އެޗްއާރްސީއެމުން ދޫނިދޫ ޖަލުގެ ހާލަތު ބެލުމަށް ޒިޔާރަތެއް ކޮށްފި
24 އޮކްޓޯބަރު 2018 | ބުދަ 14:47ޒިޔާރަތް ކުރީ ޖަލުގައި އަނިޔާވެރި ލާއިންސާނީ ނުވަތަ ދަށުދަރަޖައިގެ އަމަލެއް ހިނގާތޯ ބެލުމަށް
އެޗްއާރްސީއެމްގެ ރައީސް އައިމިނަތު އީނާސް
ހިއުމަން ރައިޓްސް ކޮމިޝަނުގެ ނޭޝަނަލް ޕްރިވެންޓިވް މެކޭނިޒަމް (އެން.ޕީ.އެމް) އިން ކ.ދޫނިދޫ ޕޮލިސް ކަސްޓޯޑިއަލް ޒިޔާރަތެއް ކޮށްފިއެވެ.
އެޗްއާރްސީއެމުން ބުނީ އާދިއްތަ ދުވަހު ކުރި މިޒިޔާރާތުގެ މައިގަނޑު މަގްސަދަކީ ތަހުގީގަށް ބަންދުކުރެވޭ މީހުން ބަންދުގައި ބައިތިއްބާ އިރު އެމީހުންނާއި ދޭތެރޭ އަނިޔާވެރި ލާއިންސާނީ ނުވަތަ ދަށުދަރަޖައިގެ އަމަލެއް ހިނގާތޯ ބެލުމަށާއި، ދައުލަތުގެ ބެލުމުގެދަށުގައި ބައިތިއްބާފައި ތިބޭ މީހުންނަށް ލިބިދީފައިވާ އިންސާނީ ހައްގެއް ގެއްލޭފަދަކަމެއް ހިނގާތޯބަލައި މިނިވަންކަން ގެއްލޭގޮތަށް ބަންދުގައި ބައިތިއްބާ މީހުންގެ އާންމު ހާލަތާއި، މުވައްޒަފުންގެ ހާލަތު ދެނެގަތުން ކަމަށެވެ.
އެޗްއާރްސީއެމުން ބުނީ ކޮމިޝަނުން އާންމުކޮށް އަމަލު ކުރަމުންދާ އުސޫލުގެ މަތިން މިޒިޔާރަތުގައި ފާހަގަ ކުރެވުނު މުހިންމު ކަންކަމުގެ މައްޗަށް އެކުލަވާލާ ރިޕޯޓު، ދޫނިދޫ ޕޮލިސް ކަސްޓޯޑިއަލް އަށާއި، މޯލްޑިވްސް ޕޮލިސް ސަރވިސް އަދި ކަމާގުޅޭ އެހެނިހެން އިދާރާތަކާ ހިއްސާކުރާނެ ކަމަށެވެ.
އަދި ކޮމިޝަނުގެ ރިޕޯޓުގައި ފާހަގަ ކޮށްފައިވާ ކަންކަމާއި، އިސްލާހު ކުރުމަށް ހުށަހަޅާފައިވާ ހުށައެޅުންތަކާ ގުޅޭގޮތުން މޯލްޑިވްސް ޕޮލިސް ސަރވިސް އާއި ބައްދަލުކޮށް، މިރިޕޯޓުގެ ހުށައެޅުންތައް ތަންފީޒުވަމުންދާ މިންވަރު ދެނެގަތުމަށް ލިޔުމުން އަހަރަކު ދެފަހަރު ފޮލޯއަޕް ހެދުމަށް ކޮމިޝަނުން ވަނީ ކަނޑައަޅާފައިވާ ކަމަށް ވެސް އެޗްއާރްސީއެމުން މައުލޫމާތުދެއެވެ.
