މެކޮންގެ ކެބިނެޓުގެ ދެބައިކުޅަ އެއްބައިގައި ހިމެނެނީ އަންހެން ވަޒީރުން!

ފްރާންސްގެ އާ ރައީސް އިމެނުއަލް މެކޮންގެ ސަރުކާރު ހިންގުމަށް އެކުލަވާލި އާ ވަޒީރުންގެ މަޖްލީހުގެ ދެބައިކުޅަ އެއްބަޔަށް އަންހެން ވަޒީރުން ހަމަޖައްސަވައިފިއެވެ.

ފްރާންސްގެ ވެރިކަމާއި ޙަވާލުވެވަޑައިގަތުމަށްފަހު މެކޮން އެކުލަވާލި ވަޒީރުންގެ މަޖްލީހުގެ ދެބައިކުޅަ އެއްބައިގެ ގޮތުގައި އަންހެން ވަޒީރުން ހަމަޖެއްސެވީ ރިޔާސީ އިންތިޚާބުގެ ކެމްޕޭނުގައި ޖިންސުގެ ހަމަހަމަކަން ގާއިމްކުރައްވާނެ ކަމަށް ވެވަޑައިގެންނެވި ވައުދުފުޅު ފުރިހަމަ ކުރެއްވުމަށް ފެއްޓެވުމުގެ ގޮތުނެވެ.

މެކޮން އެކުލަވާލެއްވި އާ ވަޒީރުންގެ މަޖްލީހުގައި 22 ބޭފުޅަކު ހިމެނި ވަޑައިގަންނަވައެވެ. އޭގެ ތެރެއިން 11 މަޤާމަކަށް ހަމަޖައްސަވާފައި ވަނީ އަންހެން ބޭފުޅުންނެވެ.

އެގޮތުން ޑިފެންސް މިނިސްޓްރީއާ، ކުޅިވަރާއި ބެހޭ މިނިސްޓްރީއާ ލޭބަރ މިނިސްޓްރީ ފަދަ ތަންތަނަށް ހަމަޖައްސަވާފައިވަނީ އަންހެން ބޭފުޅުންނެވެ.

ސަރުކާރާއި ޙަވާލުވެވަޑައިގަތުމަށް ފަހެ މެކޮންވަނީ ކެބިނެޓު އިއުލާންކުރެއްވުން އެންމެ ފަހުވަގުތާ ޖެހެންދެންވެސް ފަސްކުރައްވާފައެވެ. އެގޮތަށް އަމަލު ކުރެއްވީ ކެބިނެޓު މަޤާމުތައް ހަވާލުކުރައްވާ ބޭފުޅުންގެ އެއްވެސް ކަހަލަ ޓެކްސެއްގެ މައްސަލައެއް ނުވަތަ އެނޫންވެސް މައްސަލައެއް އޮތްތޯ ސާފު ކުރެއްވުމަށެވެ.

ކެބިނެޓުގެ ދެބައިކުޅަ އެއްބަޔަށް އަންހެން ބޭފުޅުން ހަމަޖެއްސުމުގެ އިތުރުން ޖޫން މަހު އޮންނަ ގާނޫނު ހަދާ މަޖިލީހުގެ އިންތިޚާބަށް ނެރެން މެކޮންގެ ޕާޓީން އިއުލާންކޮށްފައިވާ ކެންޑިޑޭޓުންގެވެސް ދެބައި ކުޅަ އެއްބަޔަކީ އަންހެނުންނެވެ.

މެކޮންގެ ޕާޓީގެ ފަރާތުން ގާނޫނު ހަދާ މަޖްލީހަށް ވާދަކުރެއްވުމަށް 400 ކެންޑިޑޭޓުން ނެރުއްވާއިރު، 200 ކެންޑީޓުންނަކީ އަންހެންނެވެ.

މެކޮންގެ ކުރިން ފްރާންސްގެ ރައީސްކަމުގައި ހުންނެވި ފްރާންސްވާ އޮލެންޑާ 2012 ވަނަ އަހަރު އިއުލާން ކުރެއްވި 34 މެންބަރުންގެ ކެބިނެޓުގައި 17 އަންހެން ބޭފުޅުން ހިމަނުއްވާފައިވެއެވެ.

ވަޒީރުންގެ ގޮތުގައި އަންހެނުން އެންމެ ގިނަ ގައުމުތަކުގެ ލިސްޓުގެ ކުރީގައި ފްރާންސް ހިމެނެ އެވެ.