އުތުރު ކޮރެއާ އަށް ދަތުރުކުރާ އެމެރިކާގެ ރައްޔިތުންގެ ވަޞިއްޔަތެއް އޮތްނަމަ އެކަން ފުރިހަމަކޮށް، ޖަނާޒާގެ ކަންކަން ހަމަޖެއްސުމަށްފަހުގައި ނޫނީ ދަތުރު ނުފެށުމަށް އެމެރިކާ އިން އިލްތިމާސްކޮށްފި އެވެ.

އެމެރިކާގެ ޚާރިޖިއްޔާ ވުޒާރާއިން މިމަހުގެ 10 ވަނަ ދުވަހު ނެރެފައިވާ ޓްރެވެލް އެޑްވައިޒަރީ ވަނީ، އުތުރު ކޮރެއާ އަށް ދަތުރުކުރާ އެމެރިކާގެ ރައްޔިތުން ދަތުރަށް ފުރުމުގެ ކުރިން ޖަނާޒާގެ ކަންކަން ހަމަޖެއްސުމަށާއި، އެމީހުންނަށް ބަލަދުއަރާ އަނބިން ނުވަތަ ފިރިން އަދި ދަރިންނާއި ގެންގުޅޭ ޖަނަވާރުތަކުގެ ބަލަދުވެރިކަން ހަވާލުވާނެ މީހެއް ކަނޑައަޅަން ޖެހޭނެ ކަމަށެވެ.

އުތުރު ކޮރެއާ އަށް ދަތުރު ކުރުމަށް ބޭނުންވާ އެމެރިކާގެ ރައްޔިތުންނަށް ޙާއްސަކޮށް އެމެރިކާގެ ޚާރިޖިއްޔާ އިން މިދިޔަ އަހަރު ހަދާފައިވާ ގަވާއިދުތަކުގެ އިތުރުން، އަލަށް އެކުލަވާލި ގަވާއިދުގެ ދަށުން އުތުރު ކޮރެއާ އަށް ދަތުރުކުރުމަށް ބޭނުންވާ އެމެރިކާގެ ރައްޔިތުންނަށް ދޫކުރާ ހާއްސަ ހުއްދަ ހޯދުމުގައި ބަލާ މިންގަނޑު ހަރުކަށި ކޮށްފައިވެއެވެ.

އެމެރިކާގެ ސްޓޭޓް ޑިޕާޓްމަންޓްގެ ވެބްސައިޓްގައި ޝާއިއުކޮށްފައިވާ އުތުރު ކޮރެއާ އާ ގުޅޭ އައު ޓްރެވެލް އެޑްވައިޒަރީގައިވާ ގޮތުން، އުތުރު ކޮރެއާ އަށް ދަތުރު ކުރުމަށް ބޭނުންވާ ހާއްސަ ހުއްދަ ލިބިއްޖެނަމަ، ދަތުރުގެ ކުރިން ފުރިހަމަ ކުރަން ޖެހޭ އިޖުރާއަތު ތަކުގެ ތެރޭގައި އެންމެ ފަހުގެ ވަޞިއްޔަތް ކުރުމާއި، އިންޝުއަރެންސް ފަދަ ކަންކަމުގައި މަންފާކުރާނެ ބަޔަކު ކަނޑައަޅައި ޕަވަރ އޮފް އެޓަރނީ ދޭނެ ފަރާތެއް ކަނޑައެޅުމާއި، ދަރިންނާއި ބަލަދުވެރިން އަދި ކުއްތާ ފަދަ ގޭގައި ގެންގުޅޭ ޖަނަވާރުތަކާއި ހަވާލުވާނެ ފަރާތެއް ކަނޑައެޅުމާއި ގުޅޭ ގޮތުން އާއިލާގެ މެމްބަރުންނާއި މަޝްވަރާކޮށް ގޮތެއް ނިންމުމަށާއި، ގެދޮރާއި މުދާ އަދި ފަސޭހައިން ފައިސާ އަށް ބަދަލުނުކުރެވޭ މުދަލާއިމެދު ގޮތެއް ނިންމަން ޖެހޭނެ ކަމަށެވެ.

