އިނގިރޭސި ވިލާތުގެ ހިމާޔަތުގައި ހުންނެވުމަށް ފަހު ކުރީގެ ރައީސް މުހައްމަދު ނަޝީދު މާލެ ވަޑައިގަތުމުގެ ކުރިން އެމަނިކުފާނުގެ އަނބިކަނބަލުން ލައިލާ އަލީ އަޅުއްވާފައިވާ ފަށުފުލުގެ ފޮޓޯއާއެކު މިނިވަންކަމުގެ "އިހުސާސްތައް" ބަންޑުން ކޮށްލައްވައިފިއެވެ.
ކޮލަމްބޯ އެއާޕޯޓްގައި ހުންނަވައި ލައިލާގެ ފަށުފުލުގައި ލައްވާފައިވާ ދޮންދޫނީގެ ފޮޓޯއެއް އެޓޭޗްކުރައްވައި ކުރައްވާފައިވާ ޓްވީޓްގައި ނަޝީދު ލިޔުއްވާފައި ވަނީ "ކަލޯ މަގެ ދޮން ދޫންޏާ މުޅިން ފިލީހޭ، ކަލޯ ކޮށީގައި އިނުމަށް ފޫހިވަނީހޭ، ކަލޯ ރުހޭހާ ގޮތަކަށް ހަދާމަދޭނަން، މިއަޑު އަހާ ދޮން ދޫންޏާ އަންނަން އުޅޭށޭ" އެވެ.
Kaloa magey dhon dhoonya mulhin fileehey,
— Mohamed Nasheed (@MohamedNasheed) November 1, 2018
Kaloa kosheega inumah foohi vaneehey,
Kaloa ruhey haagothakah hadhaa madheynan,
Mi adu ahaa dhon dhoonya annan ulheyshey pic.twitter.com/47zhSkpORV
ރައީސް ނަޝީދު 2016 ވަނަ އަހަރު ބޭސްފަރުވާއަށް ރާއްޖެއިން ބޭރަށް ފުރާވަޑައިގަތުމުން ރައީސް ޔާމީންގެ ސަޕޯޓަރުން އޭރު ޓްވީޓްކުރި މި ބަނދި، މުޅިން ތަފާތު އިހްސާސްތަކެއްގެ ގެނުވާ ގޮތަށް ރައީސް ނަޝީދު ހިއްސާ މިކުރެއްވީ، ތިން އަހަރު ރާއްޖޭން ބޭރުގައި އުޅުއްވުމަށް ފަހު ރާއްޖެ ވަޑައިގަތުމުގެ ވަގުތުކޮޅެއް ކުރިންނެވެ.
ކުރިން ގައިދީއެއްގެ ގޮތުގައި ހުންނެވި ނަމަވެސް، އެމަނިކުފާނު ރާއްޖެ ވަޑައިގަތުމުގެ ކުރިން 13 އަހަރުގެ ޖަލު ހުކުމް ތަންފީޒުކުރުން ފަސްކުރުމަށް ސުޕްރީމް ކޯޓުން ވަނީ އަމުރުކޮށްފަ އެވެ.
ރައީސް ނަޝީދު މިނިވަންކުރުމަށް ވޭތުވެދިޔަ ތިން އަހަރު ލައިލާ ވަރަށް ގިނަ މަސައްކަތްތަކެއް ކުރެއްވެވި އެވެ.
