ފުވައްމުލަކުގައި ޒުވާނެއްގެ ގަޔަށް ވަޅި ހެރި މައްސަލާގައި ކުޑަ ކުއްޖަކު ހައްޔަރުކޮށްފި
31 އޮކްޓޯބަރު 2018 | ބުދަ 19:21މިމައްސަލައިގެ ތުހުމަތުގައި ހައްޔަރުކުރީ 15 އަހަރުގެ ކުއްޖެއް
ވަޅި ހަރައި ޒަހަމްކޮށްލި ޒުވާނާގެ ހާލު ސީރިއަސް
ފުވައްމުލަކުގައި ސިޓީގައި ޒުވާނެއްގެ ގަޔަށް ވަޅި ހަރައި، މާރާމާރި ހިންގި މައްސަލާގައި ކުޑަ ކުއްޖެއް ހައްޔަރު ކޮށްފިއެވެ.
ހަށިގަނޑުގެ އެކި ތަންތަނަށް ވަޅި ހަރައި ޒަހަމްކޮށްލާފައިވާ ޒުވާނާއަށް ފުވައްމުލަކު ހޮސްޕިޓަލުގައި ދަނީ ފަރުވާދެމުންނެވެ.
ފުލުހުން ބުނީ ބުދަ ދުވަހުގެ ރޭ 20:50 ހާއިރު ފުވައްމުލަކު ގެއެއްގެ ތެރޭގައި ހުރި 18 އަހަރުގެ ޒުވާނަކަށް ތޫނު އެއްޗަކުން ހަމަލާދީ ޒަހަމް ކޮށްފައިވާކަމުގެ މައުލޫމާތު ލިބިފައިވާ ކަމަށެވެ. އަދި މިމައްސަލާގެ ތުހުމަތުގައި 15 އަހަރުގެ ކުއްޖެއް ހައްޔަރުކޮށްފައިވާ ކަމަށާއި، މިމައްސަލަ އިތުރަށް ތަހުގީގު ކުރަމުންދާ ކަމަށެވެ.
ފުވައްމުލަކު ހޮސްޕިޓަލްގެ މެނޭޖަރު މުޙައްމަދު ފަރުޒާދު "ރާއްޖެއެމްއެވީ"އަށް ވިދާޅުވީ، އެ ޒުވާނާގެ ހާލު ސީރިއަސް ކަމަށާއި އޭނާގެ ބޮލަށާއި ހަށިގަނޑު އެކިތަންތަނަށް ވަޅި ހަރާފައިވާ ކަމަށެވެ. އަދި އެ ޒުވާނާގެ ހަށިގަނޑުން ލޭމަނާނުވާތީ، އޮޕަރޭޝަން ތިއޭޓަރަށް ވައްދައިގެން ފަރުވާ ދެމުންދާ ކަމަށް ފަރުޒާދު ވިދާޅުވިއެވެ.
