އެކި ދުވަސްވަރު ގިނަ އަންހެނުންތަކަކަށް ޖިންސީ ފުރައްސާރަ އާއި ގޯނާ ކޮށްފައިވާ ކަމުގެ ތުހުމަތު ރައްދުވެފައިވާ އިންޑިއާގެ ޖޫނިއަރ ފޮރިން މިނިސްޓަރ މުބައްޝިރު ޖާވިދު އަކްބަރު މަޤާމުން އިސްތިއުފާ ދެއްވައިފިއެވެ.

އިންޑިއާގައި ބޮޑު ތަރުހީބެއް ލިބެމުންދާ #MeToo ކެމްޕެއިންގެ ތެރެއިން ގިނަ އަދަދެއްގެ އަންހެނުން ވަނީ އެކި ދުވަސްވަރުގެ މަތިން އަކްބަރު އެމީހުންނަށް ޖިންސީ ފުރައްސާރަ އާއި ގޯނާ ކޮށްފައިވާ ކަމަށް ތުހުމަތު ކޮށްފައެވެ.

މިހާރު އުމުރުން 67 އަހަރުގެ އަކްބަރާއި ދެކޮޅަށް ޖިންސީ ފުރައްސާރައިގެ ގިނަ ތުހުމަތުތަކެއް ކޮށްފައިވާ އިރު މި ތުހުމަތުތައް ކުރި އަންހެނުންގެ ތެރޭގައި ގިނައިން ހިމެމެނީ ސިޔާސީ ދާއިރާއަށް ވަނުމުގެ ކުރިން ނޫސް އެޑިޓަރެއްގެ ގޮތުގައި އަކްބަރު މަސައްކަތް ކުރިއިރު އޭނާ އާއި އެކު މަސައްކަތްކުރި މީހުންނެވެ.

އަކްބަރަކީ އިންޑިއާގެ #MeToo ކެމްޕެއިންގެ ތެރެއިން ޖިންސީ ފުރައްސާރައިގެ ތުހުމަތު ކުރެވުނު އިރު އެންމެ އިސް މަޤާމެއްގައި ހުރި މީހާ ކަމަށްވާއިރު، އޭނާގެ މައްޗަށް ކުރެވުނު ގިނަ ތުހުމަތުތައް އޭނާ ވަނީ ދޮގުކޮށްފައެވެ. ބުދަ ދުވަހު އިސްތިއުފާ ދެއްވި އިރު އަކްބަރު ވަނީ އެނާ އާއި ދެކޮޅަށް ޖިންސީ ފުރައްސާރައިގެ ތުހުމަތު ކޮށްފައިވާ ނޫސްވެރިއަކާއި ދެކޮޅަށް އަބުރުގެ ދައުވާ ވެސް ކޮށްފައެވެ.

"އަޅުގަނޑާއި ދެކޮޅަށް ކޮށްފައިވާ ދޮގު ތުހުމަތުތަކަށް އިންސާފު ހޯދުމަށް އަމިއްލަ ހައިސިއްޔަތުން ކޯޓަށް ދިއުމަށް ނިންމާފައި ވާތީ އަޅުގަނޑު ދެކެނީ މިވަގުތު އަޅުގަނޑު ހުރި މަޤާމުން އިސްތިއުފާ ދިނުމަކީ އެންމެ މުނާސަބު ގޮތް ކަމަށް"، ބުދަ ދުވަހު އަކްބަރު އާންމު ކުރެއްވި ބަޔާނެއްގައި ވެއެވެ.

ތުހުމަތުތަކާއި ގުޅިގެން އަކްބަރު އިސްތިއުފާ ދެއްވިއިރު، #MeToo ކެމްޕެއިންގެ ތެރެއިން އިންޑިއާގެ ބާރުގަދަ މަޤާމުތަކުގައި ތިބި އެކިއެކި ސިޔާސީ ފަރާތްތަކާއި، މަޝްހޫރު އެކިއެކި ފަރާތްތަކާއި ދެކޮޅަށް ވެސް އެކި ފަރާތްތަކުން ދަނީ ޖިންސީ ފުރައްސާރައިގެ ތުހުމަތު ކުރަމުންނެވެ.