މަޖިލިސް ރައީސަށް ނުހޮވުނަސް ކަންބޮޑެއް ނުވޭ: އަބްދުއްރަހީމް

ރައްޔިތުންގެ މަޖިލީހުގެ ރައީސްކަމަށް ހޮވިވަޑައި ނުގަތުމަކީ އެއް ގޮތަކަށްވެސް ކަންބޮޑުވެ، މާޔޫސްވެވަޑައިގަންނަވާ ކަމެއް ނޫންކަމަށް މަޖިލީހުގެ ރައީސްކަމަށް ކުރިމަތިލައްވައި، ނާކާމިޔާބީއާއި ކުރިމަތިވެވަޑައިގެންނެވި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވެއްޖެއެވެ.

ބުރާސްފަތި ދުވަހުގެރޭ މަޖިލީހުގެ ޖަލްސާ ނިމުމުން އަބްދުއްރަހީމް ކުރެއްވި ޓްވީޓެއްގައި ވިދާޅުވީ ދިވެހި ޤައުމާއި، ޕީޕީއެމް އަދި ރައީސް ޔާމީންއަށްޓަކައި ވާން ޖެހުނު ކޮންމެ ޤުރުބާނީއެއް އޭނާ ވެވަޑައިގަންނަވާނީ ލިބިވަޑައިގަންނަވާ އުފަލެއްކަމުގައި ދެކިގެންކަމަށެވެ. އަދި އޭނާއާއި، އާއިލާ އަބަދުވެސް އޮންނާނީ ރައީސް ޔާމީނާއިއެކުގައި ސާބިތުވެކަމަށް އަބްދުއްރަޙީމްގެ ޓުވީޓްގައި ވިދާޅުވިއެވެ.

ރައްޔިތުންގެ މަޖިލީހުގެ ރައީސްކަމަށް ވާދަކުރައްވާކަން އަބްދުއްރަޙީމް އިއުލާންކުރެއްވީ މަޖިލީހުގެ ރައީސްކަމުން ފުވައްމުލަކު ދެކުނު ދާއިރާގެ މެމްބަރު އަބްދުﷲ މަސީހު މުހައްމަދު ބޭރުކުރުމަށް، މަޖިލީހުގެ މެޖޯރިޓީ މެމްބަރުން ސޮއެކުރައްވައި މަޖިލީހަށް އަނެއްކާވެސް ވެއްދުމުންނެވެ. މަސީހު މަޤާމުން ދުރުނުކުރެވެނީސް އެމަޤާމަށް އަބްދުއްރަޙީމް ވާދަކުރެއްވުމުން ޕީޕީއެމްގެ އިސް ގިނަ ފަރާތްތަކެއްގެ ފާޑުކިޔުންވެސް އަމާޒުވިއެވެ. މަޖިލީހުގެ ރައީސްކަމަށް އަބްދުއްރަޙީމް ޝައުޤުވެރިކަން ފާޅުކުރެއްވިފަހުން މަޖިލީހުގެ އިދާރާގެ ތެރޭގައި ޕީޕީއެމްގެ ޕާލަމެންޓްރީ ގްރޫޕްގެ ބައެއް މެމްބަރުންނާއި ދިމާކޮށްލައްވައި، ހަޑިހުތުރު ބަހުން މުޚާޠަބުކުރެއްވި ވީޑިއޯއެއްވެސް ވަނީ އާއްމުވެފައެވެ.

80 މެމްބަރުން ބައިވެރިވެވަޑައިގެންނެވި ވޯޓުގައި އަބްދުއްރަޙީމަށް ލިބިވަޑައިގެންނެވީ އެންމެ 16 ވޯޓެވެ. 62 ވޯޓުން މަޖިލީހުގެ ރައީސްކަމުގެ މަޤާމަށް ވަޑައިގަތީ އެމަޤާމަށް ގެނައުމަށް ގުޅިފައިވާ ޕާޓީތަކުން އެއްބަސްވި މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމްއެވެ.