މީޑިއާ ކައުންސިލަށް ކުރިމަތިލުމަށް ހުޅުވާލައިފި
30 އޮކްޓޯބަރު 2018 | އަންގާރަ 06:22މިދައުރުގެ 13 މެންބަރުންގެ މުއްދަތު މިއަހަރުގެ ޑިސެންބަރު 12 ގެ ނިޔަލަށް ހަމަވާނެ
މީޑިއާ ކައުންސިލްގެ މެންބަރުން
މޯލްޑިވްސް މީޑިއާ ކައުންސިލަށް ކުރިމަތިލުމަށް ހުޅުވާލައިފިއެވެ.
ހޯމް މިނިސްޓްރީން ކޮށްފައިވާ އިއުލާނެއްގައި ބުނެފައި ވަނީ މީޑިއާ ކައުންސިލުގެ ޤާނޫނުގެ ދަށުން އެކުލަވާލެވިފައިވާ މީޑިއާ ކައުންސިލްގެ މިދައުރުގެ މެންބަރެއްގެ މުއްދަތު އޮގަސްޓު 27ގެ ނިޔަލަށް ހަމަވެފައިވާ ކަމަށެވެ. އަދި މި ދައުރުގެ 13 މެންބަރުންގެ މުއްދަތު މިއަހަރުގެ ޑިސެންބަރު 12 ގެ ނިޔަލަށް ހަމަވާތީ އެ ކައުންސިލަށް މެންބަރުން އައްޔަންކުރުމަށް ބޭނުންވާ ކަމަށެވެ. ޖުލްމަ 15 މެންބަރުން ތިބޭ އިރު އެއް މެންބަރެއްގެ ދައުރު ހަމަވާނީ ފެބްރުއަރީ މަހުއެވެ.
ހޯމް މިނިސްޓްރީން ބުނީ މީޑިއާ ކައުންސިލްގެ މަގާމުތަކަށް އެދޭ ފަރާތްތަކުން 07 ނޮވެމްބަރު ވާ ބުދަ ދުވަހުގެ 14:00 ގެ ކުރިން ފޮޓޯ އާއި ވަނަވަރު، އައިޑެންޓިޓީ ކާޑުގެ ކޮޕީ އާއި، ތަޢުލީމީ ފެންވަރު އަންގައިދޭ ލިޔުންތަކުގެ ކޮޕީ އާއި ކުށުގެ ރެކޯޑްގެ ކޮޕީއަކާ އެކު އެމިނިސްޓްރީ އަށް ސިޓީއަކުން ހުށަހެޅުމަށް އެދޭ ކަމަށެވެ. އަދި މީޑިއާގެ އަށް ގޮޑިއަށް ކެންޑިޑޭޓުން ހުށައަޅާނީ މީޑިއާތަކުން ކަމަށާއި، އެ ގޮތުން ކެންޑިޑޭޓުން ހުށައަޅާ ކޮންމެ މީޑިއާއަކުން ވެސް އެ މީޑިއާއަކުން ހުށައަޅާ ކެންޑިޑޭޓްގެ ވަނަވަރު އެނގޭ ގޮތަށް ހުށަހަޅަން ޖެހޭ ކަމަށް ވެސް ހޯމް މިނިސްޓްރީން މައުލޫމާތު ދެއެވެ.
މީޑިއާ ކައުންސިލްގައި މީޑިއާގެ އަށް މެންބަރުންނާއި އާންމުންގެ ހަތް މެންބަރުން ހިމެނެއެވެ. އާންމު މެންބަރުންގެ ގޮތުގައި ބަލާނީ މީޑިއާގައި މަސައްކަތް ނުކުރާ ފަރާތްތަކެވެ. ކައުންސިލުގެ މެންބަރުންގެ މުއްދަތަކީ މީލާދީ ދެ އަހަރެވެ. އަދި އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން ދެ ދައުރު އަދައެއް ނުކުރެވޭނެއެވެ. މީޑިއާ ކައުންސިލްގެ މެންބަރުންނަށް މަހަކު 5،000ރ. ގެ އެލަވަންސްއެއް ދޭ އިރު ގަވާއިދުގައިވާ ގޮތުން ކައުންސިލުން ބާއްވަންޖެހެނީ މަހަކު މަދުވެގެން އެއް ބައްދަލުވުމެވެ. މިހާރު އޮތް މީޑިއާ ކައުންސިލުން ހަފުތާއަކު ޖަލްސާއެއް ބޭއްވި ނަމަވެސް އިތުރު އެވެސް އެލަވަންސެއް ނުލިބެއެވެ.
މީޑިއާ ކައުންސިލަށް މެންބަރުން އިންތިޚާބުކުރުމަށް ހުޅުވާލާފައިވާ އިރު މީޑިއާ ކައުންސިލް އުވާލައި ބްރޮޑްކާސްޓިން ކޮމިޝަންއާ އެއްކޮށްލައި މީޑިއާ ކޮމިޝަނެއް އުފެއްދުމަށް މީގެ ކުރިން މަޖިލީހަށް ވެސް ހުށަހެޅިއެވެ. ނަމަވެސް މިހާތަނަށް އެ ބިލް ފާސްކޮށްފައެއް ނުވެއެވެ. ބްރޯޑްކާސްޓިން ކޮމިޝަނާއި މީޑިއާ ކައުންސިލް އެއްކޮށްލައި އެއް ފުރާޅެއްގެ ދަށަށް މަސައްކަތްތައް ގެނައުމަށް މީޑިއާ ދާއިރާގައި މަސައްކަތްކުރާ ފަރާތްތަކުން ގޮވާލަމުންދާތާ އަހަރުތަކެއް ވެއްޖެއެވެ.
