ގަލޮޅުގެ ރައްޔިތުންނާއި ކުރީގެ ރައީސް މުހައްމަދު ނަޝީދު ބައްދަލު ކުރައްވައިފިއެވެ.
ސެންޓްރަލް ޕާކް ސަރަހައްދުގައި ބޭއްވި މި ހަފުލާގައި އިންތިޚާބީ ރައީސް އިބްރާހިމް މުހައްމަދު ސޯލިހާއި އިންތިޚާބީ ނައިބު ރައީސް ފައިސަލް ނަސީމް ބައިވެރިވެވަޑައިގެންނެވިއެވެ.
އެ މަނިކުފާނު ނިސްބަތްވެވަޑައިގަންނަވާ ގަލޮޅު އަވަށުގެ ރައްޔިތުން އިންތިޒާމުކޮށްގެން ބޭއްވި މި ހަރަކާތުގައި އެ ވަށަށް ނިސްބަތްވާ ރައްޔިތުންގެ މަޖިލީހުގެ މެމްބަރުންނާއި، އެހެން ދާއިރާތަކުގެ މެމްބަރުންގެ އިތުރުން ގިނަ އަދަދެއްގެ ރައްޔިތުން ވެސް ބައިވެރިވި އެވެ.
ތިން އަހަރު ދުވަހު އިނގިރޭސި ވިލާތުން ހިމާޔަތް ހޯއްދަވައިގެން އުޅުއްވުމަށް ފަހު ބުރާސްފަތި ދުވަހު ރާއްޖެ ވަޑައިގެންނެވި ރައީސް ނަޝީދު، އެފަދަ ހަފުލާއަކުން ރައްޔިތުންނާ ބައްދަލުކުރެއްވި އެއީ ފުރަތަމަ ފަހަރެވެ.
ކްރިމިނަލް ކޯޓްގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލައިގައި، ކުރިން އުފުލާފައިވާ ދައުވާ އަނބުރާ ގެންދިއުމަށް ފަހު، އުފުލި ޓެރަރިޒަމްގެ ދައުވާ ސާބިތުވާ ކަމަށް ކަނޑައަޅައި، އެންމެ ބޮޑު އިދިކޮޅު ޕާޓީ، އެމްޑީޕީގެ ރައީސްކަމުގައި ވެސް ހުންނެވި ނަޝީދުގެ މައްޗަށް އިއްވި 13 އަހަރުގެ ޖަލު ހުކުމް ތަންފީޒު ކުރައްވަމުން ގެންދިއުމަށް ފަހު، ރާއްޖޭން ބޭރަށް ވަޑައިގެންނެވީ 2016 ވަނަ އަހަރުގެ ފެބްރުއަރީ މަހު އެވެ.
އެއަށް ފަހު ރާއްޖެ ވަޑައިނުގެން އިނގިރޭސި ވިލާތުން ހިމާޔަތް ހޯއްދެވި އެވެ.
ރައީސް ނަޝީދަށް އިއްވާފައިވާ 13 އަހަރުގެ ޖަލު ހުކުމް ތަންޒީފު ނުކުރަން އަމުރު ނެރުނީ ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް ރިޔާސީ އިންތިޚާބު ކާމިޔާބުކުރެއްވުމާއެކު، ނަޝީދުގެ މައްޗަށް އިއްވާފައިވާ ހުކުމް ތަންފީޒުކުރުން ފަސްކޮށް ދިނުމަށް ޕްރޮސިކިއުޓާ ޖެނެރަލްގެ އޮފީހުން ސުޕްރީޕް ކޯޓަށް ހުށަހެޅި މައްސަލައާ ގުޅިގެންނެވެ.
