ޚަޝޯގީ މަރާލާފައިވަނީ ކުރިން ރޭވިގެން ކަމަށް ސައުދީގެ ޕްރޮސިކިއުޓަރވެސް ވިދާޅުވެއްޖެ
25 އޮކްޓޯބަރު 2018 | ބުރާސްފަތި 17:58ސައުދީންވަނީ އެތައްފަހަރެއްގެ މަތިން ވާހަކަތައް ބަދަލުކޮށްފައި
ޚަޝޯގީ ދިރިހުއްޓާ އެންމެފަހުން ފެނިފައިވަނީ އޮކްޓޯބަރ މަހުގެ 2 ވަނަ ދުވަހު
އިސްތަންބޫލްގައި ހުންނަ ސައުދީ ކޮންސިއުލޭޓްގައި ނޫސްވެރިޔާ ޖަމާލް ޚަޝޯގީ މަރާލާފައިވަނީ ކުރިން ރޭވިގެންކަމަށް ސައުދީ އަރަބިއާގެ ޕަބްލިކް ޕްރޮސިކިއުޓަރ ވެސް ވިދާޅުވެއްޖެ ކަމަށް ސައުދީގެ ދައުލަތުގެ މީޑިއާއާއި ހަވާލާދީ ރޮއިޓަރސް އަދި އޭއެފްޕީން ރިޕޯޓްކޮށްފިއެވެ.
"ތުރުކީގެ އިދާރާތަކުން ދިން މައުލޫމާތުން ދައްކަނީ ޚަޝޯގީގެ މައްސަލައިގައި ތުހުމަތުކުރެވޭ ފަރާތްތައް އެކަންކޮށްފައިވަނީ ކުރިއާލައި ރާވައިގެން" ސައުދީ ޕްރެސް އޭޖެންސީން ގެނެސްދީފައިވާ ޕަބްލިކް ޕްރޮސިކިއުޓަރ ޖެނެރަލްގެ ބަޔާނުގައިވެއެވެ.
"ޕަބްލިކް ޕްރޮސިކިއުޝަނުން ތުހުމަތު ކުރެވޭ ފަރާތްތަކާމެދު މިދަނީ ތަހުގީގު ކުރިޔަށް ގެންދަމުން ...ކޯޓަށް ހުށަހެޅުމަށް ފުރިިހަމަ ކުރުމަށް"
ޖޮއިންޓް ސައުދީ ޓަރކިޝް ޓާސްކްފޯސްއިން ދީފައިވާ މައުލޫމާތަށްބަލައި ޕްރޮސިކިއުޓަރުން ގެންދަނީ ތުހުމަތު ކުރެވޭ ފަރާތްތަކާ ސުވާލުކުރަމުންކަމަށް ސައުދީގެ ޕަބްލިކް ޕްރޮސިކިއުޝަނުން ބުނެފައިވާކަމަށްވަނީ ރިޕޯޓްކޮށްފައެވެ.
ސައުދީ ޕްރެސް އޭޖެންސީން ބުރާސްފަތި ދުވަހު ރިޕޯޓްކޮށްފައިވާގޮތުގައި އެ ގައުމުގެ އިންޓެލިޖެންސް އިދާރާއާށް ބަދަލުތައް ގެނައުމަށް އެކުލަވާލާފައިވާ ކޮމިޓީގެ ފުރަތަމަ ބައްދަލުވުމަށް ވަލީއަހުދު މުހައްމަދު ބިން ސަލްމާންވަނީ ފުރަތަމަ ފަހަރަށް ވަޑައިގެންފައެވެ.
ޚަޝޯގީގެ މަރާގުޅިގެން ވަލީ އަހުދުގެ ބާރުތައް މުއައްސަސާތަކުގައި އޮތްވަރު ބެލުމަށް ރަސްގެފާނު ސަލްމާން ބިން އަބްދުލް އަޒީޒުވަނީ އަންގަވާފައެވެ.
ސީއައިއޭގެ ކުރީގެ ޑިރެކްޓަރ ޖޯން ބްރެނަން ވިދާޅުވެފައިވަނީ ކަޝޯގީ މަރާލުމުގެ ކުރިން އެ ޕްލޭން ވަލީއަހުދު މުހައްމަދު ބިން ސަލްމާނަށް އެނގިވަޑައި ގަންނަވާނެކަމާމެދު "ޝައްކެއްވެސް ނެތް" ކަމަށެވެ.
ބުދަ ދުވަހު ވަގުތުން ގެނެސްދިން އިވެންޓެއްގައި ބްރެނަންވަނީ މި މަރު ކުށްވެރިކުރަމުންދާ ބައިނަލްއަގްވާމީ އެކިފަރާތްތަކުގެ ތެރޭގައި ހިމެނިވަޑައިގެންފައެވެ.
ޚަޝޯގީ ގެއްލިފައިވަނީ އޮކްޓޯބަރ މަހުގެ 2ވަނަ ދުވަހު ސައުދީގެ ކޮންސިއުލޭޓަށް ލިއުމެއް ބަލާ ދިއުމަށްފަހުއެވެ. އޭގެ ފަހުން ކޮންސިއުލޭޓުން ނުކުމެފައިނުވާއިރު އޭނާ މަރާލާފައިވާކަމަށް ތުރުކީގެ ތަހުގީގު ޓީމުން ތަކުރާރުކޮށް ބުނަމުންދިއައިރު ސައުދީންވަނީ އޮކްޓޯބަރު މަހުގެ 20 ވަނަ ދުަވަހާ ޖެެހެންދެންވެސް އެ ތުހުމަތުތައް ދޮގުކުރަމުންނެވެ.