އެމެރިކާގެ ރައްޔިތުން އުތުރު ކޮރެއާ އަށް ދަތުރު ކުރުމަށް ހަރުކަށި ގަވާއިދުތަކެއް ހަދާފައިވަނީ، ޗުއްޓީ ހޭދަކުރުމަށް އުތުރު ކޮރެއާގެ ވެރިރަށް ޕިޔޮންގޔަންގަށް ދަތުރުކުރި އެމެރިކާގެ 22 އަހަރުގެ ދަރިވަރެއް ކަމަށްވާ އޯޓޯ ވާމްބިއާ އުތުރު ކޮރެއާ އިން ހައްޔަރުކޮށް، 15 އަހަރުގެ ބުރަ މަސައްކަތަށް ހުކުމް ކުރުމަށްފަހު ދޫކޮށްލުމާއެކު މަރުވި ހާދިސާ އަށްފަހުއެވެ. އޭނާ މަރުވެފައިވަނީ މިދިޔަ ހޫނު މޫސުމުގައި އެނބުރި ގައުމަށް ދިޔަތާ ދުވަސްކޮޅެއްގެ ތެރޭގައި ގޮތް ނޭނގޭ ކޯމާ އަކަށް ދިޔުމަށްފަހު އެވެ.

އެމެރިކާގެ ޚާރިޖިއްޔާގެ އިންޒާރުގައި، އުތުރު ކޮރެއާގައި އެމެރިކާގެ އެމްބަސީ އެއް ނެތުމާއެކު އެގައުމަށް ދަތުރުކުރާ އެމެރިކާގެ ރައްޔިތުންނަށް ދިމާވާ ކުއްލި ހާލަތްތަކުގައި އެހީތެރިކަން ފޯރުކޮށްދިނުމުގެ ފުރުޞަތު ނެތުމާއެކު، ދިމާވެދާނެ އެންމެ ނުރައްކާތެރި ހާލަތަކަށް ތައްޔާރުވެގެން ތިބުމަށް ދަތުރުވެރިންނަށް އިލްތިމާސް ކޮށްފައިވެއެވެ.

ވާމްބިއާގެ މަރުގެ ސަބަބަކީ އުތުރު ކޮރެއާގެ ލީޑަރު ކިމް ޖޮންގ އުންގެ "ގޮތެއްފޮތެއްނެތް"، އަނިޔާވެރި ވެރިކަން ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ވަނީ އުތުރު ކޮރެއާ އަކީ ޓެރަރިޒަމަށް ވާގިވެރިވާ ދައުލަތެއްގެ ގޮތުގައި މިދިޔަ ނޮވެމްބަރު މަހު ކަނޑައަޅާފައެވެ.

މީގެ އިތުރުން އެމެރިކާގެ ޚާރިޖިއްޔާ އިން ވަނީ ދަތުރު ނުކުރުމަށް އިލްތިމާސް ކުރާ (ލެވެލް 4) ގެ ގައުމުތަކުގެ ލިސްޓުގައި އުތުރު ކޮރެއާ ހިމަނާފައެވެ. އެލިސްޓުގައި އުތުރު ކޮރެއާގެ އިތުރުން ދެން ހިމެނެނީ އިރާގާއި އިރާން، އަފްޣާނިސްތާން، ސީރިއާ، މާލީ، ޔަމަން އަދި ލީބިއާގެ އިތުރުން ސޯމާލިއާ އެވެ.

