އިންތިހާބުގެ ކަންކަން ދިޔައީ ރަނގަޅަށް ނޫން ކަމަށް ބުނެ ބަޔާން ދޭން އަދިވެސް އެބަ އަދޭސްކުރޭ: ޝަރީފު
2 ނޮވެމްބަރު 2018 | ހުކުރު 10:24އިންތިހާބުން ވަކި މީހަކު މޮޅުވީ އިލެކްޝަނުން ކުރިކަމަކުން ނޫން ކަމަށް ޝަރީފު ވިދާޅުވި
ރިޔާސީ އިންތިހާބުގެ ވޯޓު ގުނުމުގެ ކަންކަން ހިނގަމުންދަނީ: -ފޮޓޯ ރާއްޖެއެމްވީ
ނިމިގެންދިޔަ ރިޔާސީ އިންތިހާބުގެ ކަންކަން ދިޔައީ ރަނގަޅަށް ނޫން ކަމަށް ބުނެ ބަޔާން ދިނުމަށް އިލެކްޝަންސް ކޮމިޝަނުގެ ބައެއް މުވައްޒަފުންގެ ކިބައިން އަދިވެސް ބައެއް ފަރާތްތަކުން އަދޭސް ކުރަމުންދާ ކަމަށް އިލެކްޝަންސް ކޮމިޝަނުގެ ރައީސް އަހްމަދު ޝަރީފު ވިދާޅުވެއްޖެއެވެ.
ޝަރީފް އެކަން ހާމަކުރެއްވީ އޭނާ ކުރެއްވި ޓުވީޓެއްގައެވެ. އިންތިހާބުގެ ކަންކަން ދިޔައީ ރަނގަޅަށް ނޫން ކަމަށް ބުނެ ބަޔާން ދޭން އިލެކްޝަންސް ކޮމިޝަނުގެ މުވައްޒަފުންގެ ކިބައިން އާދޭސް ކުރަމުންދާ ކަމަށް މައުލޫމާތު ލިބިފައިވާ ކަމަށް ޝަރީފު ހާމަ ކުރެއްވި ނަމަވެސް އެކަން ކުރަނީ ކޮންބައެއް ކަމެއް ވިދާޅެއް ނުވެއެވެ. ނަމަވެސް ޝަރީފު ވަނީ އިންތިހާބުގެ ނަތީޖާއާ ގަބޫލު ނުކުރާ ފަރާތްތަކަށް ނުސީދާ ގޮތުން ރައްދު ދެއްވާފައެވެ. އޭނާ ވިދާޅުވީ އިބްރާހިމް މުހައްމަދު ސޯލިހް އިންތިހާބު ކާމިޔާބުކޮށް ރައީސް އަބްދުﷲ ޔާމިން އިންތިހާބުން ބަލިވީ އިލެކްޝަންސް ކޮމިޝަނުން ކުރި މަސައްކަތަކުން ނޫން ކަމަށެވެ.
ރިޔާސީ އިންތިހާބުގެ ނަތީޖާ ބާތިލް ކުރުމަށް ރައީސް އަބްދުﷲ ޔާމިން ސުޕްރީމް ކޯޓަށް ހުށައެޅުއްވި މައްސަލަ އެމަނިކުފާނާ ދެކޮޅަށް ނިމިގެން ދިޔައީ އިންތިހާބު ބާތިލް ކުރަން ޖެހޭ ފަދަ އެއްވެސް ސަބަބެއް ނެތް ކަމަށް ނިންމައެވެ.
ރިޔާސީ އިންތިހާބުގައި ރައީސް އަބްދުﷲ ޔާމިނަށް ލިބިވަޑައިގަތީ 96052 ވޯޓެވެ. އަދި އިބްރާހިމް މުހައްމަދު ސޯލިހް އިންތިހާބު ކާމިޔާބު ކުރެއްވީ 134705 ވޯޓު ހޯދައްވައިގެންނެވެ. އަދި އެ ބޭފުޅުންގެ ވޯޓުގެ ތަފާތަކީ 38653 ވޯޓު ކަމަށްވާއިރު މަކަރުހަދައިގެން ވޯޓު އޮޅުވާލަފައިވާ އެންމެ ވޯޓު ކަރުދާހެއް ވެސް މިހާތަނަށް ދެއްކިފައެއް ނުވެއެވެ.
