އެންމެ މަޤުބޫލް ޓީވީ އަކީ ރާއްޖެޓީވީ: އިބޫ
18 އޮކްޓޯބަރު 2018 | ބުރާސްފަތި 07:52ނޫސްވެރިކަމުގެ ބިރުވެރިކަން ތަޖުރިބާ ކުރި އެއްތަނަކީ ރާއްޖެޓީވީ
އިންތިހާބީ ރައީސް އިބްރާހީމް މުހައްމަދު ސޯލިހް ރާއްޖެޓީވީ އަށް ޒިޔާރަތް ކުރައްވާ ވާހަކަފުޅު ދައްކަވަނީ
އެންމެ މަޤުބޫލް ޓީވީ އަކީ ރާއްޖެޓީވީ ކަމަށް އިންތިހާބީ ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ބުރާސްފަތި ދުވަހު ރާއްޖެޓީވީގެ މުވައްޒަފުންނަށް ބައްދަލު ކުރެއްވުމަށް ރާއްޖެޓީވީ އަށް ޒިޔާރަތް ކުރައްވާ ވާހަކަފުޅު ދައްކަވަމުން އިންތިހާބީ ރައީސް ވިދާޅުވީ ރާއްޖޭގެ ނޫސްވެރިކަމުގެ މިނިވަން އޮތުމަކީ އަބަދުވެސް ދެކިވަޑައިގެންނެވި ހުވަފެނެއް ކަމަށާއި ނޫސްވެރިކަމުގެ އެންމެ ބިރުވެރި ދުވަސްވަރު އެކަމުގެ ތެރޭގައި ހަރަކާތްތެރި ވެވަޑައިގަތުމުން އެކަމުގެ ނުރައްކާ ވަރަށް ރަނގަޅަށް އެގިވަޑައިގަންނަވާ ކަމަށެވެ.
ސޯލިހް ވިދާޅުވީ ނޫސްވެރިކަމުގެ ބިރުވެރިކަން ތަޖުރިބާ ކުރި އެއްތަނަކީ ރާއްޖެޓީވީ ކަމަށެވެ.
"އެގޮތުން އެންމެ ބޮޑަށް އޭގެ އަސަރު ކުރި އެއްތަނަކީ ރާއްޖެޓީވީ، 2013 ވަނަ އަހަރު ރިޔާސީ އިންތިހާބު ކުރިމަތިވެގެން އައިރު ރާއްޖެޓީވީ ތަހަންމަލު ކުރަމުންދިޔަ ކަންތައްތަކަކީ ރާއްޖޭގެ ހުރިހާ ރައްޔިތުންނަށް ހާމަކަން ބޮޑު ގޮތެއްގައި ފެނިގެންދިޔަ ކަންތައްތައް އެހެންނަމަވެސް ފަހަތަށް ނުޖެހި ރާއްޖެޓީވީ އާއި ރާއްޖެޓީވީގެ ހިންގުންތެރިން ކުރި މަސައްކަތުގެ ނަތީޖާ އެއީ ދިވެހި ރާއްޖޭގައި މިވަގުތު އޮތް އެންމެ މަޤުބޫލު އެންމެ ގިނަ ބަޔަކު ބަލާ ޗެނަލް އަކީ ރާއްޖެޓީވީއަށް ވެގެންދިޔުން" ސޯލިހް ވިދާޅުވިއެވެ.
ސޯލިހް އިތުރަށް ވިދާޅުވީ އެމަނިކުފާނުގެ ވެސް ބައްލަވާ ޗެނަލަކީ ރާއްޖެޓީވީ ކަމަށެވެ.
"އަޅުގަނޑުވެސް މިހާރު ވެސް ކޮންމެ ދުވަހަކު ހެނދުނު ހޭލާފައި އެންމެ ފުރަތަމަ ވެސް ހުޅުވާލަނީ ރާއްޖެޓީވީ އެއީ އަޅުގަނޑަށް ރާއްޖޭގެ މައުލޫމާތުތައް އެންމެ ފުރަތަމަ ލިބިގެންދާ ވަސީލަތަކީ. ތިބޭފުޅުން ތިކުރައްވާ މަސައްކަތަށް ފަށްފަށުން ޝުކުރު ދަންނަވަން" ސޯލިހް ވިދާޅުވިއެވެ.
