އަފްރާޝީމާއި ރިލްވާން އަދި ޔާމީންގެ ތަހުގީގަށް އެހީތެރިކަން ފޯރުކޮށްދޭން ތައްޔާރަށް ހުންނެވި ކަމަށް އުގައިލް ވިދާޅުވެއްޖެ
ލަޔާގަތާއި ގާބިލިއްޔަތުކަން ހުރި މިންވަރަކަށް އެހީތެރިކަން ފޯރުކޮށްދޭނަން
ޕްރޮފެސަރ އުގައިލް: އުގައިލްގެ ފޭސް ރިކޮގްނިޝަން ޓެލްނޮލޮޖީ ބޭރުގެ ގައުމުތަކުން ވެސް ގެންދަނީ ބޭނުންކުރަމުން
އަވަހާރަކޮށްލާފައިވާ ދީނީ އިލްމުވެރިޔާ ޑރ. އަފްރާޝީމް އަލީ އާއި މަރާލާގައިވާ ބްލޮގަރ ޔާމީން ރަޝީދުގެ އިތުރުން ވަގަށް ނަގާފައިވާ ނޫސްވެރިޔާ އަހުމަދު ރިލްވާންގެ ތަހުގީގަށް އެހީތެރިކަން ފޯރުކޮށްދިނުމަށް ތައްޔާރަށް ހުންނެވި ކަމަށް ޕްރޮފެސަރ ހަސަން އުގައިލް ވިދާޅުވެއްޖެއެވެ.
ޕްރޮފެސަރ އުގައިލް ހޯމަ ދުވަހު ކުރެއްވި ޓްވީޓެއްގައި ވިދާޅުވީ މި ތިން ފަރާތްތަކުގެ މައްސަލައިގެ އިތުރުން ގުނާ އަދަދު ނުކުރެވޭހާ މި ކަހަލަ ގިނަ މައްސަލަތަކުގައި އޭނާގެ ލަޔާގަތާއި ގާބިލިއްޔަތުކަން ހުރި މިންވަރަކަށް އެހީތެރިކަން ފޯރުކޮށްދެއްވުމަށް ތައްޔާރަށް ހުންނެވި ކަމަށެވެ.
އުގެއިލް މިފަދައިން ޓްވީޓު ކުރައްވާފައިވާއިރު މިދިޔަ މަހު ކުރީގެ ނާއިބު ރައީސް އަހުމަދު އަދީބު ވަނީ ދެން އަންނަ ސަރުކާރަކުން ދަރުބާރުގެ ފަދަ ތަނެއްގައި އެ ތިން ފަރާތްތަކުގެ ޝަރީއަތް ހުޅުވާލައިގެން ބޭއްވުމަށް ގޮވާލައްވާފައެވެ. އަދި އަދީބު ވިދާޅުވެފައި ވަނީ ދިވެހިރާއްޖޭގައި ދެން އުފެދޭ ސަރުކާރެއްގައި، ރިލްވާން ގެއްލުވާލި މައްސަލަ އާއި ޑރ. އަފްރާޝީމް ޢަލީ އަދި ޔާމިން ރަޝީދުގެ އިތުރުން އެތައް ބައެއް ގަތުލުކޮށްފައިވާ މަރުގެ މައްސަލަތައް ހުޅުވާލެވިފައިވާ ތަހުގީގަކާއި، އިންސާފްވެރި އަދި ރައްޔިތުންނަށް ވަދެވޭ ގޮތަކަށް ދަރުބާރުގެ ފަދަ ބޮޑު ތަނެއްގައި ބޭއްވުމަށް ގޮވާލައްވާ ކަމަށެވެ.
އަދީބު ވިދާޅުވީ މިސަރުކާރުން ވަނީ ރިލްވާންގެ މައްސަލަ އާއި އޭގެ އިތުރުން މަރުގެ އެތައް މައްސަލަތަކުގައި އިންސާފް ހޯދައިދިނުމުގައި ފެއިލްވެފައި ކަމުގައެވެ.
އުގައިލްގެ ފޭސް ރިކޮގްނިޝަން ޓެކްނޮލޮޖީ ބޭރުގެ ގައުމުތަކުން ވެސް ދަނީ ބޭނުންކުރަމުންނެވެ. އަދި ބައިނަލްއަގުވާމީ ބައެއް ތަހްގީގުތަކުގައި ވެސް އޭނާގެ ޓެކްނޮލޮޖީގެ ބޭނުން ހިފާފައި ވެއެވެ.
