ކުރީގެ ރައީސް މުހައްމަދު ނަޝީދު އައްޑޫ ސިޓީއަށް ކުރައްވާ ދަތުރުފުޅު އަންނަ ހަފްތާގެ އަންގާރަ ދުވަހަށް އަވަސްކުރައްވައިފިއެވެ.
އަމިއްލަފުޅަށް ރާއްޖެއިން ބޭރަށް އަރުވާލެވިގެން ހުންނެވި ރައީސް ނަޝީދު ރާއްޖެވަޑައިގަތުމަށް ފަހު، ހޮނިހިރު ދުވަހު އެމަނިކުފާނު އައްޑޫ ސިޓީއަށް ވަޑައިގަތުމަށް ކުރިން އޮތީ ހަމަޖެހިފައެވެ. ނަމަވެސް އެ ދަތުރުފުޅު ފަސްކުރައްވާފައި ވަނީ އައްޑޫ ސިޓީއަށް ކުރަމުންދާ ވިއްސާރައާ ގުޅިގެން ކަމަށެވެ.
ރާއްޖެއެމްވީއަށް މައުލޫމާތުދެމުން އެމްޑީޕީން ބުނީ ހުކުރު ދުވަހަށް ކުރިން ދަތުރު ފަސްކޮށްފައި އޮތުމަށް ފަހު އަލުން އަންގާރަ ދުވަހަށް ބަދަލުކުރެއްވީ މޫސުން ރަނގަޅުވާނެ ކަމަށް ދައްކާތީއެވެ.
ރައީސް ނަޝީދުގެ ދަތުރުފުޅަކީ އުފާފާޅު ކުރުމުގެ ދަތުރުފުޅަކަށްވާތީ، އެމަނިކުފާނަށް ހޫނު މަރުހަބާއެއް ކިޔުމަށް އައްޑޫ ސިޓީން ދަނީ ތައްޔާރުވަމުންނެވެ.
އިނގިރޭސީވިލާތުން ހިމާޔަތް ހޯއްދަވައިގެން، ރާއްޖެއިން ބޭރަށް އަރުވާލެވިގެން ހުންނެވި ރައީސް ނަޝީދު ރާއްޖެވަޑައިގެންނެވީ ދެ އަހަރާއި ނުވަ މަހާއި 14 ދުވަސްފަހުންނެވެ. ގިނަ ދުވަސްތަކަށް ފަހު އެމަނިކުފާނު އެނބުރި ވަޑައިގެންނެވުމުން، ބުރާސްފަތި ދުވަހު މާލެއިން އެމަނިކުފާނަށް ވަނީ ހޫނު މަރުހަބާއެއް ދަންނަވާފައެވެ.
މާލެ ވަޑައިގަތުމަށް ފަހު އެންމެ ފުރަތަމަ ވަޑައިގަންނަވާ ސިޓީއަކީވެސް އައްޑޫ ސިޓީއެވެ. އައްޑޫއަކީ އެމްޑީޕީއަށް ބޮޑު ތާއިދެއް ކުރާ ރައްޔިތެއް ދިރިއުޅޭ ސިޓީއެކެވެ.
