މުހުތާޒާއި ނިހާނުގެ ދައުވާތައް ބާތިލުކޮށްފި
21 އޮކްޓޯބަރު 2018 | އާދީއްތަ 12:55އެ ދައުވާ ތަކަކީވެސް އެއް މައްސަލައަކާއި ގުޅިގެން ހުށަހަޅާފައިވާ ދައުވާތަކެއް
ކުރީގެ ޕީޖީ މުހުތާޒު އާއި ގާޒީ ނިހާނު
ރައީސް އަބްދުﷲ ޔާމީން ހައްޔަރު ކުރަން ސައްހަ ނޫން ކޯޓު އަމުރެއް ނެރުނު ކަމަށް ބުނާ މައްސަލާގައި ކުރީގެ ޕްރޮސެކިއުޓަރ ޖެނެރަލް މުހުތާޒު މުހުސިން އާއި އދ. މާމިގިލި މެޖިސްޓްރޭޓް ކޯޓުގެ ކުރީގެ ގާޒީ އަހުމަދު ނިހާނުގެ މައްޗަށް ދައުލަތުން އުފުލާފައިވާ ދައުވާތަކާއި ގުޅިގެން ކްރިމިނަލް ކޯޓުގައި ހިންގާ ޝަރީއަތްތައް އިތުރަށް ކުރިއަށް ނުގެންދަން ނިންމައި ހުކުމް ކޮށްފި އެވެ.
އެ ދެ ބޭފުޅުންގެ މައްޗަށް އުފުލި ދައުވާތަކުގެ ތެރެއިން ޓެރަރިޒަމްގެ ދައުވާ ސާބިތުކޮށް 17 އަހަރަށް ޖަލަށް ލާފައިވާއިރު، ކްރިމިނަލް ކޯޓުން މިއަދު ބާތިލްކުރީ މުހުތާޒުގެ މައްޗަށް އުފުލާފައިވާ ދެ ދައުވާކަމުގައިވާ "ވަކި އަސްލެއް އޮތް އެއްޗެއް ކަމުގައި ސައްހަ ނޫން ގޮތެއްގައި ދެއްކުމަށްޓަކައި ލިޔުމެއް އުފެއްދުން" ކުށުގެ ދައުވާ އާއި "ވަކި އުސޫލަކުން ދޫކޮށްފައިވާ ލިޔުމެއް ކަމުގައި ސައްހަ ނޫން ގޮތުގައި ދެއްކުން" ކުށުގެ ދައުވާ އެވެ.
ޓެރަރިޒަމްގެ ދައުވާ ނިހާނުގެ މައްޗަށް ވެސް ސާބިތުކޮށްފައިވާއިރު، އޭނާގެ މައްޗަށް އިތުރަށް އުފުލާފައިވާ އެހެން ދައުވާތައް މިއަދު ވަނީ ބާތިލުކޮށްފަ އެވެ. އެ ތިން ދައުވާއަކީ "ވަކި އުސޫލަކުން ދޫކޮށްފައިވާ ލިޔުމެއް ކަމުގައި ސައްހަ ނޫން ގޮތުގައި ދެއްކުން" ކުށުގެ ދައުވާއާއި "ރަސްމީ ހައިސިއްޔަތު ނަހަމަގޮތުގައި ބޭނުންކުރުން" ކުށުގެ ދައުވާ އާއި "ރަސްމީ ވާޖިބު އަދާކުރުމުގައި އެކަށީގެން ނުވާ އަމަލެއް ހިންގުން" ކަމަށް ބުނާ ދައުވާ އެވެ.
ކްރިމިނަލް ކޯޓުގެ ގާޒީކަން ވެސް ކުރެއްވި މުހުތާޒާއި ގާޒީ ނިހާން ޖަލަށް ލުމަށް ހުކުމްކުރީ 2016 ވަނަ އަހަރު ޖޫން މަހު އެވެ.
އާދިއްތަ ދުވަހު ކްރިމިނަލް ކޯޓުގައި ބޭއްވި އަޑުއެހުމުގައި ހުކުމް އިއްވަމުން ކްރިމިނަލް ކޯޓުގެ އިސް ގާޒީ އަހުމަދު ހައިލަމް ވިދާޅުވީ މުހުތާޒު އާއި ގާޒީ ނިހާނުގެ މައްޗަށް މިހާރު ކްރިމިނަލް ކޯޓުގައި ކުރިއަށް ގެންދާ ދައުވާ ތަކުގައި ކުށް ސާބިތު ކުރުމަށް ހުށަހަޅާފައި ވަނީ ޓެރެރަޒިމް މައްސަލާގައި ވެސް ހުށަހަޅާފައިވާ ހެއްކާއި ގަރީނާ ކަމަށެވެ. އެ ހެެއްކާއި ގަރީނާތައް ވަޒަންކޮށް، ޓެރަރިޒަމް ދައުވާއާއި ގުޅިގެން ކްރިމިނަލް ކޯޓުން ގޮތެއް ނިންމާފައިވާ ކަމަށް ގާޒީ ހައިލަމް ވިދާޅުވި އެވެ.
އެއް މައްސަލައެއްގައި ތަފާތު ދައުވާތަކެއް ކުރި ނަމަވެސް، އެހުރިހާ ދައުވާތައް ސާބިތު ކުރުމަށް ހުށަހަޅާފައި ވަނީ އެއް ހެއްކާއި ގަރީނާތަކެއް ކަމަށްވާތީ އެ ހެކިތަކާއި ގަރީނާތަށް ވަޒަންކޮށް، ޓެރަރިޒަމް މައްސަލާގައި ކްމިނަލް ކޯޓުން ގޮތެއް ނިމާފައިވާތީ މިހާރު ކްރިމިނަލް ކޯޓުގައި ކުރިއަށް ގެންދާ ދައުވާތައް އިތުރަށް ކުރިއަށް ގެންދާނެ ތަނެއް ނެތް ކަމަށް ހުކުމް އިއްވަމުން ގާޒީ އަހުމަދު ހައިލަމް ވިދާޅުވި އެވެ.
