ރައީސް ޔާމީންގެ ވެރިކަން ވަނީ ނިމިގެން ގޮސްފައި، އެއީ މާޒީ: އަމީތު
މީގެ ކުރިން ރާއްޖޭގައި ވެރިކަން ކުރައްވާފައިވާ ބޭފުޅުންގެ ކިބައިން ފެނިގެން ގޮސްފައިވަނީ ރީތި ނަމޫނާ
މަޑުއްވަރި ދާއިރާގެ މެމްބަރު މުހައްމަދު އަމީތު
ދައުލަތުގެ ހުރިހާ ބާރެއް ފެށިގެން އަންނަނީ ރައްޔިތުންގެ ކިބައިން ކަމަށްވާއިރު އެތަކެއް ރައްޔިތުން ރައީސް އަބދުﷲ ޔާމީނަށް ނޫނެކޭ ބުނެފައިވާކަމަށާއި އެއީ މިހާރު ރައީސް ޔާމީނަކީ މާޒީކަމަށް މަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވެއްޖެއެވެ.
އިންތިޚާބު ބާތިލުކުރަން ރައީސް ޔާމީން ހުށަހަޅުއްވައި، އަދި ޕީޕީއެމްގެ މެމްބަރުންނަށް އެ ޕާޓީގެ އިސް ބައެއް ލީޑަރުން ހުވަފެން ދައްކަވަމުން ދާއިރު، އަމީތު ރާއްޖެޓީވީގައި ވިދާޅުވީ ރައީސް ޔާމީންގެ ވެރިކަން މިހާރުވަނީ ނިމި ގޮސްފައި ކަމަށެވެ.
މީގެ ކުރިން ރާއްޖޭގައި ވެރިކަން ކުރައްވާފައިވާ ބޭފުޅުންގެ ކިބައިން ފެނިގެން ގޮސްފައިވަނީ ރީތި ނަމޫނާ ކަމަށާއި އެހެން ނަމަވެސް ރައީސް ޔާމީންގެ ކިބައިން އެކަން ފެނިވަޑައިނުގަންނަވާކަމަށް އަމީތު ވިދާޅުވިއެވެ. އަމީތު ވިދާޅުވީ ދިވެހި ރައްޔިތުންނަށް ޚިދުމަތްތަކެއް ކޮށްދެއްވާފައިވާނަމަ ވެރިކަން ނިންމަވާލައްވަމުން ރައީސް ޔާމީން ނަމޫނާ ދައްކަވަން ޖެހޭކަމަށެވެ. އެހެން ނަމަވެސް އެމަނިކުފާނުގެ ކިބައިން ފެނިގެންދަނީ ބަލި ގަބޫލު ނުކުރައްވާ މަންޒަރު ކަމަށް އޭނާ ވިދާޅުވިއެވެ. އެމަނިކުފާނަކީ ރީތި ގޮތުގައި ވެރިކަން ކުރައްވަން އެނގިލައްވާ ބޭފުޅެއް ނޫންކަމަށް އަމީތު ވިދާޅުވިއެވެ.
"ގަބޫލެއް ނުކުރަން ރައްޔިތުންގެ ނިންމުން ސުޕްރީމްކޯޓަށް ވެސް ބަދަލުކުރެވޭނެކަމަކަށް. އެއީ ދައުލަތުގެ ހުރިހާ ބާރެއް ފެށިގެން އަންނަނީ ކޯޓު ތެރެއިންނެއް ނޫން. ދައުލަތުގެ ބާރު ފެށިގެން އަންނަނީ ރައްޔިތުންގެ ކިބައިން. އެހެންވީމަ ރައްޔިތުން ނިކުމެ ވެރިކަމުގެ ބާރުތައް ވާންވީގޮތް ބުނީމަ ދެން ބަސްބުނުމުގެ އިޚްތިޔާރު އެއްވެސް މުއައްސަސާއަކަށް ނޯންނާނެ." އަމީތު ވިދާޅުވިއެވެ.
ރައީސް ޔާމީން ބުރާސްފަތި ދުވަހު ގައުމާއި މުޚާތަބުކުރައްވާ ވިދާޅުވެފައިވަނީ އެމަނިކުފާނަށް ފާއިތުވެދިޔަ ފަސް އަހަރުގެ ތެރޭގައި ރައްޔިތުން ދަސްނުވިކަމަށެވެ. އަމީތު ވިދާޅުވީ ފަސް އަހަރުގެ ދައުރެއް ފުރިހަމަ ކުރައްވާފައިވާއިރު އެމަނިކުފާނަކީ ރައްޔިތުންގެ ގާތަށް ވަޑައިގެންނެވި ބޭފުޅެއް ނޫންކަމަށެވެ. އަދި ރަށަކަށް ވަޑައިގެންފިނަމަ ހަމައެކަނި ވަޑައިގަންނަވަނީ ބަނދަރު މައްޗަށް ކަމަށާއި އެމަނިކުފާނަށް ތާއީދު ލިބިވަޑައިނުގެންނެވީ އަދި ރައްޔިތުން ދަސްނުވީ އެސަބަބާއި ހެދިކަމަށް އަމީތު ވިދާޅުވިއެވެ.
