އިތިއޯޕިއާގެ ފުރަތަަމަ އަންހެން ރައީސަކަށް ޝަލް ވަރކް ޒިއޫޑް
އިތިއޯޕިއާގެ ކެބިނެޓްގެ ދެބައިކުޅަ އެއްބަޔަކީ ވެސް އަންހެނުން
ޝަލް ވަރކް ޒިއޫޑް އެމަގާމަށް ހޮވުމަށް ގާނޫނުހަދާ މަޖިލީހުގެ ދެގޭގެ އިއްތިފާގުންވަނީ ފާސްވެފައި
އިތިއޯޕިއާގެ ފުރަތަމަ އަންހެން ރައީސް އަކަށް ޝަލް ވަރކް ޒިއޫޑް އެ ގައުމުގެ ގާނޫނުހަދާ މަޖިލީހުން ފާސްކޮށްފިއެވެ.
ދެ ގޭގެ މައްޗަށް އެކުލެވޭ އިތިއޯޕިއާގެ ގާނޫނުހަދާ މަޖިލީހުގައި ބުރާސްފަތި ދުވަހު ބޭއްވި ދެވަނަ ސެޝަންގައި ނެގި ވޯޓުގައި ހުރިހާ މެމްބަރުން ވަނީ އެކަމަނާ ހޮވުމަށް އިއްތިފާގުވެފައެވެ.
ޑިޕްލޮމޭޓެއްގެ ގޮތުގައި ކުރިން މަސައްކަތްކުރައްވާފައިވާ ޝަލް ވަރކް އެ މަގާމަށް އައްޔަން ކުރެއްވި ނަމަވެސް އެ މަގާމަކީ ރަމްޒީ މަގާމެކެވެ. މަގާމަށް އައްޔަން ކުރެއްވުމުގެ ކުރިން އެކަމަނާ މަސައްކަތް ކުރައްވާފައި ވަނީ އދ. ސެކްރެޓަރީ ޖެނެރަލްގެ ޚާއްސަ މަންދޫބެއްގެ މަގާމުގެ އިތުރުން އދ. ގެ އެފްރިކަން ޔޫނިއަން އޮފީހުގެ ވެރިއެއްގެ ގޮތުގައެވެ.
ޝަލް ވަރކް ރައީސްކަމަށް އައްޔަން ކުރައްވާފައި މިވަނީ ކުރިން އެ މަގާމުގައި ހުންނެވި މުލަޓޫ ޓެޝޯމް މަގާމުން އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވި ސަބަބެއް ސާފެއް ނުވެއެވެ. ރައީސްކަމުގެ ހަ އަހަރުގެ ދެ ދައުރު ޝަލް ވަރކް ފުރިހަމަ ކުރައްވާނެކަމަށް ބެލެވެއެެވެ.
"މުލަޓޫ އެވަނީ އުއްމީދާއި ބަދަލަށް މަގުދައްކާފައި، އޭނާ އެވަނީ ބާރުތައް އޮތް އިރުވެސް އަދި ނެތް އިރުވެސް ދިރިއުޅުން ކުރިޔަށްދާކަން ދައްކުވައިދީފައި. އަޅުގަނޑު ގޮވާލަން އެހެން ފަރާތްތަކަށް ވެސް އެ މިސާލު ދައްކަވައި ބަދަލަށް ތައްޔާރުވުމަށް" ގާނޫނު ހަދާ މަޖިލީހުގައި ބުރާސްފަތި ދުވަހު ތަގުރީރު ކުރައްވަމުން ޝަލް ވަރކް ވިދާޅުވިއެވެ.
ފަންސާސް އިންސައްތަ އަންހެނުން ހިމެނޭ ގޮތަށް އިތިއޯޕިއާގެ ބޮޑުވަޒީރު އަބީ އަހްމަދު އެކުލަވާލެއްވި ވަޒީރުންގެ އާ މަޖިލިހަށް ވެސް އެގައުމުގެ ގާނޫނު ހަދާ މަޖިލީހުގެ އިއްތިފާގުން މިދިޔަ ހަފްތާގައި ވަނީ ރުުހުންދީފައެވެ.
އެ ގައުމުގެ ސަރުކާރުން މިފަހަރު ވަނީ ޑިފެންސް މިނިސްޓަރގެ މަގާމަށް ވެސް އަންހެން ބޭފުޅަކު އައްޔަން ކުރައްވައި ގައުމުގެ އާ ރެކޯޑެއް ހަދާފައެވެ.
