ރައީސް ނަޝީދު މާލެ ވަޑައިގަތުން: ތައްޔާރީތައް މެކުހަށް
މާލެ ވަޑައިގެންނެވުމަށް ހަމަޖެހިފައިވަނީ ނޮވެމްބަރު 1 ވަނަ ދުވަހުގެ މެންދުރު ފަހު
ކުރީގެ ރައީސް މުހައްމަދު ނަޝީދު
ނޮވެމްބަރު މަހުގެ 1 ވަނަ ދުވަހު ކުރީގެ ރައީސް މުހައްމަދު ނަޝީދު މާލެ ވަޑައިގަންނަވާތީ އެމަނިކުފާނަށް މަރުހަބާ ދެންނެވުމަށް މުޅި ރާއްޖެ ތައްޔާރު ވެއްޖެއެވެ.
އެމްޑީޕީގެ އިންޓަނޭޝަނަލް ސްޕޯކްސް ޕާސަން ހާމިދު އަބްދުލް ޣަފޫރު ކުރެއްވި ޓްވީޓެއްގައި ވިދާޅުވީ ރައީސް ނަޝީދު މާލެ ވަޑައިގެންނެވި ފަހު ދެއްވާ ތަގުރީރު ނިމިފައިވާ ކަމަށެވެ.
އެމްޑީޕީން ބުނީ ރައީސް ނަޝީދު ނޮވެމްބަރު 1 ވަނަ ދުވަހު އެމަނިކުފާނު ރާއްޖެ ވަޑައިގަންނަވާއިރު މަރުހަބާ ދެންނެވުން ކުރިއަށް ދާނީ ކަނޑުމަތީގެ އިވެންޓެއްގެ ގޮތުގައި ކަމަށެވެ. މާލޭގައި މަރުހަބާ ދެންނެވުން ކުރިއަށް ގެންދިއުމަށް ހަމަޖެހިފައި ވަނީ ޗާންދަނީ މަގުން ފެށިގެން އާޓިފިޝަލް ބީޗާ ހަމައަށް ރައްޔިތުންގެ މަޖިލިސް ބެހިފައިވާ ދާއިރާތަކުގެ ތަރުތީބުން އެ ދާއިރާތަކުގެ ރައްޔިތން އާޓިފިޝަލް ބީޗާ ހަމައަށް އެތުރިގެން ތިބޭ ގޮތަށެވެ.
އެމްޑީޕީގެ ގައުމީ މަޖިލީހުގެ މެމްބަރު އަންވަރު އިބްރާހިމް ވެސް ވިދާޅުވެފައި ވަނީ އެއާޕޯޓުން ނަޝީދު މާލެ ވަޑައިގަންނަވާއިރު ކަނޑުމަތިން އެމަނިކުފާނަށް މަރުހަބާ ދެންނެވުމަށް ވީހާ ވެސް ގިނަ ކަނޑު އުޅަނދުތައް ނެރުމުގެ ފުރުސަތު އާންމުކޮށް ހުޅުވާލާފައިވާ ކަމަށެވެ. އެކަމަށް ބޭނުންވާ ހުރިހާ އުޅަނދަކަށް ވެސް އެ ހަރަކާތުގައި ބައިވެރިވެވޭނެ ކަމަށާއި އެކަމަށްޓަކައި ހޮޓްލައިނެއް ވެސް ގާއިމް ކޮށްފައިވާ ކަމަށް އަންވަރު ވިދާޅުވިއެވެ.
ރައީސް ނަޝީދަށް މަރުހަބާ ދެންނެވުން ކުރިއަށް ދާނެ ގޮތުގެ ޗާޓެއް
މީގެ އިތުރުން ނޮވެމްބަރު މަހުގެ 1 ވަނަ ދުވަހުގެ ރޭ މަރުހަބާ ދެންނެވުމުގެ އިވެންޓްތައް ކުރިއަށް ގެންދިއުމަށް ހަމަޖެހިފައިވާ ކަމަށް އެމްޑީޕީން ބުނެއެވެ.
ރައީސް ނަޝީދު މާލެ ވަޑައިގެންނެވުމަށް ހަމަޖެހިފައި ވަނީ ނޮވެމްބަރު 1 ވަނަ ދުވަހުގެ މެންދުރު ފަހުންނެވެ.
ރައީސް ނަޝީދު މާލެ ވަޑައިގަތުމުގެ އިންތިޒާމްތައް ހަމަޖެއްސުމުގައި ސަލާމަތީ ބާރުތަކާ ވެސް މަޝްވަރާ ކުރަމުންދާ ކަމަށާއި އިންތިޒާމްތަކުގެ ފުރިހަމަ ތަފްސީލު ފަހުން ހާމަ ކުރާނޭ ކަމުގައި ވެސް އެމްޑީޕީން ބުނެއެވެ.
ރައީސް ނަޝީދު ރާއްޖެ ވަޑައިގަންނަވާ ދުވަހަށް ޚާއްސަކޮށްގެން އެމްޑީޕީން ވަނީ ޓީޝާޓެއް ވެސް ނެރެފައެވެ. އެ ޓީޝާޓަކީ ރައީސް ނަޝީދުގެ އަތްޕުޅުން ލިޔުއްވާފައިވާ ލިޔުއްވުމެއް ބޭނުންކޮށްގެން ތައްޔާރުކޮށްފައިވާ ޓީޝާޓެކެވެ. އެ ލިޔުންކޮޅުގައި ވަނީ "މިއީ ހިތާ ހިތުގެ ގުޅުމެއް" ކަމަށެވެ.
ޓެރަރިޒަމްގެ ކުށް ސާބިތުކޮށް، 13 އަހަރުގެ ޖަލު ހުކުމެއް ނަޝީދުގެ މައްޗަށް ވަނީ އިއްވާފައެވެ. ނަޝީދުގެ މައްޗަށް ކްރިމިނަލް ކޯޓުން ކުރި 13 އަހަރުގެ ޖަލު ހުކުމް މުރާޖައާ ކުރުމަށް ޕްރޮސިކިއުޓަރ ޖެނެރަލް އޮފީހުން ސުޕްރީމް ކޯޓަށް މިހާރު ވަނީ ހުށަހަޅާފައެވެ. އެމްޑީޕީން ބުނަމުންދަނީ ނަޝީދު ރާއްޖެ ވަޑައިގަންނަވާނީ މިނިވަނެއްގެ ގޮތުގައި ކަމަށެވެ.
