ރޭވުމުންގެ އާ ޓްރެއިލާ: ޝާޒްގެ ތަފާތު އެކްޓިންއެއް

މިމަހުގެ 24 ވަނަ ދުވަހު ރިލީޒްކުރަން ހަމަޖެހިފައިވާ އަމްޖަދު އިބްރާހިމް(އަމްޖޭ)ގެ ފިލްމު ރޭވުމުންގެ އާ ޓްރެއިލާއެއް ނެރެފައިވާއިރު އެޓްރެއިލާއިން ޝާޒްގެ ތަފާތު އެކްޓިންއެއް ފެނިގެންދެއެވެ. މީގެ ކުރިން ޝާޒް(ތަޖޫބެ)ގެ އެކްޓިން ފެނިފައި ވަނީ މަޖާ މީހެއްގެ ރޯލެވެ.

ރޭވުމުން އަކީ މިއަހަރު ނިކުންނަ ފިލްމުތަކުގެ ތެރެއިން މޮޅު ތިން ފިލްމުގެ ތެރޭގައި ހިމެނިގެންދާނެ އެއް ފިލްމު ކަމަށް ފިލްމުގެ ޑައިރެކްޓަރ އަމްޖަދު އިބްރާހިމް (އަމްޖޭ) ވަނީ ރާއްޖެއެމްވީއަށް ބުނެފައެވެ.

މިފިލްމުގެ ކާސްޓުންނަށް ބަލާއިރު ލީޑު ރޯލުން ފެނިގެންދަނީ އަލަށް ތައާރަފްވާ ނާޖިހާ އަދި މުހައްމަދު މަނިކު އެވެ. މީގެ އިތުރުން މަރިޔަމް ޝަކީލާ، އަހުމަދު ޝާޒް (ތަޖޫބެ) އަދި ފައުޒިއްޔާ ހަސަން ރޭވުމުން އިން ފެނިގެން ދެއެވެ.

ބަޔަކު ރާވައިގެން ހިނގާ ކަންތައްތަކެއް ދައްކުވައިދޭ މި ފިލްމުގެ ޑަބިންގެ މަސައްކަތް މިހާރު ނިމިފައިވާ ކަމަށް އަމްޖޭ ވަނީ ބުނެފައެވެ. މި ފިލްމުގެ ޓިކެޓް ވިއްކުން ފަށާނީ މިމަހުގެ 10 ވަނަ ދުވަހުން ފެށިގެންނެވެ. އަމްޖޭ ބުނީ ބުކިން ހެދުމަކާއި ނުލައި ވަގުތުން ފިލްމުގެ ޓިކެޓް އޮލިމްޕަހުން މިމަހުގެ 10 ގެ ފަހުން ލިބެން ހުންނާނެ ކަމަށެވެ.