ރައީސް ޔާމީން ރާއްޖެ ދޫކުރައްވައި ފިއްލަވަން ނޫޅުއްވާ: ރައީސް އޮފީސް
18 އޮކްޓޯބަރު 2018 | ބުރާސްފަތި 13:54ރައީސް ޔާމީނަކީ ވެރިކަމަށް ވަޑައިގަތުމުގެ ކުރިން ވެސް، ފަހުން ވެސް ފިއްލައްވާނެ ބޭފުޅެއް ނޫން
ރައީސް އޮފީހުގެ ތަރުޖަމާނު އިބްރާހިމް މުއާޒު އަލީ
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ރާއްޖެ ދޫކުރައްވައި ފިއްލަވަން ނޫޅުއްވާ ކަމަށް ރައީސް އޮފީހުން ބުނެފިއެވެ.
ރައީސް ޔާމީން ރާއްޖެ ދޫކުރައްވައި ފިއްލަވަން އުޅުއްވާކަމަށް ބުނެ ދައްކަމުންދާ ވާހަކަތަކަށް ރައްދު ދެއްވައި ރައީސް އޮފީހުގެ ތަރުޖަމާނު އިބްރާހިމް މުއާޒު އަލީ ވިދާޅުވީ ރައީސް ޔާމީނަކީ ވެރިކަމަށް ވަޑައިގަތުމުގެ ކުރިން ވެސް، ފަހުން ވެސް ފިއްލައްވާނެ ބޭފުޅެއް ނޫންކަމަށެވެ.
މުއާޒު ވިދާޅުވީ ބައެއް ސިޔާސީ ބޭފުޅުން ޖިނާއީ ހުކުމްތަކުން ފިއްލަވަން ރާއްޖެ ދޫކުރެއްވިނަމަ ވެސް ރައީސް ޔާމީނަކީ ރާއްޖޭ ދޫކޮށް ފިއްލަވާނެ ބޭފުޅެއް ނޫންކަމަށެވެ.
ރައީސް ޔާމީން ފިއްލަވަން އުޅުއްވާކަމަށް ރައީސް އޮފީހުން ދޮގުކުރައްވާފައި ވާއިރު އެމަނިކުފާނު ރާއްޖެ ދޫކުރައްވައި ފިއްލަވަން އުޅުއްވާ ކަމަށް ތުހުމަތުކޮށް އެކަން ހުއްޓުވައި ދިނުމަށް ގުޅިފައިވާ ޕާޓީތަކުން ފުލުހުންނަށް ވަނީ ބުދަ ދުވަހުގެ ރޭ މައްސަލަ ހުށަހަޅުއްވާފައެވެ.
އެމްޑީޕީގެ ޗެއަރޕާސަން ހަސަން ލަތީފް ވިދާޅުވީ ރައީސް ޔާމީން ރާއްޖެ ދޫކުރައްވައި ފިއްލަވަން އުޅުއްވާ ކަމުގެ މައުލޫމާތު މުއުތަބަރު ގޮތަކަށް ލިބިވަޑައިގެން ފައިވާ ކަމަށެވެ.
އެހެންކަމުން ގާނޫނުގެ ތެރެއިން ރައީސް ޔާމީން ފުރާވަޑައި ނު ގެންނެވޭނެ ގޮތަށް އެ މަނިކުފާނު ހިފެހެއްޓުމަކީ ފުލުހުންގެ އިދާރާ އިން މިހާރު ކޮންމެހެން ކުރަންޖެހޭ ކަމެއް ކަމަށާއި، ޤާނޫނުގެ ތެރެއިން ފުލުހުންގެ މުއައްސަސާ އަށް އެ ބާރު ލިބިދީފައި އެބައޮތް ކަމަށެވެ.
