ނޮވެމްބަރު މަހުގެ 1 ވަނަ ދުވަހު ރައީސް މުޙައްމަދު ނަޝީދު، އެނބުރި ރާއްޖެ ވަޑައިގަންނަވާނީ މިނިވަނެއްގެ ގޮތުގައި ކަމަށް ވަރަށް ޔަގީން ކަމާ އެކު ދަންނަވާ ކަމުގައި އެމްޑީޕީގެ ތަރުޖަމާނު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ރައީސް ނަޝީދު މާލެ ވަޑައިގަތުމުގެ ރަސްމިއްޔާތުގެ އިންތިޒާމްތައް ހުރި ގޮތުގެ މައުލޫމާތު ދިނުމަށް އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އިންތި ވިދާޅުވީ ރައީސް ނަޝީދު ރާއްޖެ ވަޑައިގަތުމަށް ހުރަސް އެޅޭނެ ފަރާތެއް މިހާރަކު ނެތް ކަމަށެވެ. އަދި އެ މަނިކުފާނު ރާއްޖެ ވަޑައިގަންނަވާނީ މިނިވަނެއްގެ ގޮތުގައި ކަމަށް އިންތި ވިދާޅުވިއެވެ.
އިންތި ވިދާޅުވީ ރައީސް ނަޝީދު މާލެ ވަޑައިގަތުމުގެ ކަންކަން ހަމަޖައްސަމުންދަނީ އެކަމަށް ހުރަސްތަކެއް ހުރި ކަމަށް ދެކެވޭ ވާހަކަތަކަކީ ނެތް ކަމެއް ކަމަށް ބަލައިގެން ކަމަށެވެ.
"ރައީސް ނަޝީދު ރާއްޖެ ވަޑައިގަންނަވާނީ މިނިވަނެއްގެ ގޮތުގައި، އަޅުގަނޑުމެން އެހެން މިދަންނަވަނީ އެމަނިފާނަކީ މިނިވަނެއް ކަމަށް އެކެއް ފެބްރުއަރީގައި ސުޕްރީމް ކޯޓުން ނެރުނު ހުކުމުން ވެސް އެގެން އޮވޭ، ދުނިޔޭގެ ބޮޑެތި ޖަމިއްޔާ ޖަމާއަތްތަކުން އެދަނީ އެވާހަކަ ދައްކަމުން" އިންތި ވިދާޅުވިއެވެ.
މީގެ އިތުރުން ނަޝީދަށް މަރުހަބާ ދެންނެވުން ވަރަށް ކުލަ ގަދަކޮށް ބާއްވަން ވަނީ ނިންމާފައެވެ. އެގޮތުން އެކަން ފާހަގަ ކުރާނީ ބޮޑު އީދެއްގެ ގޮތުގައި ކަމަށް އިންތި ވިދާޅުވިއެވެ.
އެމްޑީޕީގެ ގައުމީ މަޖިލީހުގެ މެމްބަރު އަންވަރު އިބްރާހިމް ވިދާޅުވީ އެއާޕޯޓުން ނަޝީދު މާލެ ވަޑައިގަންނަވާއިރު ކަނޑުމަތިން އެމަނިކުފާނަށް މަރުހަބާ ދެންނެވުމަށް ވީހާ ވެސް ގިނަ ކަނޑު އުޅަނދުތައް ނެރުމުގެ ފުރުސަތު އާންމުކޮށް ހުޅުވާލާފައިވާ ކަމަށެވެ.
އެކަމަށް ބޭނުންވާ ހުރިހާ އުޅަނދަކަށް ވެސް އެ ހަރަކާތުގައި ބައިވެރިވެވޭނެ ކަމަށާއި އެކަމަށްޓަކައި ހޮޓްލައިނެއް ވެސް ގާއިމް ކޮށްފައިވާ ކަމަށް އަންވަރު ވިދާޅުވިއެވެ.
މާލޭ ސިޓީ ކައުންސިލްގެ މެންބަރު މުޙައްމަދު ރަޝީދު (ބޯދިގު) ވިދާޅުވީ ރައީސް ނަޝީދު އެއާޕޯޓުން އެންމެ ފުރަތަމަ ވަޑައިގަންނަވާނީ އެއް ނަންބަރު ފާލަމަށް ކަމަށެވެ. އަދި އެތަނުން ދެން ވަޑައިގަންނަވާނީ އާޓިފިޝަލް ބީޗަށް ކަމަށާއި އެތަނުގައި ރައީސް ނަޝީދުގެ ޚާއްސަ ތަޤްރީރެއް ދެއްވުން ހިމެނޭ ކަމަށެވެ.
ރައީސް ނަޝީދު މާލެ ވަޑައިގަތުމުގެ އިންތިޒާމްތައް ހަމަޖެއްސުމުގައި ސަލާމަތީ ބާރުތަކާ ވެސް މަޝްވަރާ ކުރަމުންދާ ކަމަށާއި އިންތިޒާމްތަކުގެ ފުރިހަމަ ތަފްސީލު ފަހުން ހާމަ ކުރައްވާނޭ ކަމުގައި ވެސް މުޙައްމަދު ވިދާޅުވިއެވެ.
ރައީސް ނަޝީދު ރާއްޖެ ވަޑައިގަންނަވާ ދުވަހަށް ޚާއްސަކޮށްގެން އެމްޑީޕީން ވަނީ ޓީޝާޓެއް ވެސް ނެރެފައެވެ. އެ ޓީޝާޓަކީ ރައީސް ނަޝީދުގެ އަތްޕުޅުން ލިޔުއްވާފައިވާ ލިޔުއްވުމެއް ބޭނުންކޮށްގެން ތައްޔާރުކޮށްފައިވާ ޓީޝާޓެކެވެ. އޭގައި އެމަނިކުފާނު ވިދާޅުވި "މިއީ ހިތާ ހިތުގެ ގުޅުމެއް" މި ބަސްކޮޅެވެ.
