ރައީސް ނަޝީދު ރާއްޖެ ވަޑައިގެންފައިވަނީ ބުރާސްފަތި ދުވަހު ހަވީރު
ރައީސް މައުމޫން އަދި ރައީސް ނަޝީދު ސަލާމް ކުރައްވަނީ
އިންތިޚާބީ ރައީސް އިބްރާހީމް މުހައްމަދު ސޯލިހުގެ ސަރުކާރު ދަމަހައްޓަން ކުރީގެ ރައީސް މުހައްމަދު ނަޝީދުގެ އެއްބާރުލެއްވުން މުހިއްމު ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
ރައީސް ނަޝީދު މާލެ ވަޑައިގެންނެވުމުން އެމަނިކުފާނަށް މަރުހަބާ ދެންނެވުމަށް ރައީސް މައުމޫން ކުރެއްވި ޓްވީޓްގައި ވިދާޅުވީ އަމިއްލަފުޅަށް އަރުވާލެއްވިގެން. ހިތާމަވެރި ދުވަސްތައް ވޭތުކުރެއްވުމަށް ފަހު ރާއްޖެ ވަޑައިގެންނެވުން މަރުހަބާ ދަންނަވާ ކަމަށެވެ.
ރައީސް ނަޝީދު ރާއްޖެ ވަޑައިގެންފައި ވަނީ ބުރާސްފަތި ދުވަހު ހަވީރެވެ. ނަޝީދަށް އިއްވާފައިވާ 13 އަހަރުގެ ޖަލު ހުކުމް ތަންޒީފު ނުކުރަން ސުޕްރީމް ކޯޓުން ވަނީ އަމުރެއް ނެރެފައެވެ. ސުޕްރީމް ކޯޓުގެ އަމުރުގައި ބުނެފައި ވަނީ ޕީޖީގެ ފަރާތުން އެ ކޯޓަށް ހުށައެޅި މައްސަލާގައި ވަކި ގޮތެއް ނިންމުމުގެ ކުރިން އެމަނިކުފާނުގެ ހުކުމާ ގުޅިގެން ދައުލަތުގެ އެއްވެސް އިދާރާއަކުން ފިޔަވަޅު ނޭޅުމަށެވެ.
ރައީސް ނަޝީދަށް ސޯޝަލް މީޑިއާ މެދުވެރިކޮށް ގިނަ ފަރާތްތަކަކުން މަރުހަބާ ދެންނެވި އިރު އެމަނިކުފާނަށް މަރުހަބާ ދެންނެވުމަށް އެތައް ހާސް ބަޔަކު މިއަދު ވަނީ މަގުތަކަށް އެއްވެފައެވެ.
