އުރީދޫ އިން އައްޑޫސިޓީގެ ހުރިހާ ރަށްރަށަކަށް ހަލުވި ސްޕީޑާ އެކު އުރީދޫ ސުޕަރނެޓް ފިކްސްޑް ބްރޯޑްބޭންޑްގެ ހިދުމަތް ތައާރަފްކޮށްފިއެވެ.
މި ހިދުމަތް ތައާރަފްކޮށް ދެއްވައި އެ ކުންފުނީގެ ސީއީއޯ ނަޖީބު ޚާން ވިދާޅުވީ، ދުނިޔޭގެ އެކި ހިސާބުތަކުގައި ވެސް، އިޤްތިސޯދީ އަދި އިޖްތިމާއީ ކުރިއެރުން މަގުފަހިކޮށް ދިނުމުގައި، ހަލުވި ސްޕީޑުގެ ބްރޯޑްބޭންޑް އިންޓަނެޓް ކުޅެމުންދާ މުހިއްމު ދައުރު ފެންނަމުންދާ ކަމަށެވެ. ފިކްސްޑް އިންޓަނެޓްގެ ލައިސަންސް ލިބުމާ އެކު އެންމެ މުހިއްމު އެއް އަމާޒަކަށް ވެގެން ދިޔައީ ދިވެހިރާއްޖޭގެ ކޮންމެ ހިސާބެއްގައި ދިރިއުޅޭ ރައްޔިތަކަށް ވެސް، ހަލުވި ސްޕީޑުގެ ބްރޯޑްބޭންޑް އިންޓަނެޓްގެ ޚިދުމަތް ފޯރުކޮށްދިނުމަށް އޭނާ ވިދާޅުވިއެވެ. އައްޑޫ ސިޓީގެ ހުރިހާ ރަށެއްގައި ވެސް ރާއްޖޭގެ އެންމެ ހަލުވި ސްޕީޑުގެ އިންޓަނެޓުގެ ޚިދުމަތް ބޭނުންކުރުމުގެ ފުރުސަތު ހުޅުވާލެވުމަކީ، ލިބިގެން ދިޔަ ވަރަށް ބޮޑު އުފަލެއް ކަމަށް އޭނާ ވިދާޅުވިއެވެ.
މި ހިދުމަތް ތައާރަފްކުރުމަށް ފަހު އައްޑޫ ސިޓީގެ ކަސްޓަމަރުންނަށް ވަރަށް ހާއްސަ އޮފަރ އެއް އުރީދޫ އިން ވަނީ ތައާރަފްކޮށްފައެވެ. އައްޑޫގެ ރައްޔިތުންނަށް ހަލުވި ސްޕީޑުގެ އިންޓަނެޓް ހޯދުމުގައި އިތުރު ފަސޭހަ ކަމެއް ގެނެސް ދިނުމުގެ ގޮތުން، އުރީދޫ އިން ސުޕަނެޓްގެ ޚިދުމަތް ފޯރުކޮށް ދިނުމުގައި އެއްވެސް އެކްޓިވޭޝަން ފީއެއް ނުވަތަ ޑިޕޮސިޓެއް ނުހިމެނޭނެ ކަމަށް އުރީދޫ އިން ބުނެއެވެ.
މި ޕެކޭޖުތައް ވަނީ ފޭސްބުކް، ޔޫޓިއުބް، ނެޓްފްލިކްސް ފަދަ ދިވެހިންގެ މެދުގައި މަޤްބޫލް އެޕްލިކޭޝަންތަކުގެ ތަޖުރިބާ އިތުރަށް ފުރިހަމަ ކޮށްދޭ ގޮތަށް އޮޕްޓިމައިޒް ކުރެވިފައެވެ.
ސުޕަރނެޓްގެ ޚިދުމަތް ހޯދުމުގައި ކަސްޓަމަރުންނަށް އުރީދޫ އިން ވަނީ 12 މަހުގެ އިންސްޓޯލްމަންޓް ޕްލޭން އަކާއި އެކު ސުޕަރނެޓްގެ ރައުޓަރު ބައްލަވައިގަތުމުގެ ފުރުސަތު ފަހިކޮށްދީފައެވެ.
