ބްރެޒިލްގައި އާދީއްތަ ދުވަހު ބޭއްވި ރިޔާސީ އިންތިޚާބު ކަނާތު ފިޔައިގެ ކެންޑިޑޭޓް ޖެއަރ ބޮލްސާނަރޯ ކާމިޔާބު ކުރައްވައިފިއެވެ.

ރަސްމީ ނަތީޖާ ދައްކާ ގޮތުން ބޮލްސާނަރޯއަށް 56 ޕަސެންޓް ވޯޓް ލިބިވަޑައިގެންނެވިއިރު ވާތުފިޔައިގެ މެދުމިނުގެ ކެންޑިޑޭޓް، ސައުޕޯލޯގެ ކުރީގެ މޭޔަރ އަދި ވޯކަރސް ޕާޓީގެ ފެރްނާންޑޯ ހައްދާދްއަށް ލިބިވަޑައިގެންފައިވަނީ 44 ޕަސެންޓް ވޯޓެވެ.

އިންތިޚާބުގެ ފުރަތަމަ ބުރުގަައި ބޮލްސާނަރޯ އަށް 46 ޕަސެންޓް ލިބިވަޑައިގެންފައިވާއިރު ހައްދާދަށް ލިބިވަޑައިގެންނެވީ 29 ޕަސެންޓް ވޯޓެވެ.

އަސްކަރިއްޔާގައި ކުރިން މަސައްކަތްކުރައްވާފައިވާ ބޮލްސާނަރޯއަކީ ނަސްލީ ތަފާތުކުރުންތައް ގެންގުޅުއްވާތީ ފާޑުކިޔުން އަމާޒުވެފައިވާ ބޭފުޅެކެވެ. ނަމަވެސް އޭނާއަށް ތާއީދުކުރައްވާ ފަރާތްތަކުން ދެކޭ ގޮތުގައި އޭނާއަކީ ކުށް ގިނަ އެ ގައުމު ސަލާމަތްކޮށްދޭނެ މީހާއެވެ.

އިންތިޚާބު ކާމިޔާބު ކުރެއްވުނުކަން އިއުލާނުކުރުމަށް އެގައުމުގެ ރިޔާސީ ކެނޑިޑޭޓުން އާއްމުކޮށް ބާއްވާ ނޫސްކޮންފަރެންސް، ސަލާމަތީ ސަބަބުތަކަށްޓަކައި ބޮލްސާނަރޯ ބާއްވާފައިނުވާއިރު ކާމިޔާބީ އިއުލާނުކޮށް އޭނާ ތަގުރީރުކުރައްވާފައިވަނީ ފޭސްބުކް މެދުވެރިކޮށެވެ.

ނުރައްކާތެރި ވަޅީގެ ހަމަލާއެއްގައި ސެޕްޓެމްބަރު މަހު ޒަޚަމްވެ ވަޑައިގަތުމާއެކު ބޮލްސާނަރޯއަށް ކެމްޕެއިންގައި އަމަލީގޮތުން އުޅުއްވެވުނީ މަދު ދުވަސް ކޮޅެއްގައެވެ.

ބޮލްސާނަރޯގެ ފޮޓޯޖެހި ޓީޝާރު ލައިގެންނާއި ބްރެޒިލްގެ ގައުމީ ކުލަ ކަމަށްވާ ރީނދުލާއި ފެެއްސާއިއެކު އޭނާގެ ސަޕޯޓަރުން ގެންދަނީ ވެރިރަށް ރިއޯ ޑި ޖެނީރޯގައި ހުންނަ އޭނާގެ ގެ ކައިރީގައި އުފާފާޅުކުރަމުންނެވެ.

މީގެ އިތުރުން ސައޮޕޯލޯގެ އެވެނިޑާ ޕައުލިސްޓާއަށްވެސް މީހުން ޖަމާވެ އުފާފާޅުކުރަމުންދެއެވެ.