މިދިޔަ އަހަރުގެ ސެޕްޓެމްބަރު މަހުގެ 1 ވަނަ ދުވަހުން ފެށިގެން އުތުރު ކޮރެއާ އަށް ދަތުރު ކުރުމަށް ބޭނުންވާ އެމެރިކާގެ ރައްޔިތުންނަށް އެމެރިކާ ޕާސްޕޯޓުގައި އެގައުމަށް އެތެރެވުން އެމެރިކާގެ ޚާރިޖިއްޔާ އިން ވަނީ މަނާކޮށްފައެވެ. އަދި އެގައުމަށް ދަތުރު ކުރުމަށް ބޭނުންވާ އެމެރިކާގެ ރައްޔިތުންގެ ތެރެއިން އެމެރިކާގެ ޚާރިޖިއްޔާ އިން ކަނޑައަޅާފައިވާ ޝަރުތުތައް ފުރިހަމަވާ ފަރާތްތަކަށް އުތުރު ކޮރެއާގެ އެއް ދަތުރަށް ހާއްސަ ޕާސްޕޯޓެއް ދޫކުރާނެ ކަމަށާއި، އެހެންނަމަވެސް އެ ހުއްދަ ލިބޭނީ ވަރަށް މަދު ހާލަތެއްގައި ކަމަށް ޚާރިޖިއްޔާ އިން މިދިޔަ އަހަރު ނެރެފައިވާ އަމުރުގައިވެއެވެ. އެއަމުރާއި ޚިލާފަށް އެމެރިކާ ސަރުކާރުގެ ހާއްސަ ހުއްދައެއް ނެތި، އެގައުމުގެ ޕާސްޕޯޓުގައި އުތުރު ކޮރެއާ އަށް ދަތުރުކުރާ ފަރާތްތަކާއި ދެކޮޅަށް ޕާސްޕޯޓް ނުހަމަ ގޮތުގައި ބޭނުން ކުރުމުގެ ކުށުގައި ޕާސްޕޯޓް ކެންސަލްކޮށް، ކަމާއި ގުޅޭ ގާނޫނުތަކުގެ ދަށުން ދައުވާ ކުރާނެ ކަމަށް އެއަމުރުގައިވެއެވެ.

އުތުރު ކޮރެއާ އަށް ދަތުރު ކުރުމަށް ބޭނުންވާ ފަރާތްތަކަށް ހާއްސަ ހުއްދަ ދޫކުރާނީ ގައުމީ މަސްލަހަތާއި ގުޅޭ ކަންކަމުގައި ކަމަށް ކަނޑައަޅައި، އެއަމުރުގައި އެ ހުއްދަ ދިނުމުގައި ބަލާނެ 4 ކަމެއް ހިމަނާފައިވެއެވެ. އެއީ، ނޫސްވެރިޔަކަށް ނުވަތަ ރިޕޯޓަރަކަށް ވުމާއި، ދަތުރުގެ މަގްސަދަކީ އުތުރު ކޮރެއާ އާ ގުޅޭ މައުލޫމާތު ހޯދައި އެމައުލޫމާތު އާއްމު ކުރުމަށް ކުރާ ދަތުރަކަށް ވުން ނުވަތަ، ދަތުރުކުރާ ފަރާތަކީ ރެޑް ކްރޮސްގެ މިޝަން އެއްގައި ކޮރެއާ އަށް ދަތުރު ކުރުމަށް ބޭނުންވާ އިންޓަރނޭޝަނަލް ކޮމިޓީ އޮފް ދަ ރެޑް ކްރޮސް ނުވަތަ އެމެރިކަން ރެޑް ކްރޮސްގެ މެމްބަރަކަށްވުން، ނުވަތަ، އިންސާނީ އެހީ ފޯރުކޮށްދިނުމަށް ކުރާ ދަތުރެއް ކަމުގައި ސާބިތު ކޮށްދިނުމުގެ އިތުރުން އެދަތުރަކީ އެމެރިކާގެ ގައުމީ މަސްލަހަތު ހިމެނޭ ދަތުރަކަށް ވުމެވެ.