތަކަކަށް ފަހު އެމަނިކުފާނު އެނބުރި ވަޑައިގެންނެވުމުން، ބުރާސްފަތި ދުވަހު މާލެ އިން އެމަނިކުފާނަށް ވަނީ ހޫނު މަރުހަބާ އެއް ދަންނަވާފައެވެ.

މާލެ ވަޑައިގެންނެވުމަށް ފަހު އެންމެ ފުރަތަމަ ވަޑައިގަންނަވާ ސިޓީއަކީ ވެސް އައްޑޫ ސިޓީއެވެ. އައްޑޫގެ ރައްޔިތުންގެ މެދުގައި އެމްޑީޕީއަށް ބޮޑު ތާއީދެއް އޮންނަ ރައްޔިތެއް ދިރިއުޅޭ ސިޓީއެކެވެ.