ބޭންކް އޮފް މޯލްޑިވްސްގެ ފަރާތުން ތިން ރަށެއްގައި ސެލްފް ސަރވިސް އޭޓީއޭމް ބަހައްޓަން ނިންމައިފިއެވެ.

ބީއެމްއެލްގެ ފަރާތުން ބުނީ އޭޓީއެމް ބެހެއްޓުމަށް ނިންމާފައިވަނީ ލ.މާވަށާއި، ބ.ތުޅާދޫގެ އިތުރުން ރ.އަލިފުށީގައި ކަމަށެވެ. އަދި އެ މަސައްކަތުގެ ދަށުން އެ ތިން ރަށުގައި އޭޓީމް ބޫތުތައް އިމާރާތްކޮށްދޭނެ ފަރާތެއް ހޯދުމުގެ މަސައްކަތް ފަށާފައިވާ ކަމަށެވެ.

ބީއެމްއެލް އިން ވަނީ މީގެ 10 މަސް ކުރިން އައްޑޫގައި ކުރަމުންދާ އިންވެސްޓްމަންޓް އިތުރަށް ފުޅާކުރުމުގެ ގޮތުން ގަން އިންޓަރނޭޝަނަލް އެއަރޕޯޓާއި ހިތަދޫ ރީޖަނަލް ހޮސްޕިޓަލްގައި ދެ އޭޓީއެމް ގާއިމްކޮށްފައެވެ. ބީއެމްއެލު އިން ބުނީ، އެ އޭޓީއެމްތައް ގާއިމްކޮށްފައި ވަނީ މުޅި ރާއްޖެއަށް ބޭންކިންގެ ޚިދުމަތް ފޯރުކޮށްދިނުމަށް ބޭންކުން ކުރިއަށް ގެންދާ 300 މިލިއަން ރުފިޔާގެ އިންވެސްޓްމަންޓް ޕްރޮގްރާމްގެ ދަށުން ކަމަށެވެ.

ކަސްޓަމަރުންގެ ޚިޔާލުތަކާއި އެއްގޮތަށް އޭޓީއެމްއެމް އިން ފައިސާ ނެގޭ އަދަދާއި ޖަމާކުރެވޭ އަދަދަށް  ބީއެމްއެލް އިން ވަނީ މާރޗް އެއްވަނަ ދުވަހުން ފެށިގެން ބަދަލު ގެނެސްފައެވެ. އެގޮތުން އެންމެ ގިނަ އަދަދެއްގެ ގޮތުގައި ދުވާލަކަށް އޭޓީއެމްތަކުން 25،000ރ. ނެގޭއިރު ދުވާލަކަށް ޖަމާކުރެވޭ އަދަދަކީ 50،000 ރުފިޔާއެވެ. ކުރިން އެންމެ ގިނަ އަދަދެއްގެ ގޮތުގައި 10،000ރ. ނެގޭއިރު ފައިސާ ޖަމާކުރެވޭ އަދަދަކީ 25،000ރ. އެވެ.

ބީއެމްއެލްގެ މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 34 ބްރާންޗް، 34 ސެލްފްސަރވިސް ބޭންކިންގ ސެންޓަރ، 95 އޭޓީއެމް، 4900 ޕީއޯއެސް މަރޗަންޓުން އަދި 230 ކޭޝް އޭޖެންޓުން ހަރަކާތްތެރިވެއެވެ.