ޚަޝޯގީގެ ހަށިގަނޑު ކޮންސިއުލޭޓުން ބޭރުކޮށްފައިވަނީ ފަސް ސޫޓްކޭހުގައި!
4 ނޮވެމްބަރު 2018 | އާދީއްތަ 23:35ޚަޝޯގީގެ ކޮންސިއުލޭޓަށް ވަނުމާއެކު އޭނާގެ ކަރުގައި ހިފާ ވަނީ މަރާލާފައި
ޚަޝޯގީ ދިރިހުއްޓައި އެންމެ ފަހުން ފެނިފައި ވަނީ އޮކްޓޯބަރ މަހުގެ 2 ވަނަ ދުވަހު
ތުރުކީގެ އިސްތަންބޫލްގައި ހުންނަ ސައުދީ އަރަބިޔާގެ ކޮންސިއުލޭޓްގައި މަރާލާފައިވާ ނޫސްވެރިޔާ ޖަމާލް ޚަޝޯގީގެ ހަށިގަނޑު ބައިބައި ކުރުމަށްފަހު އެ ކޮންސިއުލޭޓުން ބޭރުކޮށްފައިވަނީ ފަސް ސޫޓްކޭހުގައި ކަމަށް ތުރުކީގެ މީޑިއާތަކުން ބުނެފިއެވެ.
ޑެއިލީ ސަބަހް ނޫހަށް ނަން ހާމަ ނުކުރުމަށް ޝަރުތުކޮށް މައުލޫމާތުދީފައިވާ އޮފިޝަލުން ބުނެފައިވަނީ އޮކްޓޯބަރު ދެވަނަ ދުވަހު ޚަޝޯގީގެ ކޮންސިއުލޭޓަށް ވަނުމާއެކު އޭނާގެ ކަރުގައި ހިފާ މަރާލުމަށްފަހު ފޮރިންސިކް އެކްސްޕާޓްގެ ޓީމަކުން ވަނީ އޭނާގެ ހަށިގަނޑު ބައިބައިކޮށްފައެވެ.
ޚަޝޯގީގެ ހަށިގަނޑު އަދިވެސް ފެނިފައިނުވާއިރު ތުރުކީގެ ތަހުގީގު ޓީމުން އަދިވެސް މަސައްކަތް ކުރަމުންދަނީ ޚަޝޯގީ ގެއްލުނު ދުވަހު ކޮންސިއުލޭޓްގައި ހިނގާދިޔަ ކަންތައްތައް އޮޅުންފިލުވަމަށާއި އޭނާ މަރާލީ ކާކުކަން ހޯދުމަށެވެ.
ޚަޝޯގީ ގެއްލިފައި ވަނީ އޮކްޓޯބަރ މަހުގެ 2 ވަނަ ދުވަހު ސައުދީގެ ކޮންސިއުލޭޓަށް ލިއުމެއް ބަލާ ދިއުމަށް ފަހުއެވެ. އޭގެ ފަހުން ކޮންސިއުލޭޓުން ނުކުމެފައި ނުވާއިރު އޭނާ މަރާލާފައިވާ ކަމަށް ތުރުކީގެ ތަހުގީގު ޓީމުން ތަކުރާރުކޮށް ބުނަމުންދިއައިރު ސައުދީން ވަނީ އޮކްޓޯބަރު މަހުގެ 20 ވަނަ ދުވަހާ ޖެހެންދެން ވެސް އެ ތުހުމަތުތައް ދޮގުކޮށްފައެވެ.
