އިންތިހާބީ ރައީސް އިބްރާހީމް މުހައްމަދު ސޯލިހު، ރައީސުލްޖުމްހޫރިއްޔާ ކަމުގެ މަގާމުގެ ހުވާ ކުރުމުގެ ރަސްމިއްޔާތުގައި ބައިވެރިވުމަށް 10،000 އާއި 11،000 އާދެމެދުގެ އަދަދަކަށް މީހުންނަށް ދައުވަތު ދެއްވާނެ ކަމަށް ރައްޔިތުންގެ މަޖިލީހުން ބުނެފި އެވެ.

ރައްޔިތުންގެ މަޖިލީހުގެ އިދާރާގައި އާދިއްތަ ދުވަހުގެ ހަވީރު ބޭއްވި ނޫސްވެރިންގެ ބައްދަލުވުުގައި ވާހަކަ ދައްކަވަމުން މަޖިލީހުގެ ނައިބު ރައީސް މޫސާމަނިކު ވިދާޅުވީ އިންތިހާބީ ރައީސް އިބްރާހީމް މުހައްމަދު ސޯލިހު، ރައީސުލްޖުމްހޫރިއްޔާ ކަމުގެ މަގާމުގެ ހުވާ ކުރެއްވުމުގެ ރަސްމިއްޔާތު އިންތިހާބީ ރައީސް ބޭނުންފުޅު ވެލައްވާގޮތަށް ބޭއްވުމުގެ އިންތިޒާމު ރައްޔިތުންގެ މަޖިލީހުގެ އިދާރާއާއި އިންތިހާބީ ރައީސް ސޯލިހުގެ އޮފީހާ ގުޅިގެން މަސައްކަތް ކުރަމުންދާ ކަމަށެވެ. 

މޫސަ ވިދާޅުވީ، މިއަހަރަކީ ރާއްޖޭގެ ޖުމްހޫރިއްޔަތަށް 50 އަހަރު ފުރޭ އަހަރު ކަމަށް ވާތީ، އެ ރަސްމިއްޔާތު ވަރަށް ކުލަގަދަކޮށް ފާހަގަ ކުރުމުގެ މަސައްކަތް ވެސް އިންތިހާބީ ރައީސް ސޯލިހުއާއި މަޖިލީހުގެ އިދާރާއާ ގުޅިގެން ކުރިއަށް ގެންދާ ކަމަށެވެ. އެގޮތުން އިންތިހާބީ ރައީސް ބޭނުންފުޅުވެލައްވާ ގޮތަށް ވީހާވެސް ގިނަ ރައްޔިތުންނަށް އެ ރަސްމިއްޔާތުގައި ބައިވެރިވެވޭނެ ގޮތަށް ގަލޮޅު ރަސްމީ ދަނޑުގައި އެރަސްމިއްޔާތު ބޭއްވުމަށް ނިންމާފައިވާ ކަމަށެވެ.

މޫސަ ވިދާޅުވީ އިންތިހާބީ ރައީސް ރައީސުލްޖުމްހޫރިއްޔާ ކަމުގެ ހުވާ ކުރުމުގެ ރަސްމިއްޔާތު ހިނގަމުންދާނީ ރައްޔިތުންގެ މަޖިލީހުގެ ޖަލްސާއެއްގައި ކަމަށްވާތީ، އެ ރަސްމިއްޔާތަށް މަޖިލީހުން ދައުވަތު އަރުވަންޖެހޭ މީހުންނަށް ދައުވަތު ދެއްވާނީ މަޖިލީހުގެ އިދާރާއިން ކަމަށާއި ދެން ހުރި ޖާގަތައް ސިޔާސީ ޕާޓީތަށް ބޭނުންވާގޮތަށް ދައުވަތު އެރުވުމުގެ ކަންކަން ދޫކޮށްލައްވާނެ ކަމަށެވެ.

މޫސަ ވިދާޅުވީ ކުރީގެ ރައީސުލްޖުމްހޫރިއްޔާކަމާއި ރައީސުލްޖުމްހޫރިއްޔާގެ ނައިބުކަން ކުރެއްވި ބޭފުޅުންނަށް ދައުވަތު އެރުވުުގެ މަސައްކަތް މިހާރު ކުރައްވަމުން ގެންދަވާ ކަމަށާއި އަދި ދައުލަތުގެ އިސްވެރިންނާއި އިއްޒަތްތެރިންނަށް ވެސް ދައުލަތު އެރުވުމުގެ މަސައްކަތް ކުރައްވަމުން ގެންދަވާ ކަމަށް މޫސަ ވިދާޅުވި އެވެ.