ރިޔާސީ އިންތިޚާބުގެ ފަހުން އީސީ ޝަރީފު ފުރަތަމަ ފަހަރަށް ރާއްޖެއިން ބޭރަށް
24 އޮކްޓޯބަރު 2018 | ބުދަ 05:06ޝަރީފު ވަޑައިގެންނެވީ ސްރީލަންކާއަށް
އިލެކްޝަންސް ކަމިޝަންގެ ރައީސް އަހުމަދު ޝަރީފް
ނިމިދިޔަ ރިޔާސީ އިންތިޚާބަށް ފަހު ފުރަތަމަ ފަހަރަށް އިލެކްޝަންސް ކަމިޝަންގެ ރައީސް އަހުމަދު ޝަރީފް ރާއްޖެއިން ބޭރަށް ފުރާވަޑައިގެންފިއެވެ.
އެނގިފައިވާ ގޮތުގައި ޝަރީފު ރާއްޖެއިން ބޭރަށް ވަޑައިގެންނެވީ ބޭސްފަރުވާއަކަށް ސްރީލަންކާއަށެވެ. ޝަރީފު ކުރައްވާފައިވާ ޓްވީޓެއްގައި ވިދާޅުވީ ރާއްޖެއިން ބޭރަށް ވަޑައިގެންފައިވާ ކަމަށެވެ.
ރިޔާސީ އިންތިޚާބުގެ ނަތީޖާ ގަބޫލު ނުކޮށް ޕީޕީއެމުން ބާއްވަމުންދާ މުޒާހަރާތަކުގައި އެޕާޓީގެ މެމްބަރުން ގެންދަވަނީ އިންތިޚާބު އޮޅުވާޅާފައިވާ ކަމަށް ބުނެ ޝަރީފަށް ފާޑު ކިޔަމުންނެވެ. ޝަރީފްގެ ޓްވީޓްގައި ރައީސް އޮފީހުގެ ތަރުޖަމާން އިބްރާހިމް މުއާޒް އަލީ ޓެގް ކުރެއްވުމަށް ފަހު ވިދާޅުވެފައިވަނީ "ރާއްޖެ އިން ބޭރުގައި ހުރި ވާހަކަ މަ ހޯދާ މަންޖެ ކައިރީ ބުނެލާތި"އެވެ.
މީގެ ކުރިން ޝަރީފު ފިޔަވައި އީސީގެ ދެން ތިއްބެވި މެމްބަރުންވަނީ ރިޔާސީ އިންތިޚާބަށް ފަހު ލިބިލެއްވި މަރުގެ އިންޒާރުތަކާއި ގުޅިގެން ރާއްޖެއިން ބޭރަށް ވަޑައިގަންނަވާފައެވެ. އެ މެމްބަރުން މިހާރު ވަނީ އަނބުރާ ރާއްޖެ ވަޑައިގެންފައެވެ.
ޝަރީފު ރާއްޖެއިން ބޭރަށް ވަޑައިގެންނެވި އިރު ރިޔާސީ އިންތިހާބުގައި ބޮޑެތި އޮޅުވާލުންތަކާއި މަކަރުތައް ހަދާފައިވާ ކަމަށް އިލެކްޝަންސް ކޮމިޝަންގެ މައްޗަށް ޕީޕީއެމުން ބޮޑެތި ތުހުމަތުތަކެއް ކޮށްފައިވެއެވެ. ރިޔާސީ އިންތިހާބު ބާތިލު ކުރުމަށް ރައީސް ޔާމީން ސުޕްރީމް ކޯޓަށް މައްސަލަ ވެސް ހުށައެޅިއެވެ.ނަމަވެސް އިންތިހާބު ބާތިލު ކުރަން ނުޖެހޭ ކަމަށް ސްޕްރީމް ކޯޓުން ވަނީ ހުކުމް ކޮށްފައެވެ.
