ޕިންކް ޓީމްގެ ކޯޗަކަށް ހަމަޖެއްސެވުމުން ވަޑައިގަތީ އިދިކޮޅު ޓީމަށް ކޯޗްކޮށްދެއްވަން ކަމަށް ވިދާޅުވެ ނުސީދާ ގޮތުން ކުރީގެ ރައީސް މައުމޫނު އަބްދުލް ގައްޔޫމަށް މަލާމާތުގެ ބަސްތައް، ވިލިމާލެ ދާއިރާގެ މެމްބަރު އަޙުމަދު ނިހާން ހުސެއިން މަނިކު ރައްދު ކުރައްވައިފިއެވެ.
ޕީޕީއެމް އިން ރުމާލު ދޭއެއް ޖަގަހައިގަ ބުރާސްފަތި ދުވަހުގެ ރޭ ބޭއްވި ޖަލްސާގައި އެ ޕާޓީގެ ޕާލަމެންޓްރީ ގުރޫޕްގެ ލީޑަރު ނިހާން ޕޕީއެމް އަށް ނިސްބަތްކުރައްވާ ވިދާޅުވީ އެއީ ޕިންކް ޓީމްގެ ގޮތުގައެވެ. އިދިކޮޅު ކޯލިޝަނަށް ނިސްބަތް ކުރައްވާ ވިދާޅުވީ "މިނާ ކުކުޅު ޓީމް"ގެ ނަމުގައެވެ. އޭނާ ވިދާޅުވީ ދެ ޓީމުން ފުޓްބޯޅަ މެޗެއް ކުޅެނީ ކަމަށް ބަލާނަމަ ޕިންކް ޓީމްގެ ކޯޗް ފާޅުގައި ވަޑައިގެންނެވީ އިދިކޮޅު ޓީމަށް ކޯޗްކަން ކޮށްދެއްވަން ކަމަށެވެ.
" ފަސް އަހަރަށް ކޯޗުކަން ހަވާލުކުރީއިރު ލިޔުނު ލިޔުމުގައި ތެދެއް ނެތިއްޔޯ، އިދިކޮޅު ޓީމަށް ކޯޗުކަން ކޮށްދީގެން ނުވާނެ އޭ. އަޅެ ބުއްދި ސަލާމަތުން ހުރިއްޔާ، އިދިކޮޅު ޓީމަށް ކޯޗްކޮށްދޭން ދިޔައީމަ މި ޓީމުން ކަނޑައެއްނު ލާނީ. ދެން އަނެއް ދުވަހު ހަވީރު އިންޓަވިއު ދެއްވާ މި ވިދާޅުވަނީ ތިމަންނައަކީ އަދިވެސް ކޯޗޭ. އޭގައި ފަސްޓްއެއިޑަށް ބެހެއްޓި ހަލީލޭ ކިޔާ ކުއްޖަކީ ތިމަންނަ ބެހެއްޓި ކުއްޖެއް ނޫނޭ. މި މިސާލުން ދެން ބައްލަވަން ޖެހޭނީ މި ކޯޗުގެ ބުއްދި ސަލާމަތުން ހުރިތޯ އެއް ނޫން ތޯ.،" ނިހާނު ވިދާޅުވި އެވެ.
ޕިންކް ޓީމްގެ ކޯޗަކަށްލީ ފަރާތުން އިދިކޮޅު ޓީމަށް ގޯލް ޖަހަންވީ ގޮތް ކިޔާދީ ޕިންކް ޓީމްގެ ކުޅުންތެރިންބޮލުގައި ބަދުނާމު ވެސް އެޅުވި ކަމަށް އޭނާ ވިދާޅުވި އެވެ. އެހެން ކަމުން ޕީޕީއެމްގެ ނައިބު ރައީސް އަބްދުﷲ އަބްދުއް ރަހީމާއި އެ ޕާޓީގެ ސެކްރެޓަރީ ޖަނަރަލް އަބްދުﷲ ހަލީލް ރުޅި މަޑު ކަމަށް ވެސް ވިދާޅުވި އެވެ.
ޕީޕީއެމްގެ ސެކްރެޓަރީ ޖެނަރަލްގެ މަގާމަށް ހަލީލް އައްޔަން ކުރެވުނީ ރަނގަޅަށް ލިޔެވިފައި އޮތް ގޮތައް ކަމަށް ނިހާން ވިދާޅުވި އެވެ.
އޭގެ އިތުރުން އަންނަ އަހަރުގެ ރިޔާސީ އިންތިހާބު އެއްލަކިން ރައީސް ޔާމިން ކާމިޔާބު ކުރައްވާނެ ކަމަށް ވިދާޅުވި އެވެ.
