ތުރުކީގެ އިސްތަންބުލްގައި ހުންނަ ސައުދީގެ ކޮންސިއުލޭޓްގައި މަރާލި ކަމަށް ބުނާ ނޫސްވެރިޔާ ޖަމާލް ޚަޝޯގީގެ ހަގީގަތް އަންނަ އަންގާރަ ދުވަހު ހާމަ ކުރައްވާނެކަމަށް ތުރުކީގެ ރައީސް ތައްޔިބު އުރުދުޣާން ވިދާޅުވެއްޖެއެވެ.

އާދީއްތަ ދުވަހު އުރުދުޣާން ވިދާޅުވީ ޚަޝޯގީގެ މަރާއި ބެހޭގޮތުން ހަގީގަތް ހާމަކުރައްވާނީ އެމަނިކުފާނު ނިސްބަތްވެ ވަޑައިގަންނަވާ ޕާޓީގެ ގުރޫޕް ބައްދަލުވުމުގައި ކަމަށެވެ. 

އަދި ހޯދަމުން ދަނީ އިންސާފު ކަމަށާއި ޚަޝޯގީގެ މަރާއި ބެހޭގޮތުން ހުރިހާ ކަމެއް ހާމަކުރައްވާނެކަމަށް އުރުދުޣާން ވިދާޅުވިއެވެ. 

ޚަޝޯގީ ވަނީ މަރާލާފައިކަމަށް ތުރުކީގެ ތަހުގީގު ޓީމުން މީގެ ކުރިން ބުނެފައިވާއިރު އޭނާ ގެއްލުނު ދުވަހު ކުއްލި ގޮތަކަށް 15 މެމްބަރުންގެ ޓީމެއް ތުރުކީއަށް ގޮސްފައިވާކަމަށް އެޓީމުން ވަނީ ހާމަކޮށްފައެވެ. 

އުރުދުޣާން ވިދާޅުވީ އެ 15 މީހުން ތުރުކީއަށް ދިޔައީ ކީއްވެކަމާއި އަދި ސައުދީން ޚަޝޯގީ މަރާލާފައިވާކަމަށް ބުނެ، 18 މީހަކު އެމައްސަލާގައި ހައްޔަރު ކުރީ ކީއްވެކަން އަންގާރަ ދުވަހު ހާމަ ކުރައްވާނެކަމަށެވެ. 

ޚަޝޯގީ ގެއްލުނުކަން އެނގުނު ހިސާބުން ތުރުކީގެ އޮފިޝަލުން ގެންދިޔައީ ޚަޝޯގީ ކޮންސިއުލޭޓުން ނުކުމެފައިވާ ވީޑިއޯ ދެއްކުމަށް ސައުދީއަށް ބާރުއަޅަމުންނެވެ. ނަމަވެސް ތުރުކީން ގެންދިޔައީ އެ ގައުމުން ބުނަމުންދިޔަ ކަންކަމަށް ބާރުދޭ ހެކިތައް ހޯދަމުންނެވެ.

ސައުދީގެ އިންޓެލިޖެންސް އޮފިސަރުންތަކެއް އިސްތަންބޫލް އެއާޕޯޓަށް އެތެރެވާ މަންޒަރާއި އެ އަށް ފަހު އަނބުރާ ދާ މަންޒަރު ފެންނަ ފުޓޭޖްތަކެއް ވެސް ތުރުކީއިން ވަނީ ހޯދާފައެވެ.

މީގެ އިތުރުން ޚަޝޯގީ ހޯދުމުގެ މަސައްކަތުގެ ތެރެއިން ތުރުކީގެ ތަހުގީގު ޓީމަށް އިތުރު ފުރުސަތެއް ލިބިގެންދިޔައީ ކޮންސިއުލޭޓް ބަލަން ފުރުސަތު ލިބުމުންނެވެ. ތަހުގީގު ޓީމުގައި އިސްކޮށް ހުރި ތުރުކީގެ ޑެޕިއުޓީ ޕްރޮސިކިއުޓަރ ޖެނެރަލްއެވެ.

ތުރުކީގެ އޮފިޝަލުން ކޮންސިއުލޭޓާއި، ކޮންސުލް ޖެނެރަލްގެ ގެކޮޅާއި، ޑިޕްލޮމޭޓުންގެ ކާރުކޮޅުތައް ވެސް ތަހުގީގު ޓީމުން ބަލާ ފާސްކުރިއެވެ. މީގެ އިތުރުން ޖަންގަލި ވެސް ބަލާ ފާސްކުރިއެވެ.

ޚަޝޯގީ މަރާލާފައިވާ ކަމަށް ބުނާ އޯޑިއޯތަކެއް ލިބިފައިވާ ކަމަށް ބުނި ނަމަވެސް އޯޑިއޯއެއް ތުރުކީ އިން ހާމައެއް ނުކުރެއެވެ. ނަމަވެސް ތުރުުކީގެ ބަސް ދުލެއް ނުކުރެއެވެ.

އަށާރަ ދުވަހަށް ފަހު ސައުދީން ވަނީ ޚަޝޯގީ މަރާލާފައިވާ ކަމަށް އެއްބަސްވެފައެވެ. އެހެން ނަމަވެސް އެކަމުގެ ތަފްސީލެއް ހާމައެއް ނުކުރެއެވެ. ސައުދީން ކޮށްފައިވާ ތަހުގީގު އާންމު ކުރާނީ އެއްމަސް ދުވަސް ފަހުން ކަމަށްވާއިރު ތުރުކީގެ ތަހުގީގީ ޓީމުގެ ތަހުގީގު ތަކަށްފަހު އުރުދުޣާން ހާމަ ކުރައްވާނެ ކަމަށް ބެލެވޭ ހަގީގަތްތަކަށް މުޅި ދުނިޔެ އޮތީ ކެތްމަދުވެފައެވެ.