އަފްޣާނިސްތާނުގެ ގާނޫނުހަދާ މަޖިލީސްގެ އިންތިޚާބުގައި ވާދަކުރައްވާ ކެނޑިޑޭޓަކު މަރާލައިފި

އަފްޣާނިސްތާނުގައި ދިން ހަމަލާއެއްގައި ގާނޫނުހަދާ މަޖިލީހުގައި ވާދަކުރައްވާ މެންބަރަކު މަރާލައިފި ކަމަށް އޮފިޝަލުން ވިދާޅުވެއްޖެއެވެ.

ސަރުކާރުގެ އިސް އޮފިޝަލު ރޮއިޓަރސް އަށް ވިދާޅުވީ އަންނަ ހޮނިހިރު ދުވަހު ބާއްވާ އިންތިޚާބުގައި ވާދަކުރައްވާ އަބްދުލް ޖަބަރް ޤަރްމަން މަރާލާފައި ވަނީ ލަޝްކަރް ގާ ސިޓީގައި ހުންނަ އޭނާގެ އޮފީހުގައި ހުއްޓައި ކަމަށެވެ.

އެއްޗެއް ގޮއްވާލައިގެން ދިން މި ހަމަލާގައި ހަތް މީހުން ޒަޚަމްވިއެވެ.

ހަމަލާ ދިންތާ ގަޑިއިރުތަކެއްގެ ތެރޭގައި ހަމަލާގެ ޒިންމާ ނަގައި ތާލިބާނުން ނެރުނު ބަޔާނެއްގައި ވަނީ އޮކްޓޯބަރ މަހުގެ 20 ވަނަ ދުވަހު ބާއްވާ ގާނޫނުހަދާ މަޖިލީހުގެ އިންތިޚާބުގެ ވޯޓުގައި ބައިވެރިނުވުމަށް ޓީޗަރުންނާއި ދަރިވަރުންނަށް އިންޒާރު ދީފައެވެ. އަދި ވޯޓްލާ މަރުކަޒުތަކެއްގެ ގޮތުގައި ސްކޫލްތައް ބޭނުން ނުކުރުމަށް ވެސް އިންޒާރުދީފައެވެ.

ތާލިބާނުން ވަނީ އިންތިޚާބަށް ހުރަސްއަޅާނެ ކަމަށް ވައުދުވެފައެވެ. ހަނގުރާމަވެރި ތާލިބާން ޖަމާއަތުން ވަނީ އިންތިޚާބު ބޮއިކޮޓްކުރަން ގޮވާލާފައެވެ.

އަންގާރަ ދުވަހުގެ ރޭ މެދުތެރޭ ޕްރޮވިންސްގައި ހިނގައިދިޔަ ހަމަ ނު ޖެހުންތަކުގައި ވެސް އަފްޣާނިސްތާނުގެ ފުލުހުންގެ އެތައް ބަޔަކު މަރުވެ ނުވަތަ ޒަޚަމްކޮށްލާފައި ވެއެވެ